السلام علـيكُـم ورحـمة الله وبرڪاته حياكم الله ^^ علشان تقلل حجم الإباحية في قلبك لازم تشغل وقتك بكل ما أوتيت من قوة. الفراغ قاتل، مهلكة للنفس وباب واسع للشيطان. ولازم ولا بد تدرك يقينا أنك ضعيف، كتير افتكروا إنهم أقوياء ويقدروا يتخلوا عن المصيبة دي، لكنهم ما لبثوا وأن رجعوا. ضعفك ده لازم تقويه بالله سبحانه، انزل صلي في الجامع، شوفلك صحبة صالحة تعينك، أكثر من ذكر الله، وغض بصرك. وادع الله كثيرا، تضرع له سبحانه بقلب مخلص، سلم أمرك كله له. الشيطان بيدخل لك وقت ضيقك وفراغك، مرة واحدة بتلاقيك كسلان مش عايز تعمل حاجة. طيب تعمل إيه تقضي به وقتك وبالمرة تخرج نفسك من الضيق ده! تتفرج على الإباحية، قضيت شهوتك، خلاص دخلت في دوامة غم أكبر من اللي قبلها! مش بس كده، إنت اختليت بنفسك عن الناس مخافة أن يروك، ومفيش مخافة من الله الذي لا ينفك يراك سبحانه! ما لك لا ترجو لله وقارا يا أخي؟ طيب ما أنت ممكن تموت على حالتك دي. الموضوع إدمان مش سهل، لكن عذاب ربنا أصعب مما تتخيل، وأنت محاسب محاسب، مش هتروح بعيد. وفي المقابل الجنة عظيمة تستحق، احفظ وقار الله في قلبك وخافه سبحانه واعمل لده بكل ما أوتيت من قوة. شوف أسباب ضعفك وواجهها، الموضوع مش بس أثره سلبي على دنياك، لكن ده بيخرب قلبك وبيخليك أجوف بعيد عن كل صلاح. استعن بالله ولا تيأس. أسأل الله أن ينفعنا واياكم وأن يستعملنا ولا يستبدلنا ويهدينا ويهدي بنا ويجعلنا سببا لمن اهتدى ويرزقنا الحسني وزيادة