. 𝟵𝟵𝟵 .

اليحبك من صدك لو سهم يتلگاك
شيلمة الگاع تصغر لمن تودعة
اليصير مرايتك يندل حسرتك وين
ويعرف وين بيك مچودرة الوجعة
اليصفر حيرتك بچفوفة تلگه اعذار
الحنينك بي تطشر يگدر يجمعه
اليطفى گبال وجهي انطي عذر ينشاف
ماخليت نسمة بخاطر الشمعة
أنا الضايگني يعرف طينتي من الهور
بيه ملوحته و مابدلت طبعه
واتلگه اليجيني منين ما يشتاگ
اليمر عابر علي من روحي ما اطلعه
العدوي و صاحبي تغبش ضحكتي وياي
اليجي سيف على نحري استحي ومارجعه
العدوي و صاحبي تغبش ضحكتي وياي
اليجي سيف على نحري استحي ومارجعه
افرزن ريحتك من يادرب مريت
اليجي مشتاك يثگل والهوى يدفعة
اختصر كلشي و أطول من أريد انساك
واحس كل صبح بارد وجهك يتبعة
واشمك شمة المهضومه ع مكتول
غريبة وبس تريد من الدمع فزعة
وكل مغرب يمر تترس شليلة عتاب
وحچيهة يضل اثر بجتاف الي يشيعة
وتنده كل گبر بي حسرة ع كتال
ودمعه من التراب الغاطة يفرعة
تشرب كل فجر يوصلة مابي طيف
ويفز كلشي حنين وياها من تنعى
بروحك چم سمة وما غيمت وياي
عليه تزخ عطش ومنشف السبعة
ادورلي نفس بوجوه غرگانين
كون بگد هواك وغيرك يزرعه
المفارگ مبين عذره يمشي ويا
المابي شوگ طافي العشك بي لمعة
بگصايب ياحلم شديت روحك خيط
خيطك من يمر دخان ماگطعه
ثگلت بروحي جثة ومالگت جناز
وخيالك گمت اشوفه منين ما ضيعه
اليسار للبچي يأخذ عيوني متاع
على چفني ولام جايه مخيطه الدمعه
اليفارگني شبر ابقى التفتله سنين
واتاني بكل جرح يالچمه الترجعه
أنا من الحچي يبللني طاري الماي
ويمر اسمك وينشف خاطري بسرعه
علي بردت الدنيا وبعده وجهك حار
مشيت وبيه ضاگن صدري و الوجعه

..