الشاعر رياض الرسل الجابري

نزله بحق الرسول (ع)






لجل ابوهـا اتنادي
اليوم راح الهادي
وتنحب الزهره



مايسرك حالها الليله وحزينه
على الهادي تنحب وبره المدينه
والمثلها بهل مصاب الله اليعينه
والگلب مـن القهـر ذاب ابونينه
عالمشه وخلاها مابطل مبچاها
وتنحب الزهره




چان ونها ينسمع لمن اجوها
الگوم رادو أبد ماتنعه ابوها
هاي اخلاق السقيفه الاسسوها
اتفقو وبره المدينه طلعوها
طلعت ومجبوره تنعه بس مكسوره
وتنحب الزهره




الهادي يستاهل اذا تبچيله دمعه
الزهره تاخذ دمعتك تنطيك شمعه
مثل ماتبچي اعله ابوها اعليك تنعه
الف هنياله التحبه ينول رفعه
اتصب دمع متبالي لجل ابوها الغالي
وتنحب الزهره




الهادي ودعنه وترك عدنه علامه
بخطبته الوصه بعلي ونهج الامامه
الهادي راد الناس تنعم بالكرامه
بعض من اصحابه ماسمعو كلامه
الزهره تعرف بيهم رفضت اتحاچيهم
وتنحب الزهره




نية اصحابه البعـض لا مو شريفه
الهادي لمن مات نصبوهـا السقيفه
خل نصيح بصوت كلنه ابلاي خيفـه
يبقـه حيدرنه علي اول خليفه
على الهادي بدمعه بت ابوها وتنعـه
وتنحب الزهره






لاتنسون والدي ووالدتي وأبني عباس من الرحمه والغفران
خادمكم رياض الرسل الجابري

موشح للرسول الكريم (ص)




شلون حال الزهره هسه بيا وضع
عين عالوالد وأيد اعله الضلع
١

المصطفى بآخر نفس واتصد عليه
بالمدامع حايره ولزمت أديه
احجي يابويه تگله وترتجيه
حچه طه بصوت بس ماينسمع
٢

حچه طه وسكت واتعالت اصوات
ناده جبرائيل بين السماوات
الدنيه فالتحزن محمد رحل مات
ولازم الجثمان هسه ينرفع

٣
گبل ماينرفع جثمان الرسول
اتصور انته بيا وضع حال البتول
تبچی تنحب حايره الليله أشتگول
ساكته ومذهوله وتصب الدمع
٤

شمته بصدره وتحس ذابت الروح
حايره الزهره بدمعها والجروح
على الوالد تبچى بالمدمع تنوح
وروحها ذابت تحس مثل الشمع
٥

يمها حيدر عاش لحظات الحزن
اعز ناسه ايفارگ الليله ویون
يدري كلش صعبه ساعات الدفن
دفن روحه وحگه حيدر ينصدع
٦

حمل نعش المصطفى وبالگبر صار
نزله بأيده علي بحيره ومرار
من نظرله جنه مليانه خضار
وجه طه المصطفى نور ويشع




لاتنسون والدي ووالدتي وابني عباس من الرحمه والمغفره
خادمكم رياض الرسل الجابري

تجليبه الرسول الاكرم (ص)




محمد من رحل هالقصه مرويه
بعد حجت الوداع اهدعش هجريه
١

بعد رحله طويله ايعيشها المختار
نشر دعوة اسلامه البيها چان اسرار
من مكه واليثرب دعوته والغار
ما چل وتعب والدعوه يوميه
٢

صحح كل مسار العالم الفقره
الچانت گبله وادم تمشي عالفطره
اعلن دین بارینه ابو الزهره
بأخلاقه وأفعاله الكلها عالنيه
٣

سيد عالبشر والدنيه والاكوان
کلش زين عرفوها محمد چان
الباري کرمه وانطا وجاها وشان
وترس گلبه ترافه اوفه وحنیه
٤

خطب خطبت وداع بعالمه وناسه
وملائكة السمه والدنيه حراسه
خل نسأل محمد وين حط راسه
بأخر لحظه لمن مات تاليه

٥

مات بيا حضن نسأل ونعرف وين
بحضن حيدر وينظر جان عين بعين
عين المصطفى غمضها ابو الحسنين
القصه واضحه وماضنها منسيه
٦

