الشاعر مهند الشاكر

دخلها الصاعد الشكره
دخلها والهوة بظهره
فحل لا ما يكدرونه .. ابو فاضل

عساكر شردت وطاحت
الزلم مثل النسة ناحت
چبير وترهب امتونه .. ابو فاضل

بچة العساكر وانولت صارت رهينة
شيخ الزلم والمعركة كلها بيمينة

####

امير المعركة الكافل
دخيل الاسمه ابو فاضل
نزل بالمعركة القائد .. ابو فاضل

عليهم چن غضب نازل
بچفوفه چم نهر شايل
شحلاته بخزرته يعاند .. ابو فاضل

خله السماوات السبع فوك الوطية
ما همة لا جيش وعدد طب المنية

####

تحزم يا علي سيفه
شجاع ويرهب بطيفه
دخلهم رافع الهامة .. ابو فاضل

كطع عنهم هوا الرادو
يمنعونه الشرب صارو
رماد وداسته اجدامه .. ابو فاضل

داس الجماجم والرگب شالاها سيفه
عكس الشرد باقي الفحل يمشي اعله كيفه

####

تخوف شمرة متونة
وتعادل چم نبي عيونة
كفيل امعدلة افعاله .. ابو فاضل

گمر طالع گبل صيته
دخيله شكدها حنيته
بشر لا ما تجي امثاله .. ابو فاضل

ثابت يضل ما ينثي شايل فقاره
نار ودوت بالمعركة شيطفي ناره

####

مهند الشاكر

شور كعدة



حسين باجر ينذبح
وراسه ينشال برمح
والخيم من تحترگ
چم يتيمة تنسحگ

باجر اطفال وخدر يمشي بصحاري
حيل زاد بخوفهم ليل البراري
والعطش ذبلهم وچم نهر جاري
مامش الكافل يجي لضعنه يباري

مامش حسين ... يكض الايدين
ويلي مذبوح ... حسين

خدره مسلوب ... هواية متعوب
منه مجروح ... حسين

****

ضعن رايح عالهزل
والمصيبة بالحبل
چتف چفوف الحرم
ضعن من كلشي انحرم

رايح لديرة غرب وسفة وهضيمة
راحة ما شاف وتهد حيله الشتيمة
يعاين حسين برمح راسه غنيمة
مكيد وچم حرمه شدوها بيتيمة

فوك الارماح ... ورغم الجراح
لخدره يندار ... حسين

ينزف دموم ... شايل هموم
بضعنه محتار ... حسين

****
اه يا طاري السبي
واه يا ظيم العبي
خدر يمشي بلا لوة
وانسلب حتى الهوة

طايح حسين وخيم طاحت مصيبة
تراب تارس لحيته وصارت خضيبة
زينب تهم بالحرم تالي عجيبة
الچان اسمها ام الخدر صار الغريبة

شيحمل الليل ... ورايح الحيل
وزينب تصيح ... حسين

غربة يحدون ... بممشة الاضعون
ويحمل الريح ... حسين

****
لا اخو ضل لا اهل
ضعن للغربة حمل
وزينب تباري الخدر
عگب چويات الجمر

من بعد عز ودلال اعله الترايب
تغفى العيون وتنام بنص خرايب
گلب زينب عالاهل يا وسفة ذايب
ليش بالغربة انحدا ضعن الاطايب

بغربة وجروح ... زينب تنوح
ومامش چفوف ... حسين

تنسبي ام عون ... وغربة يحدون
والها ملهوف ... حسين

****

شور كعدة




نادم اجيت لحضرتك
ذنبي عظيم وانتة احن
اغفرلي يا اول عشك
ضايع بقيت بلا وطن
محني واجيتك منكسر
يم بابك دموعي انجفن

حيل قصرت واجيتك اعتذر
كلبي يمكن ناسي جويات الجمر
ما اريدن عمري يكضي بلا دمع
الليل ما بية لذه اذا ما طر فجر

دخيلك ... يا وجودي يا شريج احلامي
دخيلك... خلي بالمجلس بقيت ايامي
دخيلك... انتة ضامي وكلبي جالك ضامي

@@@@

الدنيا غرتني وصرت
واحد بعيد بلا كلب
خلتني اتناسه الجرح
وامشي بضحك وادم غرب
نفسي ضعيفة وترتجي
منك تدليها الدرب


الما يعيشك ضايع شما مر زمن
فضلك وخيرك على الروح انچفن
چانت سنيني ظلام بلا ضوة
وهسة احس بروحي بجنة عدن

خليني ... على دربك ما اروح لغيرك
خليني... الفضل لله عايش انة وخيرك
خليني... لحد مماتي ابقى رايد اسيرك

