كلمات سيد حمزه الاعرجي

شور كعديه

يبوفاضل دخيلك
يبوفاضل دخيلك
*****
زينب اتنادي ابدمعهه والگلب شاجر لهيبه
صعدت اعله التل تنادي أمنين ابوفاضل اجيبه
خويه يابوالغيره وينك صاحت ابصوت الغريبه
الحگ اخيامي احرگوهه وراح اشوفن جم مصيبه

من طحت بيه اشجره
راح اظلن حايره
هايسبـع الكنطره
دهري مايرحم عجيبه
*******
شفكرت لمن عفتني عالنهر عينك غفت
ماكلت زينب وحيده عنهه لو انه رحت
ماكلت أنه اكفلتهه امن الوطن وياي اجت
فدوه جاوبني يخويه شنهوا بالله اشفكرت

من عفتني ياشهم
حركوا علينه الخيم
وانه محتاره أبحرم
خويه والله اتحيرت
***
وينه وعدك يابوفاضل امن الوطن انته الجبتني
من على الناگه يخويه بيدك انته الرگبتني
ابكربله ماجنت أظنن وحدي تاليهه عفتني
للوطن ردني دخيلك جم مصيبه الشيبتني

خويه جاوينه الوعد
يابوفاضل هـم ترد
ابغيبتك گلبي أنمرد
خويه لمن فارگتني
***
وداعت الله يابوفاضل خويه راح امشي سبيه
هم ارد ليك واشوفك لو تچي تفزع اليه
موبديه من أعوفك وانته نايم عالوطيه
والاجل وافاني ريته واندفن يمك سويه

يمك أتمنه اندفن
خويه من غدر الزمن
عمري راح اكضي اون
من مصاب الغاظريه
**
هاذي زينب ياوسافه بس حزن گظت عمرهه
جم مصاب المر عليهه وياگلب يحمل صبرهه
عالهزل عنك خذوهه وشابحه الجيتك نظرهه
يابوفاضل تدري زينب يمك اتمنت گبرهه

وداعة الله من مشت
وتلتفت ليك اوبجت
زينب اختك شيبت
مارحم بيهه دهرهه
*****
كلمات سيد حمزه الاعرجي

يابوفاضل من رحت ليه ترجع حسبت
خويه ظليت أنتظر مارجع منك خبر
لـيه ترجـع حسبت
------------؛؛؛؛؛؛؛---------------

يابوفاظل انه زينب ارحم ادموعي التصب
من رحت عني يخويه وياك احس راح الگلب
وانتظرتك ليه ترجع عيني ظلت عالدرب
تدري خويه اخلاف عينك موقفي كلش صعب

حايره ودمعي يگت عليه خويه تاخرت
الجيتك طال النظر مارجع منك خبر
ليه ترجع حسبت
-------------؛؛؛؛؛؛-------------
من رحت والجود بيدك كلت ارويهه الحرم
شفت چم طفله يخويه تبجي واتنوح ابالم
وچم طفل أيده على خده وكاعد ابـسد الخيم
ينتظر جيتك يگافل لمته ترجع ياشـهم

وعينه ظلت عالدرب والعطش فت الگلب
والظمه يسعر جمر مارجع منك خبر
لـيه ترجع حسبت
---------------؛؛؛؛---------------
وينه وعدك يالكلتلي للخيم زيـنب ارد
واروي كل هاي العطاشه وطفي نيران الجبد
چم طفل شفته يخويه يبچي حته البلمهد
من رحت والجود بيدك خايفه وگلبي انمرد

أدعي اللـه وبألم سالم اترد للخيم
لمته ترجع ياكمر مارجع منك خبر
لـيه ترجع حسبت
--------------؛؛؛؛؛؛؛-------------
من رجع حسين شفته يعثر ومحني الظلع
مابقه كل حيل عنده للخيم لمن رجع
الحالته گلبي لجمني كتله خويه اشهل الوظع
كلي طاح احزام ظهري اوحيلي يازينب وكع

