#أليِفُ_الرُّوح💚 " منْ يُحبك لا منْ تُحِب " عزيزي .. فعلياً كدا لابد تفهم أنو الشخص اللي أنت بتحبه ما علي طول ببادلك نفس الإحساس وما بالضرورة يكون بحبك في النهاية المشاعر ما فرض . عادي يكون عايش معاك قصة حب تحس نفسك لقيت الشخص المناسب وتفضل طائر بيهو السماء وفجأة بدون مقدمات تلاقي نفسك خبطت الأرض. ما عشان أنت مقصر تجاهو بس علشان في الحقيقة ما بتهمو مشاعرك زي ما كنت شايف ويمكن وجودك بالنسبة ليهو كان مؤقت. فلما لقي الفرصة المناسبة ليهو قرر ينسحب منك بدون مقدمات وبدون ما يختك في الصورة ويوضح ليك الأسباب. عشان كدا خاف من البتحبو أنت أكتر من البحبك لانو البحبك بكون خاتيك في عيونو وخايف عليك شديد. وبتلاقيهو داسي ليك كمية من الحب ما عادية ولطيف تجاهك شديد . البحبك أكيد ما حيفكر في يوم يأذي مشاعرك أو حتي يكسرك بي تصرفاته بل العكس تلقاهو دائماً جاري عليك. وأنت المسكين جاري علي غيرو وما حتقدر تشوف قدر شنو الشخص دا بحبك غير لما تلقاهو في مواقفك الصعبة. لما تنكسر من الحبيتو حتلاقي البحبك بحاول يواسيك ويداوي جروحك ويقيف معاك. وقد يحاول يطلعك من جو الحزن العايش فيهو ويتقرب منك كمحاولة لي إظهار حبو ليك ساعتها أنت ما حتقدر تفهم الحاجة دي. لانك مكسور وما قادر تبني علاقة جديدة ولما تلاقيهو بلح عليك وببادر يخلق علاقة جديدة معاك . حتحاول تاخد خطوة تجاهو عسي ولعل تقدر تنسا بيها علاقتك اللي فاتت رغم انك ما قادر تحبو بس هو ما بمل ولا بكل من مشاعرو تجاهك. وبفضل بحاول يسعدك بس أنت ولا علي بالك ومشغول في ذكريات القديمة مع فلان اللي سابك وبتضيع لحظات حلوة مع شخص قادر يعوضك عن الفات. بس بعد فترة حتلاقي إصرارو تجاه أنك تتعافي أكبر من أصرارك علي أنك تفضل زعلان علي ماضيك. وساعتها حتكتشف قدر شنو وأنت في عز الخسارة كسبتا محبة شخص بحبك بالجد وما بتتعوض. وحيفضل ماسك يدك لحدي ما تتعافي وترجع من جديد وساعتها حتقدر تشوف الحب العندو تجاهك. وتنسي اللي حبيتو وترجع تحب البحبك ولحظتها حتكون عايش في سعادة كبيرة شديد. علشان كدا ما تأمن البتحبو علي قدر البحبك لانو ما كل البتحبو بحبك وما كل البتكرهو بكرهك . #مُر_حُبًّاً🌻 #سمرية