الشاعر عباس محمد الحميداوي

(لشهادة الزهراء ١٤٤٦)

مالحكنه نودع طولج ... ... ايتامج هيج يكلولج

           غمضتي العين يازهره بساع

            ومحد  منج  شبعان  وداع

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

عادات اليريد يموت ... يوصي تحضر احبابه

يتوادع وداع افراك  ...  ابحسره وناره لهابه

ومحد ودعج للموت ... والمثلج يوجع امصابه

شنسه العين لوضلعج ... وحيدر عّذبه بابه



  والباب الباب اذاني ... وابجي هواي خلاني

            ويازهره اعليج هنيال الكاع

             ومحد  منج  شبعان  وداع

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

المن عيوني ضميتيه ... الخد  وعينج  الحمره

لمن غلست جسمج ... شفت الضلع والسطره

حكج الموت بيه راحه ... الج من لوعة الكسره

ورحتلي منكسر ضلعج ...  وحيدر منكسر ظهره



الهضمتني اهواي وبجتني ... زينب عنج من نشدتني


            ودمع الأيتام ايزيد الاوجاع

             ومحد  منج  شبعان  وداع

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

جنتي بسمتي ابهل الدار ... يزهره وراحت البسمه

والدنيه  بيج  صابتني   ... وخلت  بالكلب  لجمه

كلشي  يريدج ترجعين  ...  كلشي  اشتكاك  لليمه 

وبله   بيا وكت  حيدر  ...   بيته  محّزن  وظلمه



وانه بيا حال واتعوفيني ... أظلم داري وظلمه سنيني

          من ضيعتج هم عمري الضاع

           محد    منج   شبعان  وداع

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ادير بوجهي ماكو انتي  ... وي ميل الصبر افتر

ادنك راسي كمت بساع ... اشوف حسين مااكدر

الحسن ماينوصف حاله ... عينه امن الدمع تمطر

وبزينب  فركتج صعبه  ... العذاب بزينبج يكبر



عيون بنيتي تسولف حزني ... ذني امصايب فكدج ذني

         وهالمره اجروح ايتامي اوساع

          محد    منج    شبعان   وداع

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

بعد ماضل الي بدنياي ... عكبج  راحه  نفسيه

ردت باخر نفس يمج  ... وتموتين  أعلى  ايديه

يتيمج مدري ابو ايتامج .. رجعي وشوفي البيه

ترس راسي الشيب بساع ... وحيلي مايرد ليه



مو حيدر هذا يكلولي ... اوكف واولادي يتجولي

           اجدامي تعثر كامت كلساع

             محد  منج  شبعان  وداع



خادم وشاعر أهل البيت : عباس محمد الحميداوي

١٤٤٦.٢٠٢٤ شهادة الزهراء عليها السلام

(تجليبه للشهادة الصديقه الكبرى فاطمه عليها السلام1443 )


فاطمه ايتيمه العدو يدرونها

وهل  اليتيمه تعمدو ياذونها

___


ابياشريعه ويازعامه وياحكم

وياخلافه الصدرت هذا الجرم

ينكسر  ضلع  اليتيمه  وتلطم

فوك كسر الضلع سطر عيونها


___

الجرم اصبح  لهل  الخلافه   اتباع

زمره قادت  مجتمع  نحو الضياع

النبي بنعشه وهمه عدهم اجتماع

ولحد   هسه   ناسنه   يمجدونها


__

اصبحو من بعد طه اهل القرار

وحتى  دمع العين خلوله مسار

لو   تون  بليل  لو  بس   النهار

شوف حتى ادموعها يمنعونها

__

بالمايعقله  حدث  العاقل فأن

عقلَ  لا   عقل  يملك   لاذهن

اليود  طه  ينطق  بكلمة و أن

اذن  بس  بغضائم  يخفونها

___

بجفها   اثر  للنار  ولسوط  العده

وعلى فراش الموت ويلي مدده

ومن  تكوم اعلى الجدار مسنده

وكالخيال انحلت  وانحل  لونها



_

تشهك  ابكل  نفس ياعظم الامر

وجان حتى الحجي يلجم بلكسر

شافت  انواع  الالم  بهذا   العمر

جا لون  كبرت  شنو  يشوفونها

____

تنظر    لحيدر   وتعاين  دمعته

مجتف  بأمر  النبي  وبوصيته

لون صد  لها  بجه  ولو  شافته

هم تصب دموع حسره شلونها

____


وهاي دولة جرم المنشئ مو بعيد

ومهّدت    بفعالها    لدولة    يزيد

حتى زينب من تطب سوك العبيد

مو   جريمه   بشامهم  يحدونها

""""""""""
الخادم ؛ عباس محمد الحميداوي

شهادة الزهراء عليها السلام

'''''''''''''''''''''''''''

(نزله ... على لحن قصيده كل عشيره وعدها بيرغ مالها )


