تقي : ما اقدرت اتركها بفترة الاذان بضل احس انو في شي لازم اعملو وفي حال ما صليت اي فرض دغري بقضيه هيك عودت حالي لحتى التزم ع الاخير مو انت هيك علمتني ابو تقي : بارك الله فيك لانو ما بينقصك شي الله مفضل عليك بنعم كتيرة تقي : بعرف وكمان بعرف انا بحاجة رب العالمين والصلاة صلة بين العبد وربه ابو تقي : صحيح ومشان هالصلة ما تنقطع لازم نحافظ على صلاتنا ونجاهد نفسنا ونتغلب على وساويس الشيطان تقي : انا عندي موسوعة بأمور الدين ابو تقي : هيك اطمنت عليك تقي : ومشان المجال الي داخل فيه ابو تقي : انت مانك صغير واكيد بتعرف شو بدك من هي الدنيا.....ما بدعمك ابدا بس كمان ما رح اوقف بوجهك من جديد لهيك شوف المناسب وقرر لحالك تقي : ان شاء الله ....انا بدي اروح اسلم على ريان وطارق عماد : كأنو لازم هني يجو تقي : انا ممنون لطارق واقل شي ممكن اعملو انا روح سلم عليه ماني ناطرو لحتى يجي هو تبارك : رح تتأخر تقي : لا ما بطول والا يفوت يرتب حالو لبس تياب الحفلة بلوزة سودة وبنطلون اسود وجاكيت بيجامة رمادي طلع تمشاية للحارة وانبسط بس شاف ريان ودغري غمرو بعض ريان : والله ونورت كل الحارة تقي : إجباري منورة لساتها الشمس ساطعة ريان : الحمد الله ع سلامتك... تقي : الله يسلمك ريان : كنت جاي لعندك تقي : ما صار شي انا اجيت لعندك شو بلاقي طارق بالبيت ولا بنطرو ريان : بدك تسلم عليه تقي : معقول يعني ريان :... كان ريان لسى مو مستوعب وكأنو نسيان انو تقي ابن الحارة ورفيقو يتمايزو منيح وكيف متغير تغيير كلي وفي كم شب بالحارة اجو سلمو عليه وبعدها نزل طارق وللحظات اتردد  بس تقي ما تردد ولا شوي قرب لعندو وطارق خطى بس خطوة وحدة كان عاجز ينطق أو يبوح بأي شي وقت شافو هيك تقي ما قدر الا يمد ايدو وبتردد كبير مد ايدو طارق طارق : الحمد الله ع سلامتك تقي : الله يسلمك بقلبو : مع انو ما اتمنيت  هالسلام منك تقي : في امانة معي الكن طارق : امانة شو تقي : بظن بتعرف بالدين الي اخدتو من بريق طارق : اي تقي : اجيت ارجعهن طارق : بس انا ما اعطيتك شي...بفضل ترجعهن ل يلي اخدتهن منها تقي : بس انا...يعني ما بدي اخربلا بيتها طارق بضحكة استهزاء : هو ضل بيت لينخرب تقي بحيرة : شو قصدك طارق : هي عنا....و..ورح تطلق كانت صدمة فرح وارتاح بنفس الوقت تقي : عنجد طارق : اي عنجد....ليش مستغرب....اي ما صرلا سنة متجوزة.... تقي : ما كنت بعرف ....يعني مارح تاخدهن طارق : بفضل انت تطلع وتعطيها إياهن متل ما اخدتهن تقي : ازا هيك بدك ما عندي مشكلة طارق : اتفضل كان ريان مبتسم بقلبو : عصافير الحب رجعو من جديد..... يا حرام يا شهم..... دمرتو وهي دمرها تقي ومابعرف كل واحد عم يأذي التاني بدون ما يراعي مشاعر حدا 🌹🦋🌹🦋 كنت بغرفتي ولا يمكن اقبل اتطلع فيه من جديد اي افرحت لرجعتو...بس مستحيل اقبل اقعد معو  انا خربت بيتي بأيدي وهو السبب هو السبب  باول خذلان وتاني خذلان وبكل لحظة ضعف عشتها وهلا ببساطة جاي يرجعلي الامانة فاتت ماما لعندي ام طارق : ليش مابدك تطلعي بريق : مابدي ام طارق : طارق مصر انتي تاخدي الامانة الي اعطيتي اياها بريق :  مابدي منو شي ام طارق : اطلعي احكيلو هالحكي انتي بريق : مافيني ماما...ولا بأي شكل بقبل اتطلع فيه ام طارق : ما بصير  عيب الزلمة قاعد وناطر بريق : لك مين حكالو بدي اخد منو شي ام طارق : ترى قلبي مليان منك اطلعي حاجتك عناد بريق : مافيني ليش ما عم تفهموني وتحسو فيني انتو جبرتوني اتخلا عن مبادئي كلا حاكيت شهم بس لحتى اخلص من كلمة كل البنات الي من جيلك اتزوجو ومعهن اولاد الا انتي عيشتوني لحظات يأس فضيعة وهاد الي قاعد برى ما قصر فيني لعب بمشاعري دمرني مرتين الاولى وقت تركني وما اعطاني اي اسباب ولا مبررات لغيابو وبكل برود حكالي اتزوجي عند اول مزحة وقلبها على راسي جد وتاني مرة وقت ما اتقبلت زواجي من شهم كيف بأي حق بدي احط عيني بعينو مابدي منو دهب ولا مصاري انا مابدي منو شي بدي زهايمر ينسيني حتى مين انا كسرت انسان بريء شهم ما بيستاهل الي عملتو فيه . ام طارق : رح اخبر طارق هيك بريق : اي خبريه شوف ماني شايفتو ومابدي منو شي فهموه هالحكي منيح حسيت على حالي كتير خايفة عم برجف مو مستوعبة بعد كل الي صار استقبلو طارق عادي. وقت  فات طارق ما اهتميت طارق : شو ناطرة بريق : تتركوني بحالي وبس طارق : متل ما اعطيتيه تعبك وصيغتك اطلعي خديهن منو بريق : بحكيلكن ماني قدرانة طارق : خايفة تضعفي قدامو بريق : لا طارق : لكن ليش مابدك تشوفيه بريق : مافي داعي طارق : بدك تطلعي بريق لا تخليني اجبرك بريق : طارق انا كتير تعبانة اتركوني بهمي