#تراث گعدية
وجدان هذا العـالم وتكوينه
للخمسه والخمسه وجود العالم
والعالم إلها وبيها
ــــــــــــــــــــــــــــــــــــــ
هاي منظومه ومعاني الخمسه بيها إتوصفت
أبجد الحرفي وحسابي وبالرموز إتنظمت
إهنا يهالمستمع إصغي إلهالمعاني لو بدت
وحروف أبجد لو ردت تحسبها
إبضمن ألأبيات ألآتيه تسمعها
بس فكرتك صفيها
ــــــــــــــــــــــــــــــــــــــ
(الميم) منه بدت رحمه وعله المخلوگ إشملت
(الح) حياة إنتجت منه وروح ألإسلام أنشأت
إبثاني(ميم) إمياه قدره (الدال) دوحتها روت
هاي الحروف ألأربعه المذكوره
الميم ح والميم دال إخبطها
وإنته إتعرف صافيها
ــــــــــــــــــــــــــــــــــــــ
ألـ(ع) عالكفار صارت سيف بالروس إحصدت
ألـ(ل) للباب إقلعتها وأفنت الما وحدّت
ألـ(ي) يد ألله وعله يدّ المشركين إمن إعتلت
بالقلم يا راعـي القلم من تجمع
حروف الثلاثه وتفتح وتكسرها
يظهر إسم راعيها
ــــــــــــــــــــــــــــــــــــــ
(الفاء) فاطم من تمسك بالولايه من النار
(الط) طريق الجنه واضح سمح للإسلام صار
(الميم) منها إهدعش چوچب زهت بالعالم أنوار
بهاي الحـروف العبقريه تظهر
صدّيقة الطاهره ومن التكوين
رب العلى إمسميها
ــــــــــــــــــــــــــــــــــــــ
(الح) حلم وإحسان صار ومنه الكون إنشحن
(السين) سن الكرم سنّه وشعّت إبعين السنن
(النون) نعمه وفاز بيها إللي تمسّك بالحسن
هاي الحروف الحسنه من تحسنها
إبفن القراءه وبفضل راعيها
نور الحسن جاليها
ــــــــــــــــــــــــــــــــــــــ
ألـ (ح) وحّد فروع ألأحكام وشيّد أركان ألأصول
ألـ (س) سد خلة املّه اللي بدت عگب الرسول
ألـ (ي) يقين (النون) نور الهده الساطع ما يزول
بأربـع حروف إتركبّت هالمعنه
أولها (ح) و(السين) و (اليا) تتبع
و (بالنون) إخذ تاليها
ــــــــــــــــــــــــــــــــــــــ
أنشأ المعبود خمسه وجعل بيهن هالصفات
(ميم ح) و (الميم دال) أنشأ محمد للنجاة
و(ع ل ) و (ي) جمعها علي وللمشرچ ممات
بحساب أبجد لو ردت تحسبها
ميتين وإثنين الثنين إتساوي
والفاكره إتساويها
ــــــــــــــــــــــــــــــــــــــ
وأنشأ الدوحه النور النبع من عدها النمه
وفازت الشيعه إبثمرها وأزهت ألأرض وسمه
(فاء) (ط) و (الميم) (هـ) بالاجمع صارت فاطمه
بالخمسه وثلاثين ضيف الميّه
وهاي ألأعداد إرموز إسم الزهره
إبفنّ العلم تلگيها
ــــــــــــــــــــــــــــــــــــــ
وأنشأ ألأنشأ الجود وفيّض الكون إبكرم
ورضع من ثدي ألإحسان ومن ثدي العصمه إنفطم
(ح) و (س) و (ن) إسم الحسن بالعالم علم
عالميّه ضيف إثمنطعش وإجمعها
إسم الحسن ينحصي إبهاي ألأعداد
والمطّلع يحصيها
ــــــــــــــــــــــــــــــــــــــ
وأنشأ (العلمك)فضله شمل الجن والبشر
وأحيه دوحة دين جدّه المصطفه إبدم النحر
(ح) و(س) و(ي) و(ن) توضّحه مثل الگمر
وثمانيـه وعشرين فوگ الميّه
حروف إسم الحسين إبقلم كسّرها
والقلم ما يخفيها
الشاعر المرحوم الشيخ
كاظم المنظور الكربلائي
(327)
#اللهم_عجل_لوليك_الفرج