هايه ليالي الزهراء ياشيعه خل نحييها

___

الثقل    الاكبر  لا  بل  كل   الثقل

يوكع اعلى اجتافكم يهلل الفضل

وكلتو  نحيها  ونعم  كول  وفعل

ارواحكم للزهره  شمعه  وتنشعل


ونيران باب الزهراء بدموعكم نطفيها

____

بدون  ماتحكمه  روح  العاطفه

خلي   الشيعي  يوضح  موقفه

خل  دمعته  للكسر تصبح شفه

وكون  كل  دمعه  ب  آه  ملفله



لجروح فاطم ياريت اعمارنه نفديها

____


ننتظر    ايامها   ابشوك  وفخر

و بل العزاء انعزي ابنها المنتظر

هاي  امه وامنه مكسورة ظهر

صلى الله عليها ولعن الله عمر



اكثر   من  الانفاس  اهاتها  ندريها

____

 ريتنه  نواسيها   فاطم   ريتها

 المنسطره  خدها يويلي ابيتها

ابدمعتك   اتواسيها  لو  هليتها

فاطمه  تستاهل  اشما انطيتها




من النار للجنه اهناك ايديك تاخذ بيها

____

هيه محنيه وضلوع الها انطون

وكّور  اهمومه عليها هل الزمن

انفاسها مشكاة  نور أم الحسن

الماجرن  لحزانها  ريت  انعمن


الماصبت اعلى ام حسين بلطم كون اعميها



''''''''''''''''''''''''

الخادم ؛ عباس محمد الحميداوي

محرم الزهراء ولياليها .

'''''''''''''''''''''''

(لسان حال الزهراء قبل وفاتها مع الحوراء زينب ١٤٤٥)

يمي اكعدي ارد اشوفج ... زينب عليه ليش خوفج

               تروحين غاد والي تردين

             مااخفي عنج حالي موزين

                    يازينب ... يازينب

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

قلقانه ماعندج آمل من علتي اكومن وابره

تنرسم  بعيونج صور امن اديرن ليه النظره 

زينب  تره   ذني   اليجن  اخر  ايام  الزهره

خوفي على ذخرج علي موتتي زياده لكسره



زينب المده مو طويله ... افراك النبي عذّب دليله


             شيسمّيه عام الماخذ اثنين ؟

             مااخفي  عنج  حالي موزين

                    يازينب ... يازينب

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

زينب يباب لجم  آلم زينب  لفظ بيه غصه

من كسرة  ضلوعي تره منانه  تبدي القصه

زينب بعد طاري الفرح مااله بعمرج فرصه

زينب  بعد عندج عمر بضيم ياهو يخلصه



زينب الموت اعليه عينه ... لو كلت زينه شلون زينه؟   

              كافي  يزينب   لا تنوحين

             مااخفي عنج حالي موزين

                  يازينب  ... يازينب

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

تدرين  بيه   كل  نفس  يلجم  كسر  ضلعيني

وتدرين   يبنيتي   انه  بالكوه   افكن   عيني

اثمنطعش عمري وذوبلن شبساع كل اسنيني

وماجني  ياذيني   ضلع  لمن علي يحاجيني



مثل الخيال الجسم ناحل ... مابيه شي كدامه اماثل


               خايفه يناظر سطرة العين

             مااخفي عنج حالي موزين

                  يازينب  ... يازينب

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

يمدللت   منزل   علي   زينب   يبسمة  داري

من يامصيبه ابدي الج يم  عون يله  اختاري

اعلى الهامه لو من الجبد لو من ذبيح وعاري

كلنه  نعوفج بالهضم  ودمعج  بخدج  جاري 



ام الرازيا رايح يسمونج ... اتموت الاحبه اكبال شوف اعيونج


            من المحسن واخرها الحسين

             مااخفي  عنج  حالي موزين

                     يازينب ... يازينب

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

مشتاكه اشبكج للصدر مشتاكه اشم انفاسج

تدرين  ياذيني  الكسر  ريت  الكسر لاجاسج

ادني  يبنيتي الي  جن  بده  الشيب  براسج 

جا شيصير زينب لو وكع احسينج وعباسج



يمه العمر كدامج ولخوانج هموم ... واحد يشيلونه برمح والثاني مسموم


             بين  الزلم  رايح تركضين

           مااخفي عنج حالي موزين

                يازينب  ... يازينب


الشاعر؛ عباس محمد الحميداوي

١٤٤٥.٢٠٢٣ شهادة الزهراء عليها السلام

  ( ثكيل ... كتبت القصيده على لحن القصيده التراثيه .. رحنه بضعينه )
         