بأمر رب الجلاله من ختم عمره
محمد بين حيدر چان والزهره
نادت بالدمع فاطمه وبالحسره
صد ليه حبيبي وعاين اعليه

٧

مالحگ يعاين من مشه المختار
ينظر للزجيه وحيدر الكرار
عيونه غمضت بس بيها جان اسرار
واتضل للأبد اسراره مخفيه




لاتنسون والدي ووالدتي وابني عباس من الرحمه والمغفره
خادمكم رياض الرسل الجابري

حال الامام علي بفقد الرسول



حيدر والأسرار
هالليله محتار
يرحل المختار
والدمعه بعيونه
١

حيدر بدمعات عينه ولزم ضلعه
والنبي بحضنه يودعه ويهل دمعه
ينادي جاوبني حبيبي ومايسمعه
يعني حيدر مايسر هالليله وضعه

بالدمع صاح
انته روحي وكل هلي
بالدمع صاح
ايموت من بعدك علي

لا ترحل اليوم
والگلب مالوم
بي يدري مسموم
والدمعه بعيونه
٢

اجه ملك الموت يستأذن حضوره
ايگله قابض للنبي وينقل الصوره
والنبي بآخر نفس يحچي وشعوره
يگله جبرائيل خل يحضر بنوره

نزل جبريل
بالدمع لمن حضر
نزل جبريل
ايبلغه بهذا الخبر

تنتظرك الحور
والجنه والطور
ينظر بيا نور
والدمعه بعيونه
٣

قبل قبض الروح لحظات المصيبه
والنبي المختار ينظر للحبيبه
فاطمه وگلها تعالي بنص نحيبه
هاي لحظات الوداع اشگد عصيبه

بالدمع صار
اوداع دمعات السمه
بالدمع صار
النبي ايودع فاطمه

والزهره بجروح
عالوالد اتنوح
وحيدر بلا روح
والدمعه بعيونه
٤

طه تنحب فاطمه لمن سمعها
رفع أيده ونشف بأيده دمعها
عاين الخدها النبي وحار بوضعها
اتذكر البسمار والباب وضلعها

آخر وداع
بين دمعات الحزن
آخر وداع
فاطمه تنوح وتون

ودعها بدموع
والنبي مفجوع
والصوت مسموع
والدمعه بعيونه
٥

غمض عيونه النبي وحيدر ينظره
والاملاك تنوح والموقف اشكبره
حيدر احتار بدمعته ونار صبره
ينظر اعله النبي لو ينظر الزهره

بدمعه محتار
ايودعه بدمع الصبر
بدمعه محتار
ويمه فاطم تنتظر

بعد المعانات
ظلمه السماوات
شاف النبي مات
والدمعه بعيونه



لاتنسون والدي ووالدتي وأبني عباس من الرحمه والغفران
خادمكم رياض الرسل الجابري

قصيده بحق الرسول الكريم (ع)




الليله الزهره اتودعه
واعله الوالد تنعه
وتنادي بيا دمعه
يابويه    يابويه
١

العاشت روحه بين الناس گعدت يمه بالدمعه
الزهره اتگله احچي وياي خل اشبع حچي وانعه
يسمعها ويحس محتار الزهره ورايده اتسمعه
يحرك بيها صوته احساس أبوها گبل لتودعه

تنظرله وتتأمل
وتشم بي لا ترحل
ابنيتك ما تتحمل
يابويه    يابويه
٢

خل نسمع وحي الارواح من تتلاگه حنيه
الزهره والنبي روحين يتلاگن ابفد  نيه
لا تحرمني نظراتك يبويه وعاين اعليه
خليني بوداع الموت اشبع منك اشويه

بين وداعك روحي
تنزف گام جروحي
ادري تحس بنوحي
يابويه يابويه
٣

النبي حاچاها آخر صوت ويعاين مدامعها
راد الدمعه يمسحها بخدها وأيده يرفعها
رفعها وذكر چف ملعون الخد الزهره يصفعها
بين الباب والحايط لمن گام يدفعها

