منیم سندن صورا بو مملکتده شهریاریم یوخ
سنه گوز تیکمیشم، خلقِ جهاندان انتظاریم یوخ
غلام اربابینه گوهر نثار ایلر،گذشت ایله...
گوزوم یاشیندان اوزگه الده دُر شاهواریم یوخ
سنه زایر اولان گونلر،خزان ایچره بهاریم وار
دوشنده سندن آیری،ایلده بیر گون ده بهاریم یوخ
نئجه عرض ایلییم مولا،ضمانت ایله آهو تک
او حالدا که گورچینلر یانیندا اعتباریم یوخ
عجب میخانه دور صحن و رواقین مهربان ساقی
حرم عطرین آلاندا گورموشم رنجِ خماریم یوخ
سینیق قلبیله هر ایل آغلادیم باب الجوادینده
قییتدیم شهریمه گوردوم که حال انکساریم یوخ
آدین ائوده گلن ساعت،آنام آغلار دییَر اوغلوم...
منی ده کاش آقام ایستردی،قلبیمده قراریم یوخ
آقا گلزاریوین هجرینده بلبل تک آلیشدیرما
وجودیم غرق آواز اولدی اما الده تاریم یوخ
نسیم لطفیوی اَسدیر،امیدیم نخلی گولّنسین
قارا یئللر یامان درده سالیبلار برگ و باریم یوخ
سنه منسوب اولان تکجه آدیمدور الده سرمایه
جلال و شوکتیم یوخ،عزتیم یوخ،افتخاریم یوخ
گوزل درباریوه مولا اگر شاعر حساب اولسام
مقرّم یازدیقیم اشعاریده بیر شاهکاریم یوخ
✍رضا قربانی - ارومیه
#کانال_هفته_نامه_دنیز🇮🇷 👇https://t.me/joinchat/AAAAAEHusZKdsVrUdq