الطريقه الطلعنا بيها من بيوتنا حتفضل جرح جوانا عمرو ما يبرأ .. حنغطغطو .. ونضاريهو ونلفو ونعمل فيها انو شفى وبقى كويس ، لكن مع اول هبشه فيهو بنلقاهو لسه بنزف .. عدت الايام والأسابيع والشهور ، ولسه كل واحد فينا واقف في اليوم الجره فيهو شنطتو وخلى حياتو كلها وراهو ومرق .. ايوه جربنا حياه جديده ، حاولنا نبدأ من تاني ولسه بنحاول .. بنفتش للسعاده في أصغر التفاصيل .. بنصنعها برانا وبنلاوي الدنيا ملاومة عشان نكمل ونضحك ونعيش من تاني .. ماف زول فينا من جوه كويس .. ماف زول فينا مُستقر نفسياً .. ولا في زول فينا نسى الشافو والعاشو والقهر الحسينا بيهو .. طيلة الشهور دي ، كم مره ومره العبره خنقتنا واتضارينا في ركن وفكيناها برانا وبعدها استغفرنا وقلنا " الحمدلله يارب .. ما اعتراض بس اغفر لينا ضعفنا " وقشقنا دموعنا ومرقنا للناس كأنو مافي شئ .. وكم مره انهزمنا وانفعلنا بسبب تافه حيير كل الموجودين .. طيلة الشهور دي فضل جوانا أمل بيزيد وينقص .. مابين راجعين ومابين نعتبر حياتنا الفاتت فصل وانتهى ، ونبدأ فصل جديد .. طيلة الشهور دي واحنا في صراع داخلي عظيم مع نفسنا .. وانو كيف نخليها لسه واقفه وصالبه طولها وتفتش للنور جوه احلك ظلام ، وتلقى المخرج في كل سكة مقفوله .. استسلمنا .. ويئسنا .. رجعنا عافرنا وفقدنا الشغف .. نجحنا وفشلنا .. فرحنا وزعلنا .. بكينا وضحكنا .. ووقعنا كتير شديد ، لكن في كل مره ربنا كان بيدينا القوه عشان نقيف ونعافر ونحاول من تاني .. وبيرزقنا الأسباب عشان نكمل ونواصل .. وبذكرنا كل مره انها ما النهاية .. انو لسه عندنا نصيب حلو .. لسه في ايام حلوه .. لسه في جبر خاطر.. لسه في فرح.. لسه في وصول .. ولسه في تلااااقي .. وانو بإذن الله ماكان اخر وداع .. لا للخرطوم .. لا لشوارعها .. لا لزحمتها .. ولا لتفاصيلها .. ماكان اخر فراق لكل اهلنا الاتشتتو .. اخوانا البقو بعيدين .. حبايبنا الفتناهم من غير وداع .. جيرانا .. وحلتنا .. واصحابنا الكان اخر لقاء لينا بنقول فيهو " يلا ي خوانا لحدي بداية الاسبوع ان شاء الله" .. بس صباح السبت كان شايل لينا تفاصيل تانيه غير اللقاء .. ماحيكون آخر وداع .. #على_الهامش : حتجي عليك لحظات حيخنقك الحنين خنق .. وحتتجمع عليك كل لحظات حياتك القديمه .. حتضعف .. حيتملكك الحزن .. وحتحس بشئ ثقيل قاعد على صدرك .. وقتها خت يدك على قلبك وقول : رضيت يارب .. رضيت في وقت الرضا صعب عليّ شديد .. رضيت رضيت رضيت يارب .. كل الحصل ده قضاء منك .. وكل قضاء من عند الله حبيبي ، هو حبيبي 🤍.. حتهدأ .. وحتطمئن .. ونارك حتبرد .. مالينا الا الرضا والصبر .. وانو نسأل الله يطلعنا من كل المحن دي بالحسنات 🤍.. #ختاماً : ماتضايقوا ولا تندموا عشان طلعتو من بلدكم حفاظاً على ارواحكم .. الرسولَ صلَّى اللَّهُ عليهِ وسلَّمَ كان بحب مكة شديد ، بس وقت زادت عليهو أذية قريش ربنا أمرو بالهجرة .. وهو طالع منها عليه الصلاة والسلام وقف على الحزوَرةِ فقالَ: "واللَّهِ إنَّكِ لخيرُ أرضِ اللَّهِ، وأحبُّ أرضِ اللَّهِ إلى اللَّهِ، ولولا أنِّي أُخرِجتُ منكِ ما خرجتُ " (صحيح الترمذي ). وربنا بعدها بشرو بقوله تعالى : " إِنَّ الَّذِي فَرَضَ عَلَيْكَ الْقُرْآنَ لَرَادُّكَ إِلَىٰ مَعَادٍ ۚ "🤍.. فاللهم ونحن .. ونحن يا الله 🤲🏻.. #ختاماً_تاني : الدعوه الثابته ! " أعادنا الله لمنازلنا وهُون علينا وعلى قُلوبنا وحشة البُعد وغفر لنا وعفى عنا لحظات عدم الصبر والتشاؤم والتجزع وربط على قلوبنا وجعل الأمل فينا حيَّاً باقياً " اللهمّ حنانًا منكَ يلملم شتاتنا ويملأُ فراغَ قلوبِنا 🤍. آمين. قبل نطلع .. كنا بنسأل : متييين تضحك سما الخرطوم حبيبتنا ومتييين تصفا !💔 حالياً بقينا نسأل : متييين تضحك سما السودان ومتييييين تصفا ! اه💔🇸🇩 .وبكرة حانقول متين تصفي سماء الخرطوم ونعود تاني. منقووول