قصيده بعنوان (مرارة الفراق)
᪥᪥᪥᪥᪣᪥᪥᪥᪥᪣᪥᪥᪥᪥
عباس خويه شلونك مشتاكه اشوف اعيونك
مافاركيتك عباس. يامن عمت عين الناس
الي خذوني بدونك. مشتاكه اشوف عيونك
᪥᪥᪥᪥᪣᪥᪥᪥᪥᪣᪥᪥᪥᪥
يامن عمت عين الوكت منك انه حرماني
مافاركيتك فد يوم كبرتك بأحضاني
حن الكلب خويه ليك ياهيبتي وعنواني
كم لليله ضلمه بلياك ماعودتني الفرگاك
ياكمر ضاوي بكونك. مشتاركه اشوف عيونك
᪥᪥᪥᪥᪣᪥᪥᪥᪥᪣᪥᪥᪥᪥
يوم الغبت ضلمه اصبحت يانور اليضويلي
واشتاك الك مثل الهوه وانته الصباح بلليلي
ماصدكت عني غبت ردتك سند يكفيلي
تمنيت حاضر وتشوف. انته الامان من الخوف
ياهيبتي يشوفونك. عباس خويه شلونك
᪥᪥᪥᪥᪣᪥᪥᪥᪥᪣᪥᪥᪥᪥
كل موقف الصار اوياي ياكافلي ذكريتك
تحضر يعباس هناك يم اختك اتمنيتك
كل مايطگ متني السوط ياباالفضل ندبيتك
وينك يكافل ونخاك انه ادري طاحت يمناك
والعطش غير لونك. عباس خويه شلونك
᪥᪥᪥᪥᪣᪥᪥᪥᪥᪣᪥᪥᪥᪥
يبطيحتك طاح الخدر انته العميت عيوني
من بعدك وصاحوا سبي ومجتفه ودوني
لو اشوفك بهذا الوكت ياخويه متعرفوني
من ظيم كلبي والقهر والهظم غير لوني
تدري يبو فاضل هاي. اعظم مصيبه بدنياي
والاصعب بمضمونك. مشتاكه اشوف عيونك
᪥᪥᪥᪥᪣᪥᪥᪥᪥᪣᪥᪥᪥᪥
كل مااحن الملكاك تزيد بدليلي العصره
يكتل يكافل فركاك وليمته اجرع مره
كلبي عجز منه الصبر جم دوب ارجع صبره
لمصيبتك عميه العين عليك انكسر ظهرحسين
يالبلوغه يريدونك. مشتاكه اشوف عيونك
᪥᪥᪥᪥᪣᪥᪥᪥᪥᪣᪥᪥᪥᪥
/صفر/١٤٤٤
تمت بعون الله تعالى
بقلم ام زين العابدين
https://t.center/woundfg