راح مني سلوتي ظلمه صارت دنيتي
ظهري ياخويه نكسر مارجع منك خبر
لـيه ترجع حسبت
-----------؛؛؛؛؛؛؛؛؛------------
حسين والدمعه ابعيونه من طحت ماظله حيل
وأنه من بعدك يغالي انهاري دونك چنه ليل
رحت عني ومنهو اليه خلاف عينك يالكفيل
راح أظل خويه بغيابك بس دمع عـيني يسيل

روحي ملهوفه بكت عيوني بالفرگه بجت
يالطحت فوك النهر مارجع منك خبر
لـيه ترجع حسبت
------------؛؛؛؛؛؛؛؛------------
عالنهر نايم يخويه وعيني ظلت هامله
من اشوف حسين وحده اخلاف عينك منهوله
كوم ردني للمدينه اوياك اجيت امدللـه
خويه من دونك غريبه اوعمله عملة كربله

كوم ياغيرة علي يابوفاظل منهولي
خايفه من الدهر مارجع منك خـبر
لـيه ترجع حسبت
-------------؛؛؛؛؛؛؛؛----------
كوم ياعباس خويه حسين ريتك تنظره
وحده بالميدان حاير ماله واحد ينصره
اوكل أهل بيته رميه كبال عـينه اموذره
وأنه خاف اخلاف عينه خويه اروح اميسره

صعبه اظل ابغربتي ومن ينشف دمعتي
ريته لاطال العمر مارجع منك خبر
لـيه ترجع حسبت
---------------؛؛؛؛؛؛-----------------
گـلمات
سيد حــمزه الأعــرجي

نزال


ياعباس شيبتني كربله
يبوفاضل يبوفاضل
---------------؛؛؛؛؛-------------
شحجي يالوعـه اومصاب
شفـت أنــــواع الـــعــذاب
جـيـتـك أوعـندي عــتـاب
اهـموم اجـيت أمحمله
------------؛؛؛؛؛؛؛؛-----------
خـويه مـن يـوم الطحت
مانـشـف دمـعـي اليگـت
ويـن أبــوفـاظـل صحت
اويا أجـيت أمـدلله
---------------؛؛؛؛؛--------------
ويلي ياراعـي العـلـم
اعلينه العسكـر هجـم
خويه حرگوهه الخيم
أوحرت بين العايله
--------------؛؛؛؛؛؛؛------------
ويـن أصيحن ياكمـر
وانـتـه نايـم عـالنهـر
مـارحم بـينـه الـدهر
اويانه ياخويه شله
---------------؛؛؛؛؛؛؛------------
وياك أجيت امن الوطن
وانـتـه حـمـاي الـظـعـن
مـارحـم حـالـي الـزمـن
خله عـيني هامله
------------؛؛؛؛؛؛؛-----------
جيتك أشگي لـوعـتي
خويـه عايــن حـالـتي
صعبه وحدي أبغربتي
شفت أنـواع البله
--------------؛؛؛؛؛؛؛------------
خويه جاوينه الوعد
بطيحتك گلبي أنمرد
صــدك لـيـه مــاتــرد
وأنه بت عقد الوله
-------------؛؛؛؛؛؛؛-----------
وانـذبـح حـتـه الطـفـل
من غـبـت ياباالـفـضـل
ظامي عـبدالله أنجتـل
بسهمه صابه حرمله
--------------؛؛؛؛؛؛؛؛-----------
حسيـن حـزوا منحـره
أومالـه وأحـد ينصـره
حـته گـطـعـو خنصره
ولابگـه واحـد ألـه
-------------؛؛؛؛؛؛------------
ترضه ياخويه أنـسبي
ويحدي بالناگه أجنـبي
وأنـــه أبنيت الـنــبـي
الشمر يحدي القافله
----------------؛؛؛؛؛؛؛؛؛---------------
گلمات
سيد حـمـزه الاعـرجي

