خبرمازندران 🇮🇷🇮🇷

#تبری_شعر


بخش اول- #خجالتی

شعر و دکلمه: #داوود_کیاقاسمی


بینجِ غوشه سر ره اَی جِر اینگوئه
پیشِ بینجِکَر خجالِت کَشِنه
ونه اِرزِش دیگه کالِ کِنِسِ بَن بَهیا تا بِتونه جان بَهیره
هر کس و ناکسِ مِنِّت کَشِنه!

اَتّا روز وِ قیمِتِ جان بییه و خِداوری شِه جان بییه
اون گِدِر بینجِکَرِسه خَله ناز کِرده و ناز داشته که کِرده
لِه شییه زمینِ سر، پاییزِ مای وارشِ جا شه دِرِسّی او بییه
اَتی هم شِه دَس دَسی چَکو بییه
ولی اَی هرچی بیبو،
ونه اِرزش آسمونِ لو بییه

اِسا چی بَمونِسه وِنسه جز حسرِت و آهِ اون روزا؟
نا وِره اَتّا آدِم ناز دِنه دَکِّل
نا وِنه واری وِره خرینّه اتّا

هِلا پاکِ سر نَئی، دونه پاکِسّون و هندِسّونِ جا قِطار قِطار سر رَسنه
گِننه اَنگیسِ قایده این دونه پِلا دِنه
بِلا بَنِّه وِره کا پِلا نِدا، بِلا هِدا
گَتِ آغوز هسه اما بی دِله
مگه بَتونه خِدایی امِه طارِم دونه ی بو ره هاده؟
امه خاک و خِنه ی سو ره هاده؟
نا... وِ حتا زرِک و شسِّک و بینامِ کِل اَنگیس نَوونه
آخِدا تیل به مِه سر!
بشکیه دس کا اِتی روز
ناکَسونِ ناکِ بن میس نَوونه!

بینجِ غوشه چِتی سر راس هاکنه میونِ قحطی سال و ماه
مار بَمِرده بینجِکر ره
ونه بِشکسّه کمِر تا گِسِ پَر ره بَوینه؟

چِتی سر راس هاکنه؟
ماه دیگه بینجِکر
شه رشیدِ ریکای شیرنی خواری دارنه و اَی
شِه خارِ کیجای دانشگارَوی
-کیجا دونا وِنه بَوِّه، زِنا بَوِّه
ونه صد هِنِر داره
تا مازرونِ مازیارونِ خِجیرِ نِنا بَوِّه-

چِتی سر راس هاکنه؟
ونه اِرزش اَنِّه نییه تا بِتونه این همه خرجه هاده، این ره شِه دونّه
وِ دیگه خِداوری
مِزّیرونِ مِز و حتّا سم و کودِ خرجه هم هاده نَتونّه

بینجِ غوشه سر ره اَی جِر اینگوئه
تا نَوینه بینحِکر ره، تا خجالِت نکِشه
وِ نِخوانه ونه خَسه تنِ بی خِراک و خو ره بَوینه
ونه قدِ خِشکِ چو ره
ونه دردِ دلِ سَرشَن بئیِ کِلو کِلو ره

وِ شِه دونّه
اگه مخمِل قِوای سبزِ تیمِ جارِسِه نَوِّه،
اگه بوی تیل و نِشتاکِ او و بینجِ کِفر، وقتِ وِجین کارِسه نَوِّه،
اگه رِز رِز خونِشِ بینجِ تاشون، لَیلی جان و طالبای زارِسه نَوِّه،
اگه جینگاسر و ساینه کِل و صِبحونه شیریندارِسه نَوِّه،
همین امروز بینجِکر زمین ره چو زنّه شونه
اَتّا کیمه شِسّه شهرِ گوشه گیرنه
هر صِوی راکَفِنه کوچه خیابون
تا نماشون، گرما و سِرما دله گِج گِجی کِنّه
کوچ کَشی و ساختمون سرِ کارِگِری ره تاب ایارنه

دسِ کم، کارِگِری
بهارِ او قَطی و
پاییزِ وارشی و
چَکو بَیّن و کِنِس بَیّنِ بینجِ غم و دل پِئی ره نارنه
اینجه دل پِئی همین هسه کا شایِد
اتا مَزدا کِله یا سالارِ نیسون بَرسه
همه هور بیارِن و بُورن و کارفرما اسا
گَتِ اربابِ دَسوری
هوِسِ کوه دِماوَن هاکنه، مِز ره دِرِسی
اِسپِنا دسه ی سر بَن هاکنه!

کارگِری هرچی بوئه، بینجِکَری ره خِدا دونّه اَی سَره
اگه سر نَیبو، چه اَنِّه شهرِ دور
کنگِلی کِلی دَسوری
هر کِجه کارِگِرونِ تا دیروز بینجِکَرون کیمه بَزونه؟
اگِه نَیبو، این تِره پِره و پاره پوره ئون
سرِ میدون، خوکَتون
اَی کِدیم لیِ جا بَو در بمونه؟

اره... راس راسی شِه حق دارنه
بینجِ غوشه سر ره اَی جِر اینگِنه
بخواهه خجالِتی او بَوِه بُوره زمین و سر نکشه
یا خِدا خِدا بَوِّه تا اَتا آدِم برِسه
این زمین ره دِرِسّی تخت هاکِنه
وِره شِفتِ پِشمالی و خِلِ کیوی بَزنه
بَلکوم اینجوری دیگه بینجِکرِ بی گِل و گوشت
دِ تا لاقمه نونِ سِّه شهر نشوئه
ونه جانِ گَلی سر، شه دَس دَسی زهر نشوئه

اره جان!
اِتی روز
سر بالا بَیتن و مَس مَسی و هی ناز و کرشمه بَروتن
خِدا دونّه که خِدایی نَشِنه
بینجِ غوشه مازرونِ بینجه جارِ وچوئه
این ره خار دونّه و سر جِر اینگوئه؛
پیشِ بینجِکَر خجالِت کَشنه...


بخش دوم- #مزیر (امیری خوانی)

شعر: #داوود_کیاقاسمی
آواز: #محمود_شریفی
لَله وا: #سید_جمال_محمدی
آلبوم: #آلاله_رو #گروه_نیما #فضل_الله_دهقان

خَسّه خَسّه تن، آسوگ آسوگ دَشونه
دَس پینه دَوِس، بوسّه تِروگ دَشونه
بِشکِسه مِزّیر، بی اَتّا توگ دَشونه
نِماشونِ سر، هایته اَلوگ دَشونه

به فایل صوتی زیر گوش کنید!👇👇

🆔 @Haavest

https://t.me/attach_kh/314