انبهار البدايات بروح ، الجهد عشان نكون في عيون بعض حلوين بختفي .. التكلف الفظيع عشان نظهر احلى ما فينا لبعض بتلاشى .. بنصحى نعاين في وشوش بعض من دون حتى نغسلها .. بنقابل بعض بنفس الملابس بتاعه امس او ممكن بتاعه اول امس من دون نتحسس .. بنتشارك في نفس الغطاء ، نفس الكبايه ونفس المعلقه .. بنشوف بعض في كل الحالات الشكليه ، العمرنا ما فكرنا نطلع من البيت ونحن فيها ويشوفنا غريب ، بس هسي راضيين كل الرضا يشوفنا اكتر زول اجتهدنا ما يشوفنا الا في اروع حالاتنا .. بنختلف شديد .. بنبقى مجردين من كل شي ، ما زي ما ولدتنا امهاتنا لالا زي ما نحن بالضبط بحقيقتنا ، زي نحن لما نكون مع روحنا برانا .. صافيين ، واضحيين ، حقيقيين ، في قمة سلامنا الداخلي واستسلامنا الخارجي .. بتتحول مشاعرنا من حب واعجاب وشهوه حسيه ل احاسيس ربانيه ربنا وهبها بس للبينهم معجزة الارتباط السماوي ..❤️ موده و رحمه .. ❤️ ف نتمهل شويه ونحن بنختار المستعدين نكون قدامو بكل التجرد الحسي والشكلي .. ناخد وقتنا كافي ونحن بنحسبها من كل المقاييس ال ما خطرت على بالنا .. نتمعن في اختيار ال ح نشاركه الموده والرحمه .. ❤️