*** Тонг оғир отади, Бонг урмайди кўк. Тириклар кўзлари юмиқ ётади, Ёлғиз сен юммайсан... Кўзинг рангги тўқ. Ҳайкалдек қотаман, Ел соч синдирар. Миллатнинг қўлиман... Тонгни отаман Кўзингга кўзимга ёшларни ўраб. Туғилмайди ҳадик, Тўлмайди коса. Якка-якка тонгни кута олмадик Сенинг кўзларингга кўзимни босиб. Аввал сен очасан, Кейин эса мен... "Севаман то ўлим..." – ичилган қасам Сен билан, Мен билан чўзилади тенг. Бир қарич масофа, Дарвозамиз тош. Сенинг кўзларингни олгунча топиб, Менинг кўзларимга тонг отар қуёш. Муаззин овози Келар қадамлаб. Туғилган ва ўлган йилимни ёзар Кўзларингни тош деб билган одамлар. Йиғладинг тонг етиб – Қабринг усти нам. Эҳ... кўзинг ёшини артолмасин деб, Узоқроқ қазишган гўримизни ҳам... Тонг оғир отади... 2023 ФЕРУЗШОҲ