@@@@

بالدنيا عشت بلا عقل
وذنوبي زادتلي الحمل
كلما اريد ارجع الك
اتعثر وجدمي يزل
خليني دوم بمجلسك
وخل الحزن بية يهل

عينك اعله اجدامي لو لحظة هوت
سنيني من دونك هواي تمرمرت
انتة بس انتة اريدك بالكلب
روحي مشدوهة وعله عيونك غفت

لجروحك ... لحظة ما رايد تهيد جروحي
لجروحك ... انطيني دمعة وحركة يا مذبوحي
لجروحك ... اكضي عمري بس اون وي روحي


@@@@

رايد جرح ما يستچن
وچفوفي بصدري تدك
ما رايد اعشك اي بشر
بغيرك شنو لذته العشك
ارزقني دمعة اعلة الخدر
واتسمه خادم من صدك

كون اطين روحي برماد الخيم
واچوي كلبي بچوية من ذاك السهم
و چفي اشده وامشي مکيود بحبل
حالي حال الراحن ومامش علم

بالغربة ... ويلي نسوانك يمولاي انسبن
بالغربة ... بالخرايب زادت عليها المحن
بالغربة ... ضلوعك انداسن عليمن ينتچن

@@@@

مهند الشاكر

دكة ونص






قمر بني هاشم ابا الفضل
فلا يصح مثله بقراره
لا ما يضل راكد وجوده
من تجدح عيونه بشراره

مامش بالعركة لا بس سيف الگمر
لا ما يثني ابد فقار الگمر
ما يهتم العدد لا عسكر وحرس
غير اسمه ابو الفضل قهار الگمر

گمر گمر .. چن رعد صولاته
گمر گمر .. يرهب بريشاته
گمر گمر .. واحد بوكفاته

🍂🍂🍂🍂🍂🍂

ابن علي حيدر دخيلة
امعدلة اوصافه وفعالة
لمن يطب عركة وثگيلة
ابد ولا واحد دنالة

تتراكض الزلم طب ليها گمر
حيد وعلى الحرب تعويدة گمر
يرعد اذا نزل و بهيبة اللوة
يا محله شمرته وترتيبه گمر

گمر گمر .. محلا اسمه ولونه
گمر گمر .. كافل يسمونه
گمر گمر .. يا دخيل عيونه

🍂🍂🍂🍂🍂🍂

حي الله حاميها الحراير
بكل عركة چفينة تبادر
من الزغر اسمه المقاتل
شيخ الزلم بافعاله ثائر

من يغضب الفحل شيسكته گمر
يسحگ على الزلم ما دامه گمر
محلاها من ترف بچفوفه رايته
وريشاته للعدو معروفة گمر

گمر گمر .. من يطب للحومة
گمر گمر .. ماكو كلمن يومة
گمر گمر .. بسيفه خله اعلومة

🍂🍂🍂🍂🍂🍂

كض الارض بيده ولواها
والمعركة مفرع اجاها
ما ينحني راسه المحارب
وروس الزلم وصلت سماها

يترهدن ويطب يا هيبة گمر
سيد على الحرب معروف الگمر
من يدخل الوغى ما تبقى اي زلم
بچفوفه من يهد بتار الگمر

گمر گمر .. بچفه شايل راية
گمر گمر .. ثابت اصله وراية
گمر گمر .. شيخ المسناية


مهند الشاكر

شور




رادوني كوه انسه العشك ما اسولف بأسمك بعد
وانته الترافكني نفس من شيبتي لحد المهد
انتة التدگ جوة الصدر ما عندي غيرك اي عشگ
عطرك على سنيني انچفه فاح وعلة الرية كعد


شگد اجت ناس بحياتي شگد مشت
وانة ما همني الاجت والما اجت
شما خذاني الشيب اغفه اعله الجروح
وچنها هسة لوعه امصابك بدت


كاتنلي القهر .... مابطل دمعاتي ونحيبي
بعيوني سهر .... اسهرلك واقرالك حبيبيى
راسملك صور .... يا حرزي وسر شوگي وطبيبي


****

من زغري عايش محترگ گلبي انچوة وبزني السهم
بس انتة سالفتي الصدك وسوالفي بغيرك وهم
ما عندي غيرك وانجرح بس انتة جرحي بكل وكت
اتذكرك بأول عطش وتگبع بنار الخيم


علية عادة ابچيلك و حالف يمين
ما اعوفن مجلسك درعي الحصين
قبلتي وديني فقط درب العزاء
والتشدلي احزامي هية ام البنين

ناذرلك دمع ... ما يخلص كل عمري وسنيني
يلعشت برمح ... وجروحك دلني اعله ديني
ما شفت الصبح ... اسود كلشي يمر اعله عيني