زينب وحيده ابگربله يـعباس
محتاره بـيـن الـعايله يـعباس
ظلت تنادي إم الخدر ولاواحد اليمهه حظر
يـعباس يـعباس
*****
هاي زينب بت علي حامي الحميه
بالغرب ظلت وحيده ابهل مسيه
اتمنت ابهل ساعه تلفيهه المنيه
حين شافت كل اهلها اعله الوطيه

ماتدري مـن يوم الغـبت يگفال
زينب تره اخلافك بگت يگفال
والجيتك تربي النظر ولاواحد اليمهه حظر
يـعـباس يـعـباس
*****
هاي زينب حايره ابغربه هظيمه
لااخو عدهه بگه ولاعدهه خيمه
من عگب ذاك الخدرتسكن ابهيمه
جم طفل ظاع اوتدور جم يتيمه

بحرك الخيام اطشرت هل أيتام
وزيـنب عليهم دورت هل أيتام
ظاعوا ولامنهم خبر ولاواحد اليمهه حظر
يـعـباس يـعـباس
*****
شردت أمن الخيل من حرك الخيام
جم طفل مرعوب فر مثل الحمام
والطفل ايخاف لـو حـان الظلام
لاخـيم لاوالي وابـسـده تـنام

من هجمة خيول اوزلم عالاطفال
شبـوهـه نـيران الخـيم عالاطفال
وجم طفله تسحك عالجمر ولاواحد اليمهه حظر
يـعـباس يـعـباس
****
ابغيبتك عباس زينب عذبوهـه
من طحت وليه عگب عينك ولوهه
ريت حاظر يمهه ياعباس اخوهه
صاحوا أمن الخيمه زينب طلعوهه

لاوالي عدهه ولاحمه بهذا الحال
ظلت وحيـده امـألمه بهذا الحال
من هجمت أجيوش الكفر ولاواحد اليمهه حظر
يـعـبـاس يـعـبـاس
*****
صعدت اعله التل تنادي يابـوفاضل
زينب أنـه والدمع ضل منهـه سايل
ليش ياخويـه عـفـتني ابلايه گافل
كوم شوف شسوت ابحالي العواذل

صعبه اظل وحدي ابغرب يخويه
ترظاهه بالـصوط انظرب يخويه
ويظربها بالصوط الشمر ولاواحد اليمهه حظر
يـعـبـاس يـعـبـاس
***
شحال زينب ظلت ابموقف صعب
كل أهلها نـومـه ظلوا عاالتـرب
وسفه بالصوط الاعادي تنظرب
تمشي مسبيه العقيله اويه الغرب

رأس الگفلها اعله الرمح تشوفه
حسين اخـوها المـنذبح تشوفه
مجتوفه راحت باليسر ولاواحداليمهه حظر
يـعـبـاس يـعـبـاس
*****
گلمات
سيد حمـزه الأعـرجي

ودعتك الله ياكمر عفتك يخويه عالنهر
عنك خذوني اميسره
عن حالي ماعندك خبر
يابالفضل يابالفضل
-------------؛؛؛؛؛؛؛؛؛؛؛؛-------------
ودعـتك الله من رحت خويه اوينور اعيوني
موبيدي عفتك عالنهر عنك غصب مشوني
مشوني عنك بالظرب اوفوك الظرب شتموني
يابالفضل ريتك عدل خويه اوتشوف امتوني

ناديتك ابلوعه اوحزن ماظل على اختك متن
وينك يسبع الگنطره
حال اختك ابحالة خطر
-------------؛؛؛؛؛؛؛؛؛------------
ياخويه تدري ابطيحتك طاح الگلب لمن طحت
صوبني سهم امصيبتك وخدري انسلب يوم المتت
ظليت نايم عالنهر اومسبيه من يمك رحت
إنه الجنت إم الخدر وابخدري انته اتگفلت

