الفين وخمسه وعشرين ابديها وياك واخذ العهد يا مولاي لا ما انساك يالضحه الي بوريده هاي السنه الجديده ابديها وياك **** بسم اللطمه والدمعه .. ابدي وروحي منفجعه على مصابك يبو كل المشاعر گلبي بحزنك اتعبد.. وكل ايامي ثوب اسود نبض گلبي مصيبه وحزني عاشر يحسين فدوه الزمني بيدك خليني واحد من عبيدك من اذكر العيد اذكر الشام عيدو من شافو وريدك راس السنه شعندي وياه مادام وياك راسك ينكط دم وشوگ برماح اعداك يالغربتك فريده هاي السنه الجديده ابديها وياك **** الوادم تلبس الاحمر… واذكر دمك مطشر ويترسني الحزن من جدمي للهام الوادم جوهم كرسمس.. وآنه اجوائي بالمجلس واجددلك ولائي بكل الاعوام يحسين موبيدي وغلاتك وي دمي تجري نايباتك الوادم تخيم كلها بذنوب بس انه خيمت بعباتك وقررت بخمسه وعشرين يانبض الروح ما انجر الهذا وذاك واهديك الروح الماضي ما اعيده هاي السنه الجديده ابديها وياك **** وبراس السنه الحالي .. اذكر راسك العالي لمن حضنته وماتت رقيه وانطيك العهد وامشي .. انت بدنيتي كل شي وكل ايامي عاشور ورزيه انت التهمني اهواي يحسين واليستحق تبچيله كل عين الما عنده مثلك ينطم اذنوب لا وين ينطي وجهه لا وين يا نعمه وجهلوك الناس صدرك مسحوگ كل عمري دموعك يحسين وانت المعشوگ ياجرحي بس اريده هاي السنه الجديده ابديها وياك **** اغلق ماضي اوهامي .. وافتح صفحة احلامي وامسح مني ايام الندامه خادم خادم وخادم .. بس لحسين ابن فاطم واگضي عمري كله بس خدامه بيك ابدي يومي وبيك انهي خلافك يبو اليمه آنه شنهي واعليك امشي اچفوف عباس ردني الخدمتك وين وجهي هالمره إن شاء الله هالموقف غير ما اخلف وعدي الوياك ياراعي الخير يالخيري كله بيده هاي السنه الجديده ابديها وياك **** بالدنيا رحت زايد .. ذنبي بخدمتي ايباعد شايف نفسي واتكبر عله الناس بس هسه ارجعت نادم .. ميهمني حچي الوادم وغيرك ما اخلي يشغل الراس براسي الحسين شلون مذبوح واگباله گعدت زينب تنوح وبعينها من تشوف الخيول تسحگ بصدره وتطلع الروح معناها حزنك بالروح لا ماينعاف والما شايف رحمة گلبك من عمره اشاف من اختم القصيده هاي السنه الجديده ابديها وياك **** هشام الشيباني