               ضايع كبرها ... ... تدري بخبرها


   جم نفس شح بريتك ... ... وتبني كبرها امنيتك


                 يامنتظرها ... ... تدري بخبرها

____

تشيد هل الكبر اعلى جيتك مرهون

من  تثئر   لفاطم  يسرها   المكنون

ويلمهدي كون الكلب يحجيلك كون

امك  وره الباب العده الكل يدرون





                الظالم دفعها ... ... وهشّم ضلعها


   بعيونها الدمعه تروج ... ... بين الالم لاجت لوج


      وجف من سطرها ... ... تدري بخبرها

__

اجتمعو  عليها  اجموعهم وتتألف

من  الكسرها  والذي  طك  بجف

وجه الورد بسياطهم ضل  ينزف

وكل  هذا   ويردون  ونتها تخف






          عاشت ضليمه ... ... هايه اليتيمه


حتى لدمعها مخلين ... ... تبجي بوكت مو وكتين


          ويالم كسرها ... ... تدري بخبرها

__

شضام الدهر لامك ياغايبها شضام

وين   الصحابه  اليدعون  الاسلام

كوم  الخلافه  اطلعو  اول  ضلام

مرتاحت  الزهره  بفعلهم  ومتنام




            مهضومه راحت ... ... ولا مستراحت


ومن الكسر نسمع صوت ... ... ام الحسن ليش تموت


               بزهرة عمرها ... ... تدري بخبرها


___


البضعه النقيه ل طه عاشت بضعه

من    الايام   واذبلت   جن  شمعه

وهو  شيعيش   الكسروله   ضلعه

وصت   بعلها  الكبر  كون  تضيعه




            فعل السقيفه ... ... وشور الخليفه


وشوط البجي والحسره ... ... كصّر عمرها الزهره


           ابذمة العصرها ... ... تدري خبرها

___

ضلت  بحسرتها  الصعب  تشكيها

وي روحها هل المحنه ماتحجيها

ضمت  دمعها  عن  نظر  حاميها

وآه    الضلع   جانت  تردد  بيها





              ابرمشة جفنها ... ... دم نزف منها


   وسطرة الخد تخفيها ... ... خافن علي يصد ليها


                 باقي اثرها ... ... تدري بخبرها



•°°°°•
الخادم - عباس محمد الحميداوي

شهادة الزهراء عليها السلام

(لسان حال أمير المؤمنين وهو يدفن الزهراء عليها السلام )

تنشدني روحي بالخبر  وجبت الدرب احجيلها

الشايله همومك علي أعلى امتونك انت تشيلها

مذهوله روحي وتسئل  ... ... معقوله فاطم ترحل

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

بين  اصدك  خبر موتج بين اصدك حيل عندي

حاير  ابوحشتي  دونج  وابفرحتي الدنيه تبدي

هسه  لو افترض  عفتج ابهذا كبرج وارد وحدي

شرد اجاوب عين زينب شرد اجاوب عين ولدي



     يافاطمه اليمج علي فتحي اعيونج لجله

    الموت أسهل عد علي ومصيبتج مو سهله


  تفتحيلي عين اتأمل ... معقوله فاطم ترحل

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠


هاهيه    ويعني   انسه  الهلا    لداري من  اردن

يل  اخذتي حيلي اسمعي يم وجه وارسوم ذبلن

كلت عينوني اعلى نعشج امتوني يافاطمه هدلن

اتخيلي شكد صعب موتج علي عيونه اعليج هلن


  
   صعبه الرجل يافاطمه تفضح أحزانه الدمعه

  من حكي انوحج فاطمه يلجنه شمعه وشمعه

   والشمع ابدمعه يذبل ... معقوله فاطم ترحل

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠


ياضوه  ومشكاة  نورج  ابدونها  اتعثر  مشيتي

الاسود ايلوك أعلى روحي الابيض يلوك لحيتي

دار  حزنج  يبت  طه  من  ادفنج ايصير  بيتي

الدمعه  والا آه  وحسرتي  يزيدن  لو  مااجيتي




    جا حيدر  اشيحمل  كلب  وكلكم  امودعينه

    أعلى افراك  طه وبضعته  حيدر  الله يعينه 

  ياعمر بس لا تطول ... معقوله فاطم ترحل

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

رايحه   ياعطر   شيلة   امج  وانفاس  عودج

والله ودي كلبي يوكف واترك الدنيه اعلمودج

الفرحه والراحه يفاطم غايبات  ابلا وجودج

اجفوف انجاس الخليقه وسفه اطشر ورودج



     صبت  على  حيدر  محن يافاطمه عظيمه

    عايش ابو كلمة وأن وتموتين شكد هضيمه


    الموت اضن مايندل ... معقوله فاطم ترحل

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ياكعبة  حزن  روحي الجنت اكعد اشكي يمها

من بعد  أنفاس ريتج الروح مصيوبه بسهمها

محد  بكثرج  يزهره  فهم روحي شنهو همها

همي  جان  أدوم  فرحة روحج  وتنسه آلمها




   يافاطمه وشاء القدر ادفن فرحتي ابيدي

   رجعيلي  رجعيلي  بعد هذا صبح ترديدي


  ويانعمه ماتتحصل ... معقوله فاطم ترحل


الخادم: عباس محمد الحميداوي

شهادة الزهراء عليها السلام

[ثكيل ... بين الزهراء وأمير المؤمنين علي حين وداع الزهراء ١٤٤٤ ]
      