وياك اجيت امدللـه ياعمله عملة كربله
زينب أنـه بت حـيدره
تاليهه امشي لليسر
-------------؛؛؛؛؛؛؛؛؛؛؛؛؛؛-------------
ياخويه من يوم الرحت مسبيه عنك عالهزل
ناديتك ابحرگة گلب ياباالفظل ريتك عدل
ريتك يخويه ابهل وضع تنظرني وتشوف النذل
يظربني ماعنده رحم ياخويه ويجرني ابحبل

من الظرب متني خلع والصوط بمتوني انطبع
وتلوذ بيه چم مـره
يسبونه ياوسفه الخدر
-------------؛؛؛؛؛؛؛؛؛؛-----------
شحجيلك اصار اوجره رتك وظعنه اتشوفه
وادوني لديار الغرب اوفوك الهزل مجتوفه
طبينه للسوك أواجت تتفرچ أهل الكوفه
چم شامت الينشد أجه وين ابخدر معروفه

واسمعهه شدگول أناس مسبيه أخت العباس
بينه يخويه الماجره
راوانه بس ظيم الدهر
-----------؛؛؛؛؛؛؛؛؛؛؛------------
ياخويه چم ذله شفت شحجي يظنوة عدنان
الكوفه هينه اصعب بعد ودونه ليهه العدوان
ياخويه أصعب ماشفت امن الشام گلبي حزنان
طبينه مابين الزلم واكفتنه آخ ابديوان

ياخويه من طبينه التمت أناس اعلينه
تلكونه وانه امحيره
يرمونه ياخويه ابحجر
-------------؛؛؛؛؛؛؛؛؛؛؛؛؛--------------
ردينه خويه أمن اليسر اكـعد اجينه انخبرك
يوم اربعينك بالگبر جينه نزوره گبرك
مشتاگه أشوفك ياكمر مشتاگه أشتم عطرك
معذور وادري ابحالتك ليهسه ينزف نحرك

رديت الك متعوبه انه الجنت مهيوبه
رد الظعن كوم انظره
انهض يخويه امن الكبر
--------------؛؛؛؛؛؛؛؛؛؛؛؛-------------
گلمات سيد حـمـزه الأعرجي

عباس ها يعباس عباس ها يعباس
لا تـظل نايـم عالنهر
ياخويه داهمنه الخطر
عباس هـا يـعباس
-------------؛؛؛؛؛؛؛؛؛؛؛؛؛؛-------------
عباس ها يابالفظل موقفنه ياخويه صعب
محتاره ماعندي ولي ظليت بس دمعي يصب
وياك أجيت امدلله تاليهه أنسب وانضرب
زيـنب إنه ام الخدر محتاره بديار الغرب

ريتك تعاين حالي ظلينه وبلا والي
عباس وينك ياكمر
ياخويه داهمنه الخطر
عباس هـا يـعباس
------------؛؛؛؛؛؛؛؛------------
عباس لاتنـسه العهد وهاي الوصيه ابركبتك
حين الاجينه أمن الوطن أمك يخويه أشوصتك
آخر كلام أتكلمك اوشدت طلبهه أبرايتك
گالتلك أبدمع اليهل زيـنب أمانه ابذمتك

هذا الطلب الشدته شنهو يخويه الطلبته
عن حالي تسمع بالخبر
ياخويه داهمنه الخطر
عباس هـا يـعباس
--------------؛؛؛؛؛؛--------------
منهو اليردني للوطن ظليت ماعندي ولي
حسين ظل فوك الثره عالنهرطايح گافلي
وين أمشي أروح الياكتر حرمه وغريبه منهولي
محتاره بطفال أوحرم أنه العقيله بت علي

لاخيمه ظلت لـينه خيم الليل علينه
ذبلت عيوني امن السهر
ياخويه داهمنه الخطر
عباس هـا يـعباس
---------------؛؛؛؛؛؛؛؛؛؛؛؛-------------
ظليت نايم عالنهر وأنـه بگيت أمحيره
حرمه وغريبه ابلاولي زينب أنه بت حيدره
ياخويه ترضه لورحت من يمك أمشي اميسره
ألمن اصيحن لوردت وحسين گطعو منحره