****

رجلية تاخذني الك ما عندي غيرك اي درب
لوما ادگ ضلعي بلطم چا المن يدگ الگلب
رافعلي راسي اعله السمه بس انتة راسك عالرمح
لاحاني چفك من ضعت تايه جنت بين الغرب


انعم الله اعله الدمع واعله الجراح
بية عاش مصابك وكلشي استباح
اني مو عاشگ اذا يوم اغفه ليل
واني مو زلمة اذا مرة استراح

روحي بمجلسك ... متعودة اعله حرورة لطمتي
بجرة محبسك ... انسة اسمي وكل اهلي وضحكتي
تدري اتنفسك ... يا مالك وجداني ودمعتي

****

هايم صرت بيك وعشت دين المحب شوگ وسهر
الما لاحه چفك ينسي وزايد يصير اعله البشر
هنيالي چي عاشگ نحر سواني زلمة من العدم
وي عينك عيوني انطفت وي الضلع گلبي انكسر


انتة رب جروحي احبك حب هيام
گلبي يرفسلك مثل ذبح الحمام
انتة المخليني اعيش ابهل حياة
والمفيي عليه من في الخيام

ايام السبي ... عيشني يلضايع دلالك
وي حرگ العبي ... احرگني يلمحد بچالك
ما عندك نعش ... وتفرهد بالهيمة حلالك


****

عكس البشر من اختنگ اشتمك وما اشم هوة
جرحك اذا لحظة يمر لجروحي يتفصل دوة
سيد علة ضلوعي صرت انتة الگلب مامش گلب
العايش بظلمة وحزن تفزعلة رازونة ضوة


عايش بخير الله وبگمرة ضواك
انا الامنيته يحصل بس رضاك
مدلي ايدك لا تضيعني امنديك
وجهك انطيني ولا تنطي گفاك


عاهدتك عمر ... يل خيرك تارس ملكه عمري
كل لحظة التمر ... تسحك خيل الاه عله صدري
عايش بس الك ... يا نسمة اعله ريه انته تسري


مهند الشاكر

هسة صرت انة اليتيمة يا علي صرت الغريبة
كبالي نعشك من اصدن تشتعل بية المصيبة
شلون اعاين يمي طايح لحيتك بوية خضيبة

بس شمات البصفي
وي نعشك ردت نعشي
روحي ما تحمل يبوية هلجروح

مليت ونفذ صبري
ما اريدن بعد عمري
ارد اروحن باللحد يمك وانوح

####

لو رحت ياهو اليضلي وينغر ويفزع الية
من اضل بغير كافل وحدي وي جيش ال امية
تلتم عليه المصايب باجر بهيمة وسبية

من ديرة لعد ديرة
باجر حيرتي حيرة
امنيتي تبقى يمي تفتحها العيون

يا بوية انكسر ظهري
باجر ينسبي خدري
ياهو يبقى يمي ويحامي الضعون

####

شلون اعيش ابلاية عينك انة المدللها ابوها
شلون بية گلي روحي تنتظر هلبت تجوها
انة هسة الراح ابوها وباچر يذبحون اخوها

لا كافل يضل يمي
والمن اشتكي همي
كلشي بية يصعب وصاير يعيل

انده ما ترد لية
وكل ظيمي سده علية
عيني ملتها البچي وما ضلي حيل

####

اندارت الدنيا وهواها التمت عليه المصايب
اليوم ابوي بدمه طايح عيني شافتها العجايب
مرة انده گوم لية ومرة افكر بالخرايب

وحدي وفارگت روحي
وزادت كلش جروحي
روحتك مو هينة بوية شهلمصاب

ابچيلك تصب عيني
يمفاركها چفيني
ميتة كون بروحتك طمني التراب

####

مهند الشاكر

(( دكة ونص )) او (( شور ))




يكفال وعلومك
(( لا يضاهيك احد وقت النزال ))
يقهار يا هيبة
(( انت كالرعد اذا حان القتال  ))
يعباس ترتيبك
(( انت الأول بين مجموع الرجال ))


بخزراته ما يبقى بالحومة خيال
حيد وابد ما صح لافعاله رجال
لو طبها بچفوفه ضل يلوي بالكاع
ومن يرعد بصوته تنهد الاجبال

لا ما تصح ناس .. يعباس .. امثالك
يشهدلك الكون .. يميمون .. بفعالك

★★★★

طب ونار بچفوفه
(( انزل البأس بهم وقت الشداد ))
والمتون مهيوبة
(( هذا صنع الله في خير العباد ))
عصف ريح صولاته
(( اهلك الكفر كما هود وعاد ))

بالعركة ما يسكت طبلها هبهاب
سوة العمايل غاد وافعاله تنهاب
سككت لسنهم گام ضل يفرك حلوگ
ما يرضة بالشينة طاريه ينجاب