         فاطمه توصّي على فراش الموت

         ياعلي  ابليل  انت شيل  التابوت

يل منهدم كل حيلك ...  ... اكعد اريد احجيلك

                       ياعلي ... ياعلي

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠


ياعلي موت  وحياة   الدنيه  هاي  امقسمه

والموت موعد لانسبقه ولا احنه الي نقدمه

ونزل هلمره أعلى دارك يريد  ياخذ  فاطمه

وياعلي  عندي  وصايا  الكلب  حيل  اتألمه




          ابحالي تدري والجره اعليه وصار

          مابيه  اعيشن  بعد  فعل  البسمار 


وعن الكسر شرويلك ... ... اكعد اريد احجيلك

                      ياعلي ... ياعلي


٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ياعلي  الله يصبرك  ابحين  لحظات  الغسل

ياعلي   المنظر  عظيم   ومنه   رايح  تنذهل

وابزاويه  من الدار  حيدر  لمن  تنظر  تتعزل

يطول نوحك من تناظر بعيني شمسوي النذل



        لازم يفيّض صبرك هواي هواي

        لمن تغسّلني  ياحيدر  بل الماي

        
  جمرة حزن اتخليلك ... اكعد اريد احجيلك

                     ياعلي ... ياعلي

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠


ياعلي كلمن ظلمني وحّرف انواع الحديث

والكال ماكو نبي مات وبعده يتورث وريث

الكسر ضلعي  خليفه  عدهم ودينه حنيث

مااريده بساعة اتشيل النعش هذا الخبيث



         
           من  نار ربنا  منهو  الهم  منقذ

          ذيج العصابه الجان منهم قنفذ


واصبر ياحامي ادخيلك ... اكعد اريد احجيلك

                       ياعلي ... ياعلي

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ياعلي  ضكت الهضيمه بحين موت الوالده

شفت موقف البيه روحك ابلا شعور امعوده

ابغلفه  وتنادي  يايمه  وابكبر   هيه   امدده

علي ذوله ايتامي يمك وسرمد احزانج بده



         موعد رحيلي اقترب ويمكن حان

          واتعهد  كبري  واقره يمي القرأن


    استمع خل ترتيلك ... اكعد اريد احجيلك

                    ياعلي ... ياعلي

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

وعمت عيني على زينب من زغرها مدوهنه

شوفها   باري   دمعها   المالها   ساعة   هنه

الدهر  بيت  المصايب  على اسم زينب بنه

تنسبي   وتموت  أهلها   هاي  كلها  امدونه



            وياعلي زينب تفز وكت الليل

           ولصب دمعها رايده منك حيل


واسيها من تشكيلك ... اكعد اريد احجيلك

                   ياعلي ... ياعلي


الخادم: عباس محمد الحميداوي

لشهادة الزهراء عليها السلام

[ميمر لشهادة الزهراء ١٤٤٥]

دمعة محب ...المن تصب؟ ... واخذ الجواب من الكلب

هاي الدموع أعلى امصاب ... ام الحسين الزهره

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

امصاب الزجيه كلف صايب جبدي

حاير انه اختم بيش لو بيش ابدي

وابهاي الليالي  الله  يعين  المهدي



ايمامك يون ... من الو (أن) ... بذنه لحد هسه ترن

سطرة جفنها وكل سوط ...طكاها بعد العصره 


٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ادافع  وياهم  مره واصرخ  ليش

يابن قحافه جامع  اعليه الجيش

فاطمه  انه  الماتريدوها  اتعيش


ابحقد وغضب ... جامع حطب ... هجمو علي اشهد يرب

المحسن نذبحه تكولون ... وامه ضلعها نكسره

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

بسمار باب الدار طب حد ريتي 

الهوه اشتمه براحه هاي امنيتي

وتنشدني زينب خوما اتجويتي


وانه الجمر ... لاح الكسر ... انهض وعالكاع انهطر

الدم ترس حوش الدار ... والعين صارت حمره

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

لهاي المصايب دمعة الشيعه تكت

وكلمن يلومك عاللطم كله اسكت

هم تجي  مثل الزهره يالايم بت ؟


الضرك شنو؟؟ ... وانت منو؟؟ ... ماخذك بالدين الغلو

ماعاجبك شيعي تصير؟ ... ومنك  علي  يتبره

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

كل سنه هاي البدعه  منكم تنثار

تكولون اصل مايوجد لكل الصار

ابهذا   الكلام  الله  يعين  الكرار


تتشكك فئه ... وانت النأى ... ابرايه وكلامك منشئه

كل فكر ضد خط الدين ... افلان وفلان امصدره


الشاعر؛ عباس محمد الحميداوي

٢.٢٣.١٤٤٥.٢٠٢٣ شهادة الزهراء عليها السلام

[لشهادة الزهراء عليها السلام ١٤٤٦ ]