عالرمح رأسه مرفوع وطفاله تبچي وتلوع
عالغبره ظل جسمه وذر
ياخويه داهمنه الخطر
عباس هـا يـعباس
------------؛؛؛؛؛؛؛؛؛؛؛؛--------------
ياخويه لوعني زجر أكعد أوشوف أمتوني
يظربني ماعنده رحم فوك الظرب شتموني
ويگلي وينه گافلج أجري الدمع خلوني
عباس مايرجع بعد وعالنهر تربي اعيوني

وينك يراعي الغيره ياخويه طحنه ابحيره
ترضاهه اروحن لليسر
ياخويه داهمنه الخطر
عباس هـا يـعباس
----------------؛؛؛؛؛؛؛؛؛؛؛----------------
عنك غصب خويه رحت فوك الهزل ياباالفضل
مشبوحه عيني الجثتك موقف يخويه مو سهل
ياخويه من يوم الطحت والصوط لوع چم طفل
وراسك اشوفـه عالرمح ودموعي عالوجنه تهل

فوك الهزل مجتوفه عنك رحت للكوفه
واليحدي بالناگه الشمر
ياخويه داهمنه الخطر
عباس هـا يـعباس
------------------؛؛؛؛؛؛؛؛؛؛---------------
شحجيلك اصار اوجره ويلي الدهر شيبني
چم نايبه ابعيني شفت گظيت ظيم أسنيني
والشام ياخويه الأشد ريت ألاجل يلفيني
ياخويه من ذاك الدرب ولالحظه نامت عيني

من غـيبتك شفت المحن ريتك تردنه للوطن
لا مارحم بـيه الدهر
ياخويه داهمنه الخطر
عباس هـا يـعباس
--------------؛؛؛؛؛؛؛؛؛؛؛؛؛--------------
گـلمات
سيدحــمزه الاعـرجـي

خويه عباس ياكافل اضعوني
خويه عباس عـدمن تـخلوني
خويه عباس خويه عباس
*

انتـه الجبتـني ياكمر من الـمدينه
وياك اجيت امدلله حامي الظعينه
وين الوعد يابالفضل ياخويه وينه
عنه رحت وانه انتظر لمته تجينه

دمعي بالعين واتنطر الجيتك
دمعي بالعين تـرجـع ترجيتك
دمعي بالعين مو راحت عيوني

****
يالـرايح الصوب النـهر طولت هـواي
مشبوحه ظلت عالدرب ياخويه عيناي
ياكافلي ارجع للخيم مـنريـده الـماي
ماتـسوه من دونك بـعد يالغالي دنياي

حالي ياحال مااكدر ابـدونك
حالي ياحال ياخويه وعيونك
حالي ياحال بالغربه عفتوني

***
ياخويه جم طفله وطفل تتنطر اتعود
عدهـه امل ياباالفضل ترويهه بالجود
بالخيمـه تنطر جـيتك والگلب ممرود
ماتدري طايح عالنهر مگطوع الـزنود

هاي الاطفال بالخيمه عطشانه
هاي الاطفال ياخويـه حـيرانه
هاي الاطفال عنك ينشدوني

*
ياخويـه طايح عالنهر مگطـوع الجفوف
وبغيـبتك ياباالفضل تسبـيني الـطفوف
ماعدهه رحمه هل عده ماعدهه معروف
ريتك تشاهـد حـالـتي وعيونك أتشوف

عني اتروح منهو اليحاميني
عني اتروح فـراكك يـأذيـني
عني اتروح مو خابت اضنوني

**
شفت الحسين ابطيحتك ظل محني ظهره
ياباالفـضل ريتـك تـرد عـينك تـنـضـره
ظل وحده مابـين العـده محد ينصـره
وبعيني شفته من وگع گطعولـه نـحره

