کانال شهرستان الیگودرز

💞
🌸
از خیالِ رَهدنت چشمون مو تَـر ایبوهه
رهدنت داره به سی مو عینِ باور ایبوهه

ایرِوی و نیگـری حتی سـراغی از دلـم
دی چطوری زنده یی هم بعد خوت سر ایبوهه

سخته بی خُوت مَندِنُم مینه بهُونِ بی کسی
غنچه ی باغِ دلم ایمیـره ، پـَرپـر ایبوهه

منَدمه وا آسمونی بعدِ خُوت تاریک و سرد
بارِ غَم ، شیوسته شاری ای کموتر ایبوهه

وا دلِ تنگ و کُهِ غم ، فاده ناره زنده یی
زنده یی هم بَعدِ خُوت بی در و پیکر ایبوهه

رنگ شعرم ، یا غزل مَدیونِ چشمون تونه
هَرسِ دیری تو ، گریوِه ، بیتِ آخر ایبوهه

#حجت تختایی🌹
@lorestanaligoodarz

شعر بختیاری (بُهارون)

زنو هم ساز کرنا وی به گوشم
صدای کوگِ تِهنا وی به گوشم

وُریستین گویل و دُریَل بهاره
نِشونِ کَن کَنِ مالا دیاره

دُواره کوگِ دل بَنگ ایدراره
سراغی از دلِ تَنگ ایدراره

دُواره سالمون باوینه زاره
بهیگِ مالمون مَستِ بُهاره

بُهارِ روزگارون ، شُو نداره
دلِ افتوسُوارون ، خُو نداره

دلت خَش وا ، دلِ خَش چی بُهاره
دیارِ بی غل و غش چی بهاره

زمستونی نَمنده رَهده پُوییز
زَمندم نادُمه سر مینه شُولیز

به شادی پِر بِکَش تا مینه اورا
دلی که هی خشه هَرگِش نَمیرا

بهاره و بهاره و بهاره
بدونین بختیاری سَردیاره

شعر از #حجت_تختایی

#کانال_شهرستان_الیگودرز
https://telegram.me/joinchat/By0c4zyGmUG2TzL_Xym9rw