يا ابا عبد الله .. اناديلك بلسان ذنوب الذنب هيمن على جهلي وهفت جمر الوصال وتيّهت الدروب وحِدَه بيه الهوى واتغافلت نسماتك البيّه وادريبهْ هوى الدنيا بلا رايتك حبل اعدام لكن آنه ابن آدم والشيطان وازاني مع الأيام الزمن عابر والبي خير هسه يزرع لباچر يزرع (يا حُسين) وينحصد ناصر يا مولاي گصّر عمري لو يزداد تقصيري  رحت زايد وبس لطفك يرجّعني اعذرني اذا يستفحل الوهواس اعذرني اعذرني على اللي راح ألْيَل وجهي خل يشرق مثل جونك وبصخام الجدر بيّضه يا مصباح يهاديني وشجم دوب اخلّصها الك اعذار غبت عنّك ورديت بفشل حرّين وعذري وياي وانت والد الأحرار مو حيّال گلبي لكن تسامحني يعرف بيك الغِلط وياك خل يگظي العمر يبچيك اضل ابچيك واحس حتى الدمع يحتار المن ينزل وصارن عليه اكثار ! جزاتك بيش ؟ اختصرت السالفة بطفّك وإحسانك غزه الأكوان اعترف غلطان براقش ما جنت نفسي وعلى نفسك كتبت الرحمة للنفسي رضاتك بيش ؟ يمرثي الجآن عبراتي صدى المقتل قتلها بس نوت ترثيك احير ارثيك ابعثلك ندم حاير بلسان الخادم النادم المو شاعر الما يعرف وزن روحه وبحر حبك وتدري بالحچي قاصر ميوصّل بُعد الاحساس يرب احساسي وادموعي ربّيني على دربك واشريني عبد بعيوبي واصلحني ودلّيني على حزنك وفهّمني اله لذّه الوجع منّك اليحب يتعوّد اعلى الضيم اي يَحسين اناديلك شكُر مو حاجه واطلبها اناديلك نعي والروح اقربّها اقربّها بألم يندل لذيذة النشغة لو باسمك ولا تنمل يما تنمل رغم اسمك يلوّعني رغم عينك البصورة تدمّعني اناديلك نبع وعيون حياة الماي وحلات الماي بين الحاء بين النون اناديلك نداء ادموع وحروفك تطهّرني اشوّه فطرتي والگاك تسترني خجل بيه الك ماله نهاية وحد يبعد امي عزيزة جروحك بروحي ولا تبرد جروحك غير يل فاديلي عبد الله يل محّد يشبهك بس رُسُل الله جمالك غير مو بس ايده تتگطّع يگطّع روحه ليشاهد رمش عينك لحد ما تعمه سچّينه جلالك غير خيامك طاحن ورفعن منايرنا يبو سكينه اشوفك عايش بنفسي حزن للموت واذا ما يحتوي ذكرك نشاز الصوت محطاتك سفر للـ آه للحگ، للضوه، للدين ثورتك دين وجسر لِله وتربتك تخرق السبعة يَسرِّ الله وتحت گبْتك بريد الله اناديلك يَمن طاريك عنواني يَمن بس انتَ تستاهل اناديلك لان سويتني انسان وبشر ثاني خَذت منّي ظلامي ونفحة من نورك حِيَت افكاري واستهدفت وجداني شَد اعيوني شيطاني وبله تْلمّس اندليتك جبال الوهم غرتني وعزائك من يطگني الروج يفزعلي سفينة نوح انه اشتالك ومطر حبك ينث رحمة اعله گاع الروح يل مذبوح يل ذابحلي شيطاني اناديلك گبر ويريد حفنة نور اناديلك نداء التايه المكسور واستشعر غربتك، ضعنك المكسور عفت وادم دربها الطيش لعيونك انظرني .. شوكت احظه مثل شاعركم المنظور و واعيتك توعيني جرح منحور اناديلك وطن لاهل السمه ابلا سور ينور النور يثار النور مصابك غالي عند الرب لذا فاتحتك ابعرشه وكل عاشور الك تُنصب نحب نبچيك نحن نبچيك اليُرى والما يُرى يبچيك يمن تبچيك حتى النار اضل ابچيك واهيجن ثار واناديلك دخيلك يا ريحانة علي والزهرة والمختار الاثنين 6 شهر رمضان 1444 هـ #الخادم_علي_خيري_العبادي https://t.center/AliAliAlabady