نفسلرین توخونوب دفتریم واراقلاندی
آدین گلنده بوتون بیتلر داراقلاندی
داریخدی تانری گؤررکن قارانلیق اورپهیینی
سنین گؤزل آدینی سسلهنیب سوراقلاندی
افقلارا سریلرکن سنین حایات نغمهن
ییخیلدی گؤیده قارانلیق جاهان چیراقلاندی
سریلدی تورپاغا عالم، سوروندو یوللاردا
سنین آیاقلارینی اؤپمهیه دوداقلاندی
یاشام دولو باخیشیندا نه سیر یاتیبدی بهییم؟
کی گون سنین گؤزونه باخدی و ایشیقلاندی
سنین گولوشلرین ایله او سارماشیق گئجهده
کدر بوداقلاری بیر-بیر سینیب، اوراقلاندی
.
نفسلرین توخونوب دفتریم واراقلاندی
آدین گلنده بوتون بیتلر داراقلاندی
یاشام یولو ملکوتا ساری دؤنن گئجهدیر
اوجاقلارین ایچریسینده اود سؤنن گئجه دیر
یئرین-گؤیون اؤرهیی آخ... طوفاندی عیصیاندی
دوشونجهمیز سنی دویدو آلوولانیب، یاندی
باخیشلاریندا دئیهن سئوگیدن بورانلیق وار
دوداقلاریندا سنین بیر جاهان قورانلیق وار
گونش ایشیقلی گؤزوندن بیر ایستکان دیلهییر
باخیشلارین گئجهنین باغری ایچره دان چیلهییر
ایشارتیایله آیی سیندیریب-یاران سنسن
و جبرعیلی نفسدن سالیب، یوران سنسن
شفاعتین دنیزینده شفیع والا سن
لَسَوْفَ یعْطیک رَبُّک فَتَرْضی سن
و عرش ایچره محمد، آدین اولوب سرمد
ملکلرین قانادیندا یازیبدیلار احمد
سنی گؤرنده دنیز چیرپینار، بولود آغلار
هر آددیمین یئره دهیکدیجه سؤیکهنر داغلار
#شعر_ترکی #یاسین_حاجی_زاده@arturmia|هنر ارومیه