خبرمازندران 🇮🇷🇮🇷

#شعر_چی_هسه

بَنویشت: #داوود_کیاقاسمی


شعرِ وِسّه خله تعریف بیاردنه؛ مِثلَن بَوتِنه شعر دَسکاریِ خلاقانه هسه زوونِ نحوِ دله؛ یعنه، زوونِ هنجارِ معمول ره بشکِنّیِن... یا بوتنه شعر اتا محاکات* هسه کا شاعر شِه دلِ جا کِنّه... یا بوتنه شعر مکاشفه هسه؛ یعنه اون لحظاتی ره کا دیگِرون نتونسنه دربَوِرن، اَتّا شاعر کشف کِنّه. #مهدی_اخوان_ثالث گنه: "شعر محصول بی‌تابی انسان در لحظاتی‌ست که در معرض وزشِ #شعور_نبوت قرار دارد."

مِه نظر، شعر لحظاتِ ناب و تجربه نَئی ره کشف و بیان هاکردن هسه. اِسا چیِ جا؟ بشکنیِنِ نحوِ معمولِ زِوونِ جا و اتا دِرِسّه ساختارِ جا. پس خالی کشف هاکردن وَس نییه. زِوون و ساختارئ مهم هسه؛ یعنه چتی و کِدیم ساختارِ دله اونتا شاعرونه کشف، بییه بیان بَوِه تا مخاطبِ دله اثِر بِلّه.

اسا، شعر حُکمَن ونه وزن و قافیه داره؟ یعنه هرچی وزن و قافیه داره شعر هسه؟ مِثلَن اینتا "نَمّه فارسی نَخشه، ته شه زِوون ره یاد نکن.../ مِرسی مِرسی بَئوتی، خنابدون ره یاد نکن" شعر هسه چون وزن و قافیه دارنه؟ نا... شعر تونّه وزن و قافیه داره یا وزن و قافیه ی دس آزاد بوئه؛ یعنه وزن و قافیه، شعرِ ذاتِ دله دنییه. الان گِلِکی و تبریِ #اساشعر یا فارسیِ #اسپه_شعر، ایان وزن و قافیه ندارننه کا، ولی شعر هسنه. اِتی هم نییه کا هرچی وزن و قافیه داره، شعر بوئه. بَلکوم "نظم" بوئه. یا اِتی نییه کا هرچی آزاد بوئه و اَتی احساس هم ونه دله دَوِه، شعر بوئه. بَلکوم "قطعه ادبی" بوئه. شعر شِسّه تعریف دارنه، معیار دارنه.

اسا بَشِنه بَوتِن اونتا "نَمّه فارسی نخشه، ته شه زوون ره یاد نکِن..." شعر نییه. اتا گب هسه، اَتا گب کا وزن و قافیه ی جا بَزه بَیه. ایان ره گننه "نظم"، نا شعر. البته اینتا کارِ دسوری خَله بنویشتنه و خَله بشنوسمی. فقط من اَتا مثال بزومه. احترام هم اِلّمه اونتا جانه برار ره کا اینتا کار ره زحمت بکشیه بوته. اِما درمی اثِر ره نقد کمّی؛ صاحاب اثِرِ خدمِت جسارت نَکِمی... اِما مازرونِ دله نقد شعر دَکِّل ندارمی. دیِ جا تعارف دارمی و ترسِمی امه جا نارات بَوِّن. همینتای وِسّه امِه شعر خَله رشد نکِرده!

#داوود_کیاقاسمی

* محاکات: حکایت کردن

🆔 @Mazand_Culture

🎧 به فایل صوتی زیر گوش کنید!👇👇
https://t.me/attach_kh/56