مرت سنه من العمر شبعجل صارت تمر   مرت سنه من العمر. مَرَّن شلون ايام.    كلهن حزن وآلآم مرت سنه من العمر ★★★★★ سنه مرت شفت ايامها المره تلوح بوسط جرحي البسمه والحسره عشت بس ليل بيها مفارگ الگمره وراحت ناس مني. وضلت الذكره نصين عمري انقسم   بين الحلم و الوهم انطتني دمع سچاب  ومني خذت أحباب مرت سنه من العمر ★★★★★ سنه راحت ولاخلت اهل عندي هظم ودموع اصبح كل حلم وردي الدمع مايوم هاجر لاجفه خدي النهايه أگبالي اصدها منين ماأبدي كل وكت يوم ارتجي.  مايوم مثله يجي لاچن طبع دنياي.  نفس الطبع وياي مرت سنه من العمر ★★★★★ شفت طيبيين بيها تعرف الصحبه وشفت اوجوه مثل الوطن بالغربه وشفت احباب توفي وتحظر الصعبه مشوا عني ولفالي النوح والحسبه مابين ليل ونوح    ظلت وحيده الروح يايوم بيه ارتاح. وانسه زمان الراح مرت سنه من العمر ★★★★★ سنه ما اذكر اشقدمت وانطتني بس أذكر اجتني وشخذت مني وروج ايامها يم شامت يذبني محه كل الفرح لمن لفه حزني كل سنه اتمر وتهل. نفس الطبع والشكل كل يوم اگول اتهون. والگاها نفس اللون مرت سنه من العمر ★★★★★ سنه مرت تذبني محنه علمحنه يوم البچت  روحي شگد بچت منه شگد روحي بچتله. ويرد تتمنه بجحيم العاش صعبه يوصف الجنه امنين اجيبن زمن.  مابيه عذاب ومحن راحت سنه ابشوغات.  وجتني سنه ابلوعات مرت سنه من العمر الشاعر حسن لعيبي الحريشاوي