يافاطمه وصارت صدك ... شاء القدر ان نفترك

          ويبقى سؤالي سؤالي سؤالي

          تعود الليالي الليالي الليالي ؟

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ماخفت يوم بدنيتي بس جنت خايف افكد

بيا  وكت  ياأم الحسن  وحدي  بدارج اكعد

امضيع بشر جو الترب وطبع المضيع ينشد

ولو  شايفه  زينب امس تشتم مجانج وترد


   وتكلي امي راحت ... كتلها بويه ارتاحت

          وشنهو البكالي البكالي البكالي

          تعود  الليالي  الليالي  الليالي ؟

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

وماينوصف  حالي ابد  ولاحال  ايتامج   هاي

هاي  اول  مره احس  امدوهن  يزهره بلا راي

وغسلتج   بدمعي  لأن  ادري الكسر ياذيه ماي

ذبحتني السطره البيها اثر بجتني يازهره هواي 



ساكت وتحجي دمعتي  ... ابداري صارت غربتي


           ومو زين حالي حالي حالي

           تعود الليالي الليالي الليالي ؟

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

انصاب ضلعج  وانه كلبي  بغيبتج  هم انصاب  

ويوميه   بعيوني من افز  يافاطمه  دمة الباب

عاتبت جفي  شلون هال  اعليج  يازهره اتراب

ماتحلى يم زينب بعد دنيه الخذت مني احباب




  راحت بسمة الدار  ... وكابل عيني بسمار

          
            ضل بيتي خالي خالي خالي

            تعود الليالي الليالي الليالي ؟

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

وماجانت  ابالي  ابد  ابيوم  اطلع  ابتابوتج

ولمثل  عمرج يم حسن ماحاسب انه  لموتج 

كلساع اشم عطرج لجن مشتاك اسمع صوتج 

وحسين  ينشدني شكثر عنج شكله امروتج ؟


يكلي معقوله الحنينه ... راحت يبويه وماتجينه


             ودمعه  يلالي  يلالي يلالي

             تعود الليالي الليالي الليالي ؟


الشاعر الحسيني: عباس محمد الحميداوي

١٤٤٦.٢٠٢٤ شهادة الزهراء عليها السلام الروايه الأولى

توجع

 ثكيل ... لسان حال ابناء الزهراء بعد رجوعهم من دفن امهم الزهراء )



    تونه رجعنه من الدفن ... ومانرجع اتمنينه

    يايمه غطاج الترب ... واحنه الدمع غاطينه

____


دفناج    واجينه   وثكلت   الخطوه

وصلنه البيت شفنه البيت  مايسوه

وابونه ذاك  ابو الحيل اليهد  اجبال

ييمه  من  الدفن  جبناه مشي كوه


يعثر ونكومه ... ونعثر ويكومنه ... الميته امه ... ماجنها الميته امنه





    ولمن رجعنه يم حسن ...    ويامن    اتلاكينه


   لاكتنه  زينب  نايحه  ... واحنه الدمع غاطينه

____

اليدفنله  عزيز  يموت  يهوى وياه

وينصاب بجرح  صعبه يلكه ادواه

للذالك   كلنه   يمه   تمنينه  الموت

نصبح  يمه  بيمن  بلحزن  بل  آه




نشتم هدومج ... ونغفه بشمة عطرج ... من دون الموته ... ضايع ومخفي كبرج



محسبين كلشي يم حسن ... وموتج فلا محسبينه


حجم  الحزن ماله وصف ... واحنه الدمع غاطينه

_

وحشه البيت واحنه نصلي الوحشه

والينظر    وضعنه    ينكطع   هرشه

ييمه بليله وحده  شاب شعر الشاب

علي مشيب الراس وحاجبه ورمشه


نسئل ونجاوب ... ونتسأل هم مره ... معقوله الزهره .. تعوف اولاد الزهره





     بجفوفنه   هلنه  الترب ... ومحد  مصدك عينه


   يل غاليه افراكج صعب .. واحنه الدمع غاطينه

_

حسينه   بطعم الماعنده  أم  تحوطه

تضل   فرحة   حياته  بيها   مربوطه

المخليته جانت  وسط شوف  العين

ابنص ذيج الترايب وسف محطوطه



مانلكه ابمثلج ... ولارايح نلكه ... صعبه اعلى ايتامج .. يايمه هل الفركه




عدنه وي  بابج جم عتب ... وهل الخشب شيحاجينه


التمينه امس بنص حجرتج ...  واحنه  الدمع غاطينه

_

كلفه يعيش وحده الروحه متعلمه

لو  طر  الصبح  يتصابح  ويه امه

ابونه حيله سبحه وطشت بهلكاع

واحنه   ماي  طاح  وشنهو  اليلمه



يانسمة ريه ... مخنوكه ومتعذبه ... العايش من دونج ... حكه ويوكف كلبه



     ويامن انلاكي الحزن  ... يل رحتي من ايدينه


    ودعنه طولج وانتهت ...  واحنه الدمع غاطينه



٠٠٠٠٠٠٠٠٠
الخادم ؛ عباس محمد الحميداوي


شهادة الزهراء عليها السلام

[ثكيل ... عن لسان الامام الحسن  بعد فقد الزهراء عليهما السلام ]     

