#استشهاد_الإمام_الصادق ع
ذبح النبي...او جرح السبي.. او صرخات الايتام
سوط الشمر... او خوف الخدر... او نيران الاخيام
كلها بْدليل الصادق اجروح
او حتى بمماته الكربلا اينوح
.
.
.
جرح يمشي بوريده اعله الذي كطعوا وريده
والدمعه بْعِيونه اتسولف آلامه الشديده
ينوح الصادق العَمْته البقت وسفه وحيده
او مشت بنت الدلال امجتّفه الديره بعيده
يبجي بجرح...عالمنذبح ... وبطول الايام
سوط الشمر... خوف الخدر... او نيران الاخيام
كلها بدليل الصادق اجروح
.
.
.
لَطُم خلص حياته جعفر او حتى بمماته
وصّه المأتم ايكون بْنِدْبَت احسين او بناته
الباكي اللاطم النادب على جده صفاته
بكلشي اينوح عالمذبوح إهو حتى بصلاته
ابن النبي ... لابن النبي... كل ليله ما نام
سوط الشمر... خوف الخدر... او نيران الاخيام
كلها بدليل الصادق اجروح
.
.
.
أكبر جرح عت قلبه على أحوال اليتامه
من شبّت خيم والوالي مرضوضه عظامه
انكسروا مثل كسرة جنح طير اليمامه
الهضيمة اويه الهوى طارت لواليهم عِمامه
هذا الألم.... أكبر سهم ... من ذيج الاسهام
سوط الشمر... خوف الخدر... نيران الاخيام
كلها بدليل الصادق اجروح
.
.
.
الجبيرة من دوت نار بوسط بيته او ذكرهن
بنات السادة فرّن والشمر طشّر خدرهن
وجّت بالخيم ناره او على شاطي كمرهن
اومثل ركضة طريده ركضن او يفجع أمرهن
نسوة علي... بلايه ولي ... او يمشن كتر شام
سوط الشمر... خوف الخدر... نيران الاخيام
كلها بدليل الصادق اجروح
.
.
فاضل عباس الخزاعي