ودموعه التجاره
تنظرله ومحتاره
اتگله وتسعر ناره
يابويه يابويه
٤

خاف ايسولف الأخبار ألها ويشرح بعبره
خاف ايجيب طاري النار والباب وألم عصره
خاف المحسن ايمر بيه ويحچي عنه ويذكره
ضل ساكت وينظر گام الخدها ويذكر السطره

ما راد ايأذيها
يدري اشصاير بيها
والزهره يحاچيها
يابويه يابويه
٥

سلم للقدر مابين روحه من الجسد تطلع
و روح الزهره عالمسموم بين الآه والمدمع
آخر كلمه نتلاگه گلها وفاطمه تسمع
وعيون النبي بحسرات ألها ايعاين وتدمع

عاينها بنظراته
ويهلن دمعاته
ودعها بحسراته
يابويه يابويه





لاتنسون والدي ووالدتي وأبني عباس من الرحمه والغفران
خادمكم رياض الرسل الجابري

كعديه للرسول الاكرم (ص)
مادار لحظة وفاته




الليله نادتك كل هاي الاملاك
يا سيد البريه
بدمعه وحزن وفراگ
الباري الك مشتاگ
يا سيد البريه
١

ربك الليله بقراره قرر السيد البريه
اله ملك الموت يبعث بين لحظات المنيه
ومن دخل يم ابو القاسم اثنينهم صارو سويه

سلم عليه واستأذنه
والنبي ينظر عاينه
قابض يگله جيت انه
أمر ربك مو بديه

لكن خيرك لو رايد اتعيش
والعيشه هنيه

شتقرر يمختار
انته بكيفك اختار
يا سيد البريه
٢

جاوبه المختار امهل خلي جبرائيل يحضر
ومشه ملك الموت عنه والوكت بالحزن يفتر
هاي اول مره صارت نبي وبموته ايتخير

ها رحل باقي وما رحل
تنتظرك الدنيه أمل
اشگد صعبه لحظات الأجل
ويمه گاعد چان حيدر

طه ينتظر جبريل ويشوف
لحظات المنيه

الدنيه اتعيش لحظات
مابين السماوات
يا سيد البريه
٣

هبط جبرائيل عنده سلم وأده التحيه
وگله ابشر يامحمد ربك أشتاگ النبيه
وتنتظر املاكه كلها والسماوات العليه

يانبي الأمه الخاتمه
اشتاگت الك حتى السمه
وبعدك تحضرك فاطمه
وياك بالجنه سويه

حسن الخاتمه من باري الاكوان
هاي اللحظه هيه

بالدنيه نصيبك
رايح يم حبيبك
ياسيد البريه
٤

طلب من جبريل طه هسه ملك الموت يحضر
أجه يمه وقبض روحه وراسه چان بحضن حيدر
بعقلك اتصور يسامع انته واتخيل المنظر

حيدر يهل گام الدمع
وحس انكسر عنده ضلع
ذاب الگلب مثل الشمع
عالنبي الچان اله مصدر

سلم للقدر حيدر بدمعات
ومحاضن سويه

ما يصبر بلياك
حيدر هسه ينعاك
ياسيد البريه
٥

بحيره ظل مذهول حيدر الزهره يمه وهل دمعها
تنظر النور ابو القاسم وگام يلچمها ضلعها
حضنته وشمته بصدره موته ياوسفه فجعها

ودعها والدها ورحل
ماظل بعد عدها أمل
والأجل محتوم الأجل
ازغيره بس طفه شمعها

ظلت تنحب وتنظر لبوها
وتنادي بدمعها

بنتك ياوليها
هذا الصار بيها
ياسيد البريه


المصيبه


غمض عيونه ابو القاسم رحل بسهام المنيه
من رحل مسموم طه وظلت اتنوح البريه
وگاعده بدمعه تنظره فاطمه الزهره الزچيه

راح وتركها بالدمع
والزهره بعده تنفجع
بالسطره وبكسر الضلع

هيچ راح يصير بيها من بعد مايمشي عنها




لاتنسون والدي ووالدتي وأبني عباس من الرحمه والغفران
خادمكم رياض الرسل الجابري

كعديه اربعينيه


لسان حال المواكب والخدم يقول بعد انتهاء الخدمه الاربعينيه




ياناس ياناس الخدمه انتهت ياناس
من زينب المسبيه
الحد الاربعينيه
الخدمه انتهت ياناس

