دي واحدة من خطط الشيطان انو يخوفك من المستقبل.. دايما تكون بتفكر ح يحصل شنو لي قدام واغلبها افكار سلبية.. تكون دايما خايف انك ما تنجح .. خايفة انك ما تتزوج.. خايف من المرض، من الفقر .. الخ بخليك دايما خايف ومركز على الأفكار السلبية.. وممكن الحاجة دي تخليك تنسى النِعم الإنت فيها وتنسيك انك تشكر ربنا عليها وانك تستمتع بيها لأنو دايما تفكيرك وخوفك من المستقبل مسيطر عليك.. فيا صحبي لما تجيك الأفكار دي استعيذ بالله من الشيطان الرجيم.. وانقل تفكيرك من الخوف للشكر والإمتنان.. اشكر ربنا على كل النعم الإنت فيها.. الشكوك والخوف من المستقبل وغيره كله من الشيطان عشان يخليك حزين ومنكوب وزهجان والدليل على الكلام دا قال تعالى: ( إنما النجوى من الشيطان ليحزن الذين آمنوا وليس بضارهم شيئا إلا بإذن الله وعلى الله فليتوكل المؤمنون) عشان كدا يا اخوي احسن الظن بالله.. وتوكل عليه وما تدي ثغره للشيطان عشان يخليك تحزن ربنا سبحانه وتعالى قال في الحديث القدسي (انا عند ظن عبدي بي) .. وقال: ( لو أن أولكم وآخركم وإنسكم وجنكم قاموا في صعيد واحد فسألوني فأعطيت كل واحد مسألته ما نقص ذلك مما عندي إلا كما ينقص المخيط إذا غمس في البحر) سبحان الله خزائن ربنا مليانه شوف لو سأل اهل الأرض كلهم الله عز وجل من كل شيئ قروش نجاح زواج شغل عربيه...لخ ما ينقص من خزائنه شيئ بس زي الخيط لمن تغمسه في البحر والمويه اليتبله بيها بس دا البينقص انت متخيل يا حبيبناا الحديث دا عشان كدا اصلو ما تحزن (الشَّيْطَانُ يَعِدُكُمُ الْفَقْرَ وَيَأْمُرُكُم بِالْفَحْشَاءِ ۖ وَاللَّهُ يَعِدُكُم مَّغْفِرَةً مِّنْهُ وَفَضْلًا ۗ وَاللَّهُ وَاسِعٌ عَلِيمٌ). احسن الظن وعيش يومك مرتاح 💙