     مادريتي حالي ... ابوحشة الليالي

      بيتنه من دون وجهج صبح ضلمه

      مايعيش  اهواي   يمه  الماتت امه

__

يمه مو بيت التغيب انواره واليخمد ضواه

ماتضل  بيه نسمه  للشم التضل بس بيه آه

والفرح  يمه يزهره  الموت من ولدج خذاه

والميت تعرفه عزيز انجان اكو صيحه وراه




  وصحت يمه ارجعي ... بخدي شوفي دمعي

       والكلب جلمة يتامى اشكد تحطمه

      مايعيش   اهواي  يمه  الماتت  امه


__

يمه صعبه  أعلى المعّود روحه  تتلكينه دوم

من يجي ويلكاج ماكو يبقى  بمجانج يحوم

يمه والفركه طويله لاهي ساعه  ولاهي يوم

اعيونه رايح تبجي  اكثر من ماي البل غيوم



   ايهّود اكليبه اشلون ... وانتي طولج مدفون

       هظمه افراكج ثكيله اشلون هظمه

      مايعيش  اهواي  يمه  الماتت  امه

__

يمه  ياجلمة  اليمه  لكل شخص سلوة دليل

واليفارك  امه  اشوف الموت في حقه قليل

الليل  اذا مابيه صوتج  حقه  لو  سموه ليل

انتي عافيتي وضحكتي ليش نيتج بلرحيل




         يمه ومايألمك ... بس جنازة امك

        وابنص حياتي روحتج ثلمتها ثلمه

        مايعيش  اهواي  يمه  الماتت امه


___

يمه   ياطاريج  طاري  ولا ينمل  بل  الذكر

يمه  كليلي اعلى حالج خاف ياذيج  الكسر

ردت  ادفنج ابوسط عيني ومااخليج بكبر

مارحم  حالي الموت  ومارحم حالي الهجر



     البكى عندي شيله ... الشمها تاخذ حيله

         والشاف ذكرى لو صور ايزود همه

         مايعيش  اهواي  يمه  الماتت امه

_____

يمه تنشغ كل مسية اغروب  روحي وتختنك

يمه واتعنه  لمجانج  وبيه  اون  واشبع شبك

المامحسبلها   بحياتي   هيج  فجأء  ونفترك

وبيدي اشيعج واكبال عيني الكبر بابه ينغلك



    وبعد ماكو نظره ... وماتت امنه الزهره

       وهاي شيصبرني بيها وشلون جلمه

        مايعيش  اهواي  يمه  الماتت امه



الخادم: عباس محمد الحميداوي

شهادة الزهراء عليها السلام

١

(لشهادة الزهراء .. عن لسان الامام الحسين واخته زينب ١٤٤٥)    
   
