-زي ما توقعت، الساوندس اللي على الجهاز متركبة بطريقة معينة مع الوقت بتضعف خلايا المخ وتخليها عاجزة عن العمل بشكلها الطبيعي، ويمكن اللي سرع الموضوع عند نورهان أختك، هي العملية اللي كانت عاملاها قبل استعمال الجهاز. قفلت الشات وكلمت عمي وحكيتله كل اللي حصل... -وبعد كل اللي عرفته.. ناوي ترجع تاني يا ادهم؟ -أنا عايز أجيب حق أختي وغيرها، انا مستحيل اسيبهم، لازم أكشفهم للناس كلها. -وتفتكر انك هتقدر تقف في وش شركة زي دي؟ -لا، عشان كده نويت اني مسافرش وأفضحهم على السوشال ميديا، ولو الموضوع ده خد حده واتسلط عليه الضوء ياعمي والناس اتكلمت فيه، هيعرفوا اننا مش فيران تجارب للقرف اللي بيعملوه ده. -بس ده هيبقى فيه خطر عليك لأنك بتقول انها شركة كبيرة وواصلة. -نفسي عندي مش هتبقى أغلي من اللي خسرتهم يا عمي. -زمان انا ماعرفتش أكسر كلام أبويا وأدي أبوك نصيبه، كان عاوزنا نبقوا عزوة ومانتفرقش أبدا، عشان كده رفضت أديله ورثه، بس دلوقتي، سيبني أكفر عن اللي عملته مع ابوك وتعالى وسطنا واعمل اللي انت عاوزه، وماتخافش، أنا هحاول احميك على قد ما اقدر. - بس أنا مش عاوز حد يتأذي تاني بسببي. -بلاش الكلام الاهبل ده.. احنا عيلتك. -ماشي يا عمي.. ربنا مايحرمنيش منك أبدا. في الحقيقة أنا اترددت كتير قبل ما احكي اللي حصل، مش خوف منهم، لا، خوف ان غيري يعرف ومايهتمش، او اني اضحي بحياتي عشان انقذك وانت ماتقدرش، أرجوك وانت بتسمع القصة دي ركز فيها اووي.. يا عالم أنا هكون فين ساعتها، بس أتمني انك تقدَّر ان احتمال كبير يجرالي حاجة عشان كشفت حقيقتهم قدامك، أنا كل اللي هاممني انك انت وغيرك ما تبقوش فيران تجارب لأي حد.. أي حد فاكر إنه جنس أعلى مننا وإننا فيران وحياتنا مالهاش تمن. تمت.. صندوق_أمريكاني @stories_adjective