طبلها دهدير   .. گام يزير .. بالحومة
من الله صنديد .. راح يزيد   .. بعلومة

★★★★

يضرغام والحيرة
(( ملأت كل الرجال في الفلول ))
گمر جاي من هاشم
(( اسمه العباس بن فحل الفحول ))
برز شايل غيرة
(( من ذا لا يعرفني كان يقول ))

من زغره متعود صمصامه معروف
كلشي يعرف بس لا ما يعرف الخوف
طشر زلمهم صار بالحومة بركان
ما يهتم لواحد داساها السيوف

يمطر غضب صار .. والاقدار  .. بعيونه
ضل يسحك الروس .. والانفوس .. مدفونه

★★★★

الجيوش والعسكر
((  كل شيء صار لا شيء سواه ))
توصط قادتهم
(( ارعب الجيش وقد نال مناه ))
شلع ساس القادة
(( هو نسل الحيدر الكرار اباه ))

داس الجماجم حيل واحتارت الناس
جيش بسبع تالاف وبوحده عباس
سوا اليريد يصير وبكيفه سواه
صاب العساكر خوف طكاها وهواس

تترادم بخوف .. والسيوف .. مطروحه
ريشاته من شاف .. گام يخاف .. من روحه

★★★★

مهند الشاكر

#ياثاني_زهراء
الشاعر #ابو_ضامن_محمد_الزيدي
الشاعر #مهند_الشاكر

دخيل ام القمر ( ام البنين )


ياثاني زهراء دخيل عيونج

★★★★

كتبو عليج شكد صور بس انتي احلى من الصور
يحزام يالوكت الحرب حيدر يشدج عل ضهر
لضعون زينب جم نهر وديتي من طب العطش
وحسين من احتاز اخو جبتيله مو اخو كمر


اليحجي بيج يعيش لازم عمرين

بم البنين السالفه مطوله هواي

مشكورة يم عباس جبتي العباس

من عندج اول ماطلع جايب ماي

والطف بعدله هوايه ؛؛؛؛؛؛وعباس شايل رايه

يالحته جبريل يصلي متونج
ياثاني زهراء دخيل عيونج

★★★★

يمعدلة وگول وفعل كرار چنچ بالعزم
يمخلفة رجال وكفو خيال من الله وشهم
حيدر خذاج بكل فخر معروفة عدكل العرب
بدوية تاچ اعلة السلف وعدال ميه من الزلم


عندج اولاد بكل حرب چنهم نار

مامش خفيف البينهم كلهه ثكال

جانو زغار ومايلبسون كماط

ازغر كمر بيهم تلبسينه عكال

إكبار كلهه وقاده ؛؛؛؛؛؛ وعكال راس الساده

بالهيبه والزود تره يشبهونج
يا ثاني زهراء دخيل عيونج

★★★★

تسوين شارب كل فحل بأفعالج تسولف غرب
والضايع اسمه من الزلم انتي التدلينة الدرب
يمعزبه شيبات اربعه عزوبيه عندج تختلف
تعزبين وين البي ضوه والينحط بنص الكلب


يا بخت هاشم گلتي عيب اعلة الخوف

تنشاف زينب فشلة من هاي الناس

طشيتي ولدچ صارو بسد الشوف

والخيم غطاهن ردان العباس

وولدج اطولج كلمة ؛؛؛؛؛؛ اليرجع عدل مو زلمة

وذباها الجفوف كفيل ضعونج
يا ثاني زهراء دخيل عيونج

★★★★

شرد احجي يا أول مره خلقت وفه من العدم
اول اسم من ينكتب فوك الورق يبجي القلم
يا حرمه غيرج تنعبد لمن يحل فرض الوفه
بس انتي سلمتي تره عين ابنج لعين السهم


يم البنين شواية الله على الخوف

مو زلمه نيزك جايبتلج ويطوف

بلقيس لو شايفته شيعيه تصير

عرشين شايل بيده لا موش جفوف

لوشافه موسى يطوفه ؛؛؛؛؛يفلق بحر بجفوفه

يمخلفه عباس كمر من لونج
ياثاني زهراء دخيل عيونج


★★★★

ام الكرم وام العشك وام السوالف والهلا
لو صحنه يا ام الكمر تاخذ تحيه كربلا
قران وبهيئه مره ونرتلج شوك ودمع
اسمج قبل كل فاتحه معناها اسمج بسمله


ام البنين اعظم اسم للخدام

يقرونه كبل البسمله امن يلطمون

وكت المجالس توگفلهم بالباب

هيه التشد مجلسهم امن يتعبون


كل مجلس تلاگيهم ؛؛؛؛؛؛تبجي وتسلم عليهم

هنيالهم بيج اليخدمونج
ياثاني زهراء دخيل عيونج

★★★★

محمد الزيدي ...مهند الشاكر