       هاي جيتي ... امن  المكابر مو  نهر

        دافن امي ... وجايج محني الظهر

      يمي اكعدي يمي ... بيج ريحت امي

        هاي جيتي... من المكابر مو نهر

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

خويه زينب واكفه اهناه ... المن اشمنتظره

اكبال عينج كلنه جينه ... بدون امنه الزهره

لون ادري الباب يكتل ... جا ملاكي العصره

ماتت امنه بكسر واحد ... واحنه عشنه بكسره



        خويه زينب ... الفركه تحني الواحد

        شفتي  ابونه ... اعليه  مبين   فاكد


       عطر فركه اشتمي ... بيج ريحت امي

          هاي جيتي  ... من المكابر مو نهر



٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

احاه لون ناظره لحيدر ... ابحين هال التربه

شفته   مخنوك  بعبرته ... وراد  يوكف  كلبه

دار وجهه النه ويكلنه ... الدنيه صارت غربه

امدوهن وماخوذ حيله ... ناسي داره ودربه 


       يعاتب الباب ... يكله بسمارك صلف

      وبعد ابوها ...  ناحله  وبيها  اتعرف 

      اعتابه زود همي ... بيج ريحت امي

       هاي جيتي  ... من المكابر مو نهر  

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

شكد حنينه امنه يزينب ... وتارسه المنزل حنان

وين  ماالتفت  ذكرى ضاله ... الها    ابكل  مجان 

من جنت اكعد كترها ... جنت احس بيها الأمان

هسه خدها أعلى الترابه ... شفتي غدرات الزمان 


           امس يمنه ... وزينه كالت حالي

           هسه راحت ... وبيتنه ضل خالي

      راحت ابخد مدمي ... بيج ريحت امي

            هاي جيتي ... من المكابر مو نهر

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

هلا يمه تكلي جانت ... ويرد هيج لساني

انجان انتي بخير يمه ... ابخير باقي اني

والله مشتاك لحجيها ... واشلون تتلكاني

بعد  صارت بالمكابر ... اشكثر جان تعاني


       بسمار خويه ... ابنص صدرها جاسها

       صعبه جانت ... عدها  حتى  انفاسها

       النزف ريته دمي ... بيج ريحت امي

        هاي جيتي  ... من المكابر مو نهر

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

يالحنينه    ويبت    امي ...  خلي اسولفلج  تعاي

الطف بعيد اعلينه زينب  ... وانحنى بسرعه كفاي

اشراح   بيه  يصير  لمن ... اترك    الكافل   وراي

الله  يساعدنه   يخويه ...  يابعد  هايه اوي هاي


         افراك امنه ... جرح ميفيده الدوه

         هيه راحت ... وفلان يشتم الهوه

     ايتيم صاير اسمي ... بيج ريحت امي

        هاي جيتي ... من المكابر مو نهر


الشاعر؛ عباس محمد الحميداوي

٢.٢٣.١٤٤٥ شهادة الزهراء الروايه الثانيه

    (  ١٤٤٥ قصيده ترتيل السمه )


  صار ترتيل السمه ... فاطمه يافاطمه

العرش بالدم انصبغ ... بحين صب ضلعج دمه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

فاطمه  ياسر الاهي  النور من عنده انبثق

اعداج رادو دنيه ضلمه النور عيّشهم قلق

لاشبيهه  الج  فاطم  ومثلج  الله ماخلق    

انتي ياسورة  براءَ  وكوثر  وصاد وعلق 




بيتج اصل المعرفه ... انتي روح العاطفه

الله خله  بيج  سر ... ماكو واحد فاهمه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

متنج  ايسونه   ازرك  وطافيه  يازهرة  عين

اضلوع  متهشمه وطاح  بعتبة الباب الجنين

اشلون رفسه رفس بابج واعصرج هذا اللعين

زحف يازهرة  طلعتي  خلف  امير المؤمنين




واشلون حالة حيدره ...انهشم ضلعج من دره

راد   كبلج   فاطمه  ...   هامته    المتهشمه


٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ستة أشهر واكف  المختار يستأذن دخول

وانتي ناشديته هاي الدار الك وانه البتول

كالج  من  الله  هذ الأمر  مو  انه  الاكول

ورغم كل هذا السقيفه لبابج ايديهم تطول



ابيا ديانه وياشرع ... ...  اعليج  بابج  يندفع

بت نبي وكسرو الج... ... اضلوع واعليج انغمه


٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

المثل  بيتج هذا  كون الكوم يتخدو مقام

مستقر  جان  لنبينا  وجان منزل جم أمام

التمو  وجمعو  حطبهم  ابابج  اولاد الحرام

شكثر جان الثاني حاقد جاي ناوي الانتقام



ايحشم ابكومه ابعجل ... ...  والباب بالنار اشتعل

دره اموصى المرتضى ... ... وسل سيوف الضالمه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

من مصيبة  حرك  دارج اتنصب الحاكم يزيد

الخّلو المرتضى وحده حسين هم خّلوه وحيد

الضرب متنج ضرب زينب فرق ماكو ولانريد

الشاد حيدر خله للسجاد طوك من الحديد



العرق   دساس   العرق ... ... ماكو   يافاطم  فرق

الذابح حسينج ومحسن ... ... من العصابه الهاجمه


الشاعر عباس محمد الحميداوي

١٤٤٥.٢٠٢٣ شهادة الزهراء عليها السلام

(قصيده لشهادة التابعي الجليل سعيد ابن جبير ...اراشيف ١٤٤٣)



جان القرأن عايش بحساسك .. وقد شاء الله هم يقطع راسك


 رتل  نحرك  ايات  المجيد ... شابهت حسين بموتك ياسعيد

                          ياسعيد ... ياسعيد

_________

جانت   حجتك  رزنه للذالك  كطعو  الاوداج

جلمتك جن سفينة حق طرت باطل الامواج

واضح  انت  ياعنوان  وكل ترويج مايحتاج

وين  انت  عله صرحك وين امكابر الحجاج



ياصاحب دعوه يشهدولك مجابه .. قبرك روضه وخصمك خرابه

بهجه وجهك قد قالت شهيد ... شابهت حسين بموتك ياسعيد

                             ياسعيد ... ياسعيد

_________

بوصف موتك ويه حسين تتشابهه بجم موقف

وحيد  من  انذبحت  انته بس الفرق مو  بلطف

مو  عطشان اضن ذبحوك ولاعندك جرح ينزف

 ابابك صطف اليشيع  والحوافر بجثته تصطف



واهات جروح متعاني جنت ... وبحرمة جسمك وبأهلك انصنت

وخصمك حجاج وخصمه يزيد ... شابهت حسين بموتك ياسعيد
                                ياسعيد ... ياسعيد