شفت الحسين فوگ الترب نايم
شفت الحسين وينك گمر هاشم
شفت الحسين وبحاله هظموني

****
انه العقيله ام الخدر راح امشي مسبيه
راح الدلال ابغيبتك محـد رحم بـيه
ياخويه بالسوط انظرب ومجتفه أديه
من حـرك المخيم تـره مجويـه رجليه

شافت الناس الماشافو أخيالي
شافت الناس راس ابرمح عالي
شافت الناس عدواني يسبوني

*
گلمات سيد حمزه الاعرجي

راحت ألايام ماترجـع بـعـد
جنت الولي نام يمه يالولـد
نـام عـبداللـه يبني
نـام عبـداللـه يبني
--------------؛؛؛؛؛؛-------------
يالرحت وياك راحت فـرحـتي
يالجنت شمعه وتضوي ابدنيتي
شنهو ذنبك تـنذبح يـرويـحـتي

وگلبي من فرگـاك يايمـه انمرد
نـام عبـداللـه يـبـني
-------------؛؛؛؛؛-------------
لحضه مااگـدر عـنك أفـتـرك
بلايه صوتك يمه گلبي يحترك
من گثر ماشلتك امـتوني زرك

وانحني يمك واهزن بـاالمـهد
نـام عبـداللـه يـبـني
------------؛؛؛؛؛؛--------------
شما أهز مهدك يعـبداللـه ابحزن
تعاشرالصفنات روحي امن أرد اون
بعـد طولك يـمـه ماغـمض جفـن

وحيلي من فرگاك يوليدي انظهد
نـام عبـداللـه يـبـني
------------؛؛؛؛؛؛؛؛؛-----------
يالرحت عني وعفت ليـه الألـم
وحيلي من فرگاك يايمـه انهدم
اترد إليه تالـي مذبـوح ابـسهم

شنهو ذنبك مـنـذبـح لـيـه تـرد
نـام عبـداللـه يـبـني
----------؛؛؛؛؛؛؛؛؛؛------------
غفله يايمه وعـن عـيني غبـت
وداعة اللـه ليش يمـه ماگـلـت
أنتظر تـرجـع إلـيـه حـســبـت

وابسهم ماأدري روحك تنخمـد
نـام عبـداللـه يـبـنـي
-----------؛؛؛؛؛؛؛؛؛؛؛؛----------
ويلي واويـلأ مــنج كــربلـه
ماشفت بس المصايب والبله
شنهو ذنبه طفلي صابه حرمله

راح أظل باالنوح والهم للأبـد
نـام عـبداللـه يـبـنـي
-----------؛؛؛؛؛؛؛؛؛؛؛------------
گــلـمـات
سيدحــمـزه الاعـرجـي

عـودة زينب للوطن يمحمد
بلايه زلم رد الظعن يمحمد
گوم أختك أتلگاهه
بس العليل أوياهه
يمحمد
***
زينب إجت لرض الوطن تتعثر ابمشيتهه
متكبعه بالهم والحزن ماتنوصف حالتهه
يمحمد اتلگه الظعن رد خالي من اخوتهه
الجانت أميره امدلله ردت تهل دمعتهه

تلگاهه زينب بالدرب يمحمد
ردت اوملجومة گلب يمحمد
ظيم الدهر راواهه
بس العليل أوياهه

***
ياجرح شحجي ياألم جروح العقيله اهوايه
گافلها طاح اعله النهر وطاحت ابگتره الرايه
عباس مايرجع بعد اليروي العطاشه ابمايه
وزينب بگت تتنطره يرجع انطاها احجايه

كل ظنها يرجع للخيم يمحمد
وبجوده يرويها الحرم يمحمد
راح وبعـد ماجاهـه
بـس العليل أوياهـه