١

صار کومه ايام نخدم حتى نستقبل ضعنها
من اجل زينب اجينه جينه وانشارك حزنها
زينب الراحت أسيره وعافت حسين اوطنها

احنه المواكب والخدم
نتلگه اخت راعي العلم
نتحزم بدمع الآلم
بلچي وانخفف آلمها

بدموع بدموع نتلگاها بدموع

من يوم المشت هيه
الحد الاربعينيه
الخدمه انتهت ياناس

٢

جينه فرحانين نخدم واحنه نشعر هذا واجب
عالطريق انجوم نشعر وبالسمه نشعر كواكب
لجل زينب الله رايد نتصب هاي المواكب

مو هاي فرصه من العمر
ننصب مواكب ننتظر
يمكن المهدي من يمر
للخدم بالسجل كاتب

عنوان عنوان الخادم عنده عنوان

معروفه معانيه
الحد الاربعينيه
الخدمه انتهت ياناس

٣

بربعين حسين نحضر الزينب انجدد عهدنه
انعوف كلشي انضحي كلشي وابد كلشي مايردنه
هواي مطلوبين احنه ومنوفي احنه بعدنه

رغم الصرف رغم البذل
نقطه ابحر ما ننجعل
منوفي عبدالله الطفل
لون ضحينه بولدنه

هيهات هيهات لا منوفي هيهات

امن اقصه الكره الارضيه
الحد الاربعينيه
الخدمه انتهت ياناس

٤

هنه ايام ويخلصن أربعين حسين فتره
من شروط الخدمه لازم الخدام يحصله نظره
يجوز يخدم يجوز يتعب لكن الزهره تعبره

بالزهره لازم تمتثل
حتى بخدمتك تنقبل
زينب ترفعه للسجل
والتوقع بي الزهره

اخلاص اخلاص تريد الزهره اخلاص

تريد الخدمه عالنيه
الحد الاربعينيه
الخدمه انتهت ياناس

٥

انتهت خدمتنه العظيمه انتهت رحلتنه الطويله
تريد معناها تعرفه الخدمه للجنه وسيله
انبيع كلشي العدنه احنه وتقبل اعلينه العقيله

بياحال هالليله الخدم
يبچون بدموع الندم
لا رايه ظلت لا علم
الموكب الليله رحيله

يبچون يبچون الليله الخدم يبچون

من دمع الحسينيه
الحد الاربعينيه
الخدمه انتهت ياناس


المصيبه


الليله راح اتصير وحشه والخدم چنها برزيه
اصعب اللحظات تصبح لو اجتي المغربيه
فارغه كل الشوارع چنها شهكات المنيه

كل المواكب تنسحب
وحشه تعاين عالدرب
ماتحمل الموقف صعب

من تلاگي الخدم كلها تنحب وتبچي سويه







لاتنسون والدي ووالدتي وأبني عباس من الرحمه والمغفره خادمكم رياض الرسل الجابري

نزله اربعينيه




انظر سواد الزوار
والمرقدك مشايه
١

نوح طالع بالسفينه ايقودها
والسفينة الكربله مكصودها
بالبحر والارض احنه اجنودها
ماكدر واحد يحد احدودها

هاي الخدم رايه وعلم
تحملها
ارض الدمه حتى السمه
تندلها
نمشي بعزم حتى الزلم
توصلها

هوسه
ونشعر احنه بعباس يتلكانه

٢

ياسفينة حبنه يامعشوكها
انته للمشايه سرها وشوكها
لو أجه ضعن السبايه ونوكها
جنح جبرائيل رفرف فوكها

محد كدر يمحي الأثر
والرايه
من تنرفع يطلع دمع
وفايه
من زاخو والحد كربله
مشايه

هوسه
من نوصل يم حسين نلكه الزهره
٣

أربعينك تبقه هاي ايامها
كل مواكبنا ترف أعلامها
الدنيه خل تكتب جميع اقلامها
عالزياره وعن كرم خدامها

هذا الكرم من الخدم
رباني
قصة عشك لمن تدك
عنواني
تاح الشرف لابس أله
خلاني

هوسه
وايلوك اعله الخدام تاج الغيره
٤

سفره ممدوده صعب مقاسها
كل ملائكة السمه حراسها
والمواكب بالسمه ايطخ راسها
تسمع اتفضل تكلك ناسها

