زينب وهلال محرم
ذكرتني ياهلال بالمعزّه وبالدلال
صعبه فرگتهم اخوتي صعبه فرگتهم
يامحنّتهم اخوتي يامحنّتهم
ــــــــــــــــــــــــــــــــــــــ
ياشهر حزني آنه اشوفنك كل سنه ابصوره
مره فوگ التل وبالحبل مره آنه مجروره
چان فيّ الرايه فوگي چنه ديوان الحسن
احسين يمي وابوفاضل چان حارس عالظعن
هسه من اسياط اميه امتون زينب ورمن
چان عبدالله بضحكته يترس الدنيه ضوه
وچان يخجل من عباتي مايحركهه الهوه
هسه تعبانه واريدن واحد ايگلي الگوه
واليقدرون الحجاب نامو بوسط التراب
حلوه لـمّتهم اخوتي حلوه لـمّتهم
يامحنّتهم اخوتي يامحنّتهم
ــــــــــــــــــــــــــــــــــــــ
راحو اخواني كلهم من ايدي ابلچمة العاشر
كون افز والگه دمهم اليجري بالحلم صاير
وترجع ايامي القديمه وماكو خيل ولا ذبح
الليل امسحه من وجودي وارسم بعيني صبح
راسي شيّب يوم شالو راس الاحسين برمح
الحادي مراني اعله جسمه جنه خيمه ومحترگ
گتله احلفك هذا ياهو الـميت احچيلي الصدگ
گلي هذا احسين اخيچ بالحوافر ينسحگ
يامحرم مانسيت وبقضاء الله رضيت
بيضه نيتهم اخوتي بيضه نيتهم
يامحنّتهم اخوتي يامحنّتهم
ــــــــــــــــــــــــــــــــــــــ
ياهلال أنظر طولك المحني هم مثل طولي
اشما بچت عيني اهلي واحبابي مايرجعولي
ابهيئة الراكع اشوفك يعني صوره أمن الحزن
وانه گضيت الليالي لازمه اصفاحي واون
ومره قوس اتصير اشوفك تذبح اگماط وحضن
مره اشوفك خيمه توگع مره اشوفك گنطره
بيهه دم هامة كفيلي والچفوف امبتره
آنه اول وحده أدفن ذكرياتي بمگبره
زينب وطگني الزمان طگة ابنادم جبان
كلفه غيبتهم اخوتي كلفه غيبتهم
يامحنّتهم اخوتي يامحنّتهم
ــــــــــــــــــــــــــــــــــــــ
گبل ماتطلع آنه يهلالي ابدي الاقرايه
وكل بني هاشم تلبس الاسود وآنه ملايه
من شهر ذي الحجه تبدي ادموع عالراحو تهل
دنيه ماترضالي افرح فرقت مني الشمل
چان چف حيدر بچفي وهسو شدوني بحبل
آنه علويه واهلنه ساده بيهم ينحلف
الشام لا آني الاحبهه ولا الي اوياهه عرف
وطبت السوگ الچبيره هاي ابد ماتنوصف
وروس اخوتي عالرماح ذاكه مال وهذا طاح
مُره بلوتهم اخوتي مُره بلوتهم
يامحنّتهم اخوتي يامحنّتهم
ــــــــــــــــــــــــــــــــــــــ
بهالشهر كلمن رايد الخدمه آنه اشد حيله
واللي يتمنه يقصد الگبري ازياره اهديله
آنه اخت باب الحوائج يمي كلهن ينگظن
الخادم الينصبله موكب رايه أعلگه بالصحن
العين من تبجي اعتبرهه غيمه تمطر عالضعن
احسين يستاهل تعبكم يالتعبتو بخدمته
انتو ماشفتو الحوافر من اجت يم جثته
للخيم گامت تجره ووشلت دم رگبته
وانه عالتل واصيح ياهو منكم مو ذبيح
وين فزعتهم اخوتي وين فزعتهم
يامحنّتهم اخوتي يامحنّتهم
محمد الجماسي
#اللهم_عجل_لوليك_الفرج