***
ياريت جنت ابكربله وتشوف حال الأطفال
يمحمد بهذا الوضع عطشانه ظلت ياحال
حسين رد محني الظهر من طاح اخو الگفال
شافته زينب من رجع والدمع منهه همال

ابياحاله اخوهـه اتلگته يمحمد
محني الظهر من شافته يمحمد
راح الاخـو نـاداهـه
بس العليل أوياهـه

**
شحجيلك اصار اوجره يمحمد ابطف كربله
من هجمة خيول العده وحسين ظل محد اله
عطشان أبواليمه بگه وعطشانه كل العايله
وعبدالله ظامي ينذبح صوبه ابسهمه حرمله

مارحمو ابحال الطفل يمحمد
بـيد ابـواليمه ينجـتل يمحمد
شمعه السهم طفاهه
بـس العلـيل أويـاهه

****
راح ابواليمه اومارجع يمحمد بهذا السفر
مذبوح ظل ابكربله ولي گطع رأسه الشمر
وجسام طفوا شمعته واتحنه من دم النحر
واليشبه طاها المصطفى جثته عالغبره وذر

هجموا فرد هجمـه الزلم يمحمد
واعله الحرم حرگو خيم يمحمد
صوط العده اتولاهه
بـس العليل أوياهه

****
زينب خذوهه اميسره مسبيه لرض الگوفه
يمحمد الديرة غـرب اوفوك الهزل مجتوفه
والشام مامثله جرح ريتك وظعها اتشوفه
جم شامت الينشد اجه وين ابخدر معروفه

تتشمت الناس الاجت يمحمد
فرحانه گلهـا اتفرجت يمحمد
شلون الدهر خلاهه
بس العليل أوياهه

****
گلمات
سيد حـمـزه الأعرجي

نزال

فخور أنه أبخدمتك جبل بعيوني شفتك
حبـيـبي ياحسين
----------------؛؛؛؛؛؛؛؛؛؛؛؛؛----------------
إنه خادم كل حياتي وأهـتف اباسـمه
ساكن ابگلبي وظميري حب ابـوالـيمه
حسين جنن عقلي حبه وعقلي
ظل يمه
ريت كل عمري ابجواره وعطره اشتمه

وحك الله ونبينه تظل كعبه علينه
حـبـيـبي ياحسين
------------------؛؛؛؛؛------------------
حسين جنه أومانعوفه هذا واقعنه
واحنه ابهل دنيه ابداً غيره ماعدنه
عالبشر رحمه محبته هذي من ربنه
أوغـير ابواليمه يعالم ماحله حـبنه

ألك روحي هديه وحك ظلع الزجيه
حبـيـبي يـاحسين
---------------؛؛؛؛؛؛؛؛؛؛؛----------------
اگظي كل عمري أبخدمته ناذر اسنيني
أنسه أسمي ومانسيته أوصورته أبعيني
حسين هوه كل حياتي وگعبتي وديني
لو يذبحوني أعله دربه فدوه لحسيني

سگن حبك گلبنه تظوي انته دربنه
حـبـيـبي يـاحسين
----------------؛؛؛؛؛؛؛؛؛؛؛؛؛------------
أحنه ماعدنه وسيله غير أبـوالاكـبر
حب الحسين ابگلبنه أويانه ظل يكبر
باچر ابيوم القيامـه الخادمه يحظر
مايعوف اللي يخدمه والله بالمحشر

تظل انته الوسيله ذنوب ألنه ثجيله
حـبـيـبي يـاحسين
-----------------؛؛؛؛؛؛؛؛؛---------------
باچـر أبـيوم القـيامـه عـينك أتـنـظـره
يالـتخدمـه مايعـوفـك لاوحـك نـحره
ابكل مجالس من تشوفك تحضر الـزهره
تصيح هذا الخدم أبني أشگد لطم صدره

شرف ألنه الخدامه تظل يوم القيامه
حـبـيـبي يـاحسين
--------------؛؛؛؛------------------
گلمات
سيد حـمـزه الاعرجي