طول الدرب انته المحب
من تطلع
وبكربله غير الهله
ماتسمع
عندك هدف شايل شرف
من ترجع

هوسه
والرايح زار حسين حضه اشكبره
٥

الله خله بأربعينه اسراره
من طلع عباس تزهي انواره
اينادي اهلا مرحبه بخطاره
وضل حبيب ايسجل بزواره

بهذا السجل من تنقبل
خي عونك
لاتعتقد اهل الكرم
ينسونك
شاهد تضل هذا الأمل
بعيونك
بحب فاطمه اهل السمه
ايعلونك

هوسه
هاي البشره من حسين للمشايه






لاتنسون والدي ووالدتي وأبني عباس من الرحمه والمغفره خادمكم رياض الرسل الجابري

قصيده رباطات هوسه للمشايه



هاي الرايه من العباس
وجينه انزوره
١

ياشيخ وبنص الزلم لمن رفعت الرايه
گاصد حسين برايتك وچفوفك محنايه
افعالك الماتنوصف لمن تسولف آيه
عباس ناده بالصحن ياهله بالمشايه

واحنه انرد اعله العباس
بصوت وصوره
٢

اعدادنه الماتنوصف مثل المطر هدينه
نحضر انجددلك عهد للموت ياوالينه
مشايه وبهاي السنه عين الشمس سدينه
احنه مجانين العشگ لحسين واتسمينه

مجنونين وتاج الراس
حسين الوالي
٣

زامطنه وافعال الزلم وازماطنه ايعرفونه
گد الكلافه بالوصف والوادم يسمونه
عشاگ ابو اليمه وأبد مانصبر احنه بدونه
واحدنه من يمشي بخت وامبين من اعيونه

تمشي وشايل حب حسين
بنص عيونك
٤

مشايه اهل المرجله وشيوخ عد الوادم
كل عام من نمشي الك خادم يوصي خادم
بالك تزعل بالدرب خادم وتزعل فاطم
من بيتك الحد كربله ظل بأمامك هايم

من تصبح عاشگ مجنون
وچنك عابس
٥

كل واحد يشد العزم مشاي هاي افعاله
يگصد مضيف اهل الوفه
يابخته ياهنياله
زينب يواسيها بدمع لو شاف هاي الحاله
ضعن الحسين ايشاهده وبدمعته الهماله

الليله حسين ايريد دموع
الخاطر زينب
٦

كل خطوه تخطيها بدمع من توصل المظلومه
زينب وتاريخ البخت يحچيلك المعلومه
راية نصر رجعت ترف بيها وجميع واعلومه
عباس وعگال الزلم لحسين هذا ويومه

اكبر شيخ بهذا اليوم ايذب اعگاله




لاتنسون والدي ووالدتي وأبني عباس من الرحمه والمغفره خادمكم رياض الرسل الجابري

عندما عادت زينب من الاربعين



اجت من اليسر دمعه
تنوح الفاگده وتنعه
الميامين
وصلت كربله اتوجهت
بس وين الگبر سألت
على حسين
١

وصلت وبدمعها احتارت اتروح
تسأل بس گلبها امخزن اجروح
تريد اتشوف گبره تبچي وتنوح
حتى اتصيح گوم اگعد يمذبوح

تمنت تگعد بكتره
اخوها وتبچي يم گبره
بالدموع
من الشام من وصلت
بس وين الگبر سألت
على حسين
٢

مابين الگبور اتوجهت وين
زينب وبهضمها ودمعت العين
يبن أمي اجيت ودربك امنين
دليني اعله گبرك خويه يحسين

يمن عمري فده العمرك
حبيبي حسين يم گبرك
بالهموم

گعدت لچن تتلفت
بس وين الگبر سألت
على حسين
٣

بدمعها گعدت وذيچ الرزيه
تشرحله هضمها والاذيه
اجيتك لاچن الاصعب العليه
يخويه احسين من عفنه رقيه

غصب ياخويه عفناها
بأرض غربه ودفناها
بالأحزان
رقيه ازغيره متحملت
بس وين الگبر سألت
على حسين
٤

