حسبي الله ونعم الوكيل . الحمد لله انه فيه رب فِ الوجود ياخذ حقك من كل شخص سواء اذاك بسوء او برضو كان تكلم عليك بسوء لأشخاص اخرين،بـِ كلام مش موجود فيك ، او استغل نقطة ضعف معينة فِ شيء لصالحة ، وكل هالأشياء مش ح تفوت عليهم بسلام لان ربي ح يرده فيهم اضعاف مضاعفة عليهم سواء توا او بعدين ، ح يمروا بكل شيء داروه لغيرهم ،حتى لو بكلمة سوء .
حَرفيا اهم شيء فِ شخص يكون مقدر نفسه ويحبها و عاطيها حقها ومهتم بيها ،لان هادم اقل شيء لـِ تقدر تقدمة لـِ نفسك ،مش حتى الناس تكون حاطاتك فِ عين الاعتبار وتعاملك نفس ما تعامل فنفسك ،لان كان أنت ما طبقت هادم ما تستناش من غيرك شيء إتجاهك .
حرفيًا أنا ما يناسبني البُخل بالمشاعر وغيره ،أنا بطبيعتي إنسانه فياضه ،حسّاسه نستاهل المحبّه الكبيرة والمودة لـِ تخلي قلبي ديما مرتاح ،بعيدة كل البعد ع توثر وحتى شكوك ، وكان شفت اي حاجة "تنهك من روحي" حتى ولو بأبسط الأشياء ح نستثنيك من حياتي كُلها ،سلامي النفسي و الداخلي قبل كل شيء .
- اكتشفت انه الحياه عبارة عن مقاومة من جميع النواحي سواء نفسيتك عائلتك ضروفك دراستك طموحك الي مرات مش قادر تحققه ! الكلام لي تسمعه ويوجع خاطرك تبي جهد تتجنبه ضروفك الصعبة تبي جهد باش تتحملها فراقك ب الناس لي روحك فيها تبي جهد باش تتأقلم دراستك طموحك تبي جهد باش تنجح كل شي صعب وب الثقة ف الله كل شيء يسهل عليك وعلي كثر ايمانك بـ الله حتتحمل .
- فِ مرحلة تواجهنا فِ حياتنا هي حُب النفس ،انك تقتنع بإن مفيش شي يستاهل تضايق ع خاطره ،انك تحب روحك وتخَلي راحتك اهم من اي حاجه،انك تنسى الماضي ومتتأثرش فِ غياب حد ،تُوصل لمرحلة تبعد عن اي علاقة انت عارف انها حَ اضرك وتكسر قلبك .
- حالة الرّضا التامه مش حتوصللها بِكثره او قلّة الحاجات فِ حياتك، بالعكِس حتحِس بيها لما تعرِف قِيمة النّعم الموجُوده فِ حياتك فَ تِحمد ربك وتفهِم كيف انت محظوظ لأنه انكتبلِك عمر جديد تصلِح والا تتعلّم اي شيئ جدِيد فِ حياتك . الرّضا تتمَلكَه لما كل نعمه فِ حياتك صغيره او كبِيره انت تقدّرها من كل قلبك .
- لما يبدا ودك متردد ، متودش ! تصنع الود اصعب من الايذاء تعدد لوجوه ، كلمات تجرح ، استهزاء ، طعن ، تشكيك ، كذب ، عدوانيه ، تبلي ، لف ودوران ، استغفال الناس ، الاستغلال ، رمي المحصنات ، الكلام في اعراض الناس ، الكلام في خلقة ربي كلها من صفات اسواء البشر جدد النيه مع الله وقول " اللهم اني اعوذ بك من شر نفسي " لانه النفس اكثر شي يأمر ب السوء .