__________

التابع  اعليك  يكولون  وخل نفهم شنو التابع

يعني   لحب   آل  البيت  تابع   وجفك   يبايع

يعني   بكلبك   الاول  علي   وبتاريخهم  رابع

روحك  ماتعز  عل  الدين  ودمك ينفدي قانع



حار  الحجاج  والعالم يحير  ...  بشخصك  مولاي  ياأبن  جبير

عد ربك ترزق ياقطيع الوريد ... شابهت حسين بموتك ياسعيد

                              ياسعيد ... ياسعيد

__________

ابسلام  ادخلها  يازاير  ابأمان  انكتبت ابابك

وجن مثل اربعين حسين هم متعنيه احبابك

تستاهل  بعد  واكثر  الااف  التحيي امصابك

بابك يشفي المعلول وتقضي  الحاجه اعتابك



الابيض كلبه والصادق نيته ... المثلك حك تجي الناس لحضرته

الزاير يمك يطلب شما يريد ... شابهت حسين بموتك ياسعيد

                             ياسعيد ... ياسعيد

_________

خالد  يبقى  بتاريخ اسمك وبل الكلب خالد

ثورتك من نبع  مظلوم  نفس المنبع الواحد

شاب اعلى الظلم صوتك صدح ياأيها العابد

هنيأ  سيدي  للروحك  هنيأ  للكلبك الصامد



ماتمحيك  اقلام  المغرض  ابد ... يافارس مهرة الرفعه لكد


للظالم رافض تصبح من العبيد .. شابهت حسين بموتك ياسعيد

                              ياسعيد ... ياسعيد


••••••••
الخادم : عباس محمد الحميداوي

1443.2021 يوم 24 ربيع الاول

شهادة التابعي الجليل سعيد ابن جبير رضوان الله عليه

 (#١٤٤٦ لشهادة الامام الحسن العسكري عليه السلام)           
             غابت شمس عن أرض سامره

              والمهدي ضلت  ناره مستعره

صوت النياح تسمعه بيها ... ايد الظلم سمت وليها

                 ومارحمت بعترة نبيها

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

يوم  ثامن من  ربيع  الحزن  يوم النايبه

شمس ذاك اليوم مدري  يامصيبه جايبه

صفت روح العسكري بسم الاعادي ذايبه

أصبحت سامره حزينه وبالدمع متلاهبه



             حزنانه  ضلت دوم حزنانه

           وفوك المتون انشال جثمانه


   وللمنتظر كل تعازيها ... ايد الظلم سمت وليها

                ومارحمت بعترة نبيها

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

اليوم سامره أعلى صوت الناعي فزت ناسها

وطلعت  ناس  ابدمعها  وناس  تلطم  راسها

ومو   ركن  منها  التهدم  بل  تهدم   ساسها

اليوم مجروحه الضماير وخنكه كل أنفاسها



            وناعي المصيبه بالخبر ناده

           كومو لنعش الحسن ياساده


الساده الهظم زايد عليها ... ايد الظلم سمت وليها

             ومارحمت بعترة نبيها

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

دار  الامامه   موحشه  صارت  وتسمع  ونها

جنها  خيام  ابكربله  من  الزلم  فرغت جنها

اخلاف ابو المهدي مظلمه بس الحزن يسكنها

ويلاه امس جانت شمس تشعشع بنوره منها




            ومأجور يابو الغيبه مأجور

          هاي المصيبه اتذوب الصدور


ابعينك المايسكت بجيها ... ايد الظلم سمت وليها

                  ومارحمت بعترة نبيها

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

يبن  الحسن يالمنتظر  ياامنية  كل مشتاك

يالغايب ندري  تره يجوي  الكلب كل افراك

يتسابك  لجفنك دمع ولكلبك الضيم  اسباك

انباك من روحك فرح ومن عينك النوم انباك



             ثار الحسن انت الذي تجيبه

            ومولاي عجّل  طالت  الغيبه


   والشيعه تتنطر تجيها ... ايد الظلم سمت وليها

                 ومارحمت بعترة نبيها

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ماتنسه ادري  كربله  ولا باب فاطم والنار

وللثار  ياابن  الحسن  عجّل   يمهدي للثار

عندك ضعن رد منسبي للسوط بمتونه اثار

عندك  ذبيح بكربله اضلوعه صارت طشار



            عندك رضيع من الدمه اترّوه

             واجفوف عمك راعي الخّوه


اظهر اعداك وامحّي اساميها ... ايد الظلم سمت وليها

                  ومارحمت بعترة نبيها


الشاعر الحسيني: عباس محمد الحميداوي

(١٤٤٦.٢٠٢٤ ربيع الأول شهادة الامام الحسن العسكري عليه السلام)