بعد ماضاگت اعليها الوسيعه
گامت راحت الصوب الشريعه
تنادي بحيره وهموم وفجيعه
اگعد خويه ابو چفوف الگطيعه

تعنت صوب كافلها
اخوها الگبل دللها
بالضعون
راحت يمه ماصبرت
بس وين الگبر سألت
على حسين
٥

ملك الموت حايل بينك وبيني
زينب اختك آنه ماتحاچيني
گوم اگعد وشاهد دمعتي بعيني
والصوب المدينه اردود وديني

اسولف وانته تسمعني
دگوم وياي رجعني
يعباس

اختك بعدك اتحيرت
بس اعله الگبر سألت
على حسين




لاتنسون والدي ووالدتي وابني عباس من الرحمه والغفران
خادمكم رياض الرسل الجابري

موشح أربعين رقيه



ماذا تطلب رقيه من الزوار بالاربعين



ارد اوصيكم يهل مشايه
ادري بيكم يالخدم وفايه

١

للمواكب ارد ادز اني سلام
من رقيه واسمعوا هذا الكلام
أمنيه بأسمي ردت وانه بالشام
خل يعلكولي المواكب رايه

٢

يالنصبتوها المواكب والخيام
بالحسينيات والشارع العام
حاشه متقصرون لحسين الأمام
باجر انتو بالحشر ويايه
٣

يبو الموكب ردت والمشاي كون
طلبه تطلبها رقيه من تجون
اهدولي خطوات بعدد دمع العيون
وانه لدموع الخدم شرايه

٤

ابو الموكب من يخلي صورتي
وانه مجتوفه بحبل وي عمتي
ايذكر الوادم بهضمي وقصتي
بحبل أيدي تنزف امدمايه

٥

العني يسأل ليش للطف ماتجين
متت عالراس بگلب دامي وحزين
مارجعت وي الضعن بالاربعين
جروح بيه وذكريات اهواي

٦

لو وصلتو يالخدم والغايه وين
عني زوروا مرقده بدمعت العين
بالنيابه رايده بصحن الحسين
عن رقيه ازياره و اموصايه

٧

و روحوا للعباس عمي بحضرته
كون مخصوصه تصير ازيارته
من رقيه بعزم كل مشايته
حتى توصله الزياره هايه




لاتنسون والدي ووالدتي وابني عباس من الرحمه والمغفره
خادمكم رياض الرسل الجابري

اهوازيه للاربعين


زينب رجعت من الشام بليل الاربعينيه
كعدت يم كبر لحسين تنعه بطور لطميه


نادت زينب بدمعات وگفت عالگبر تنعه
فگ باب الگبر يحسين وبيدك نشف الدمعه
راح احچي واحس ياخوي صوتي رايد اتسمعه
ملهوفه واجيت بشوگ اجيتك بيه مابيه


فر بيه الوكت يحسين ولرض الشام وداني
اسيره امشيت من بعدك واطب ديوان خلاني
واسمع وادم بيا صوت واحد يحچي للثاني
هاي العافها العباس ومشيناها مسبيه


ترضه بدمعت المظلوم يخويه من تركتوني
اروح الارض بس شمات بيها ومايعرفوني
من وصلوني لارض الشام خرابه بنصها گعدوني
وأنه أم الخدر زينب الوادم تنظر اعليه


وگامت تمشي تتعـثـر والصوب النهـر راحت
وصلت يم گبر عباس اتراب من الگبر شالت
شمت ريحة الخوه بتراب الگبر صاحت
گوم اگعد واخذني وياك نمشي وراشده النيه


ضلت عالگبر بدموع تنحب والفكر مذهول
ترد لأم البنين شلون أذا تسأل عليه شتگول
حامي الخدر زينب وين أخوچ وبالضعن مسؤول
شجاوب من تشاهدني امشي ضلوعي محنيه


اعذرك خويه ياعباس ماقصرت ويايه
بس خويه العتب مريود يابو الجود والرايه
بس عندي خبر موزين اخبرك والحچي اهوايه
متحملت بأرض الشام اختك ماتت ارقيه




لاتنسون والدي ووالدتي وابني عباس من الرحمه والمغفره
خادمكم رياض الرسل الجابري

الاