وقایعِ عصرِ عاشورا
و گریز به
#کوچ_از_قتلگاهمرحوم استاد مشهدی علی اصغر ذهنی
قسمتِ اوّل این اشعار ، در فرصتِ مناسب ان شاءالله تایپ خواهد شد.
سعد اوغلی گوردی ختم ایدوب اعمالِ نحسینی
یوز سِیرِ قتلگاهه قویوب الده بیر عصا
شاهِ شهید ئولنلرینون نعشینه باخوب
تفتیش ایدردی کِبریله بی قر و اعتنا
بیر بیر سوال ایدردی کیمون نعشیدور بو نعش؟
ایلردیلر جوابینی سرکرده لر ادا
سویلردیلر امیر بو مسلمدی بو حبیب
نفسِ حسینه نفس لرین ایتدیلر وِقا
بو غُرّه بو هلال بو عابسدی بو بُرِیر
اصحابی گچدی بیر به بیر اول دشمنِ ولا
اجسادِ آلِ هاشمه یتدی سالوب نظر
گوردی عجب دوشوبله جوانانِ مه لقا
آندیردیلار بو عون ، بو جعفر ، بو فضلدور
امّ البنیندن اولان اولادِ مرتضی'
بو خارِ تیرِ ظلمیله پامال اولان بدن
قاسمدی ، یعنی نوگلِ گلزارِ مجتبی'
کسگین قلجلاریله بو صدپاره دوغرانان -
اعضا ، حسینون اکبریدور شبهِ مصطفی'
یتدی حسین نعشینه باخدی بوله بوله
ایما ایدوب عصائیله اول زادهء زنا
صاق و صولوندا باخدی سرانِ سپاهینه
کیمدور دئدی دیون بو ذبیحا" مِن القَفا
آیا بو پاره پاره او شهدور که جبرئیل
لای لای دیردی خدمتین ایلردی دائما؟
ابنه زیاد خاطرینه من گورون نجه
سالدیم بو محترم بدنی خاک و خون آرا
بیر آز شماتت ایلیوب ال آچدی غارته
از بس هوای ری باشین ایتموشدی بدهوا
دعوانین اوّلینده که اوخ آتدوقی کیمی
پیغمبر اوغلونون گییمین سویدی ابتدا
اوندانصورا توکولدوله بی رحم کوفیان
سلب ایتدیلر عمامه ، ردا ، سویدولار قبا
باتموشدی قانه باشدان ایاقه لباسلر
ضَمّ ایلمیشدی بیر بیرینه گرمی هوا
بولمم نه نوع سویدولا ، فکر ایلین بولر
ال هر لباسه ووردولا جوش ایلدی دِما
عالَمده هر غریب ئوله تا دفن اولونمیوب
حرمت قویوب چکلّه اونون اوستونه عبا
صاحب ولا جنازه سینی اوچ گون اوچ گجه
گون اوزره قویدولار نه لباس و نه بیر ردا
جُردالخُیول مسئله سین عرض ایدنمرم
شرم ایلورم اگر چه او قوم ایتمدی حیا
ایکاش ایدیدیلر بیر بیله ظلمه اکتفا
آلِ پیمبر اوزگه ستم گورمییدی تا
تاراج ایدور تحمّل ، غارت قضیّه سی
اود قلبِ ماسوایه ووروب اودلانان خبا
فریاد او ساعتیکه مصیبت قطارینی
دوندردی قتلگاهه عدو وامصیبتا
عورت اوشاق سالوب اوزینی ناقه دن یره
گویا که محشر اولدی یتوب عرشه آه و وا
قان ایچره تاپدی هر باجی قارداش جنازه سین
آغوشه چکدی جان تک اوغول نعشینی آنا
اوخشاردی بیر ترانه ده هر بلبل اوز گُلین
اولدی او عشق گلشنی بیر تعزیت سرا
زخمیله سینه لرده آچان گللّر اوستونه
قطره به قطره شبنمیدی اشکِ دُر نما
زینبده یغدی باشینه باشسیز حرملری
شاهِ شهیده ایلیه لر بلکه بیر بُکا
شمر الده قمچی دلده شقاوت ، عناده باخ
ایلردی شیون ایلینی ظلمیلن اِبا
مظلومه زینبه نه جفا ایتدی بولمورم
غشّ ایلدی او نائبهء خیرة النّساء
سالدی اوزون رقیّه آتا نعشی اوستونه
دردِ دله دل آچدی سرشگی آخا آخا
عرض ایلدی بابا سنی بو حاله کیم سالوب؟
آلدی منیم الیمدن ایا میرِ مقتدا
سِنّیم صغیر اکن آتاسیز قویدولار منی
قالدیم یتیم دهرده من زار و بینوا
سنسیز جهاندا دالدالانوم کیملره بابا؟
کیم یاندورار چراغیمی ای نیّرِ هدا؟
تاراج ایدوب جلالیمزی سویدولار بیزی
یغمایه گیتدی اَلبسه و زیبِ پُربها
خلخال و دستبندیم اولوب رشتهء ستم
مرجانی قانلی گوز یاشی ، رنگیمدی کهربا
ایوای منه بیر عمّه مه ایله نظاره گور
قمچی نه نوعی قولّارینی ایلیوب قرا
مرهم قویار یارالارینا کیم او بی کسین؟
کیملر حمایت ایلر اونا ظلم ایلینده یا
باخ اوز یانوندا شمر نجه ظلم ایدور بیزه
غیظه گلور آجیقلانور ایتدوقجا التجا
اولسون بابا گوزوندن ایراق بو گچن گجه
اولموشدی ایستی قوم باشیم آلتیندا متّکا
هر چند چوخ یورولموشدوم خسته جانیدیم
اما بیر آن یوخی گوزومه اولموب آشنا
اودلار قلیجلار آرتوقی ، بیر خیمه قوردولار
نه خیمه؟ تنگ دل کیمی چوخ تنگ و غم فزا
بیر آشیانه سی داغیلان قوش تک عترتون
سر زیرِ پَر او خیمه ده تاپموشدی انزوا
ظاهرده ماهتابیدی باطنده تاریدی
از بس فشارِ محنتیله تنگیدی فضا
توپراق فراشی ، شمعِ شبستانی آهیدی
شربت سرشگِ دیدهء تر ، خونِ دل غذا
دوتدوق اگر چه شامِ غریبان ئولن لره
اما سرشگ ظاهریدی ، ناله لر خِفا
اهلِ حرم یواش یواش آغلاردی قورخودان
قمچی گلوردی اوجالانان وقتیده صدا
بیر تیره شامی صبحه یتوردوق ، ولی نه صبح
گویا او شام صبحیدی ، بو صبح دور مسا
شام ایلیوب گونی غم عزمِ دیارِ شام
شهرِ دمشق گور هارا آلِ علی هارا؟
عاری خطب ، کجاوه سینق ، ناقه تندرو
گور بیر نه ذلّتیله سالوللار بیزی یولا
آیریلمارام ئولونجه بو باشیز جنازه دن
اوز باشیمه اگر منی شمرِ لعین قویا.
این قطعه شعرِ نوحه ، تخلص ندارد.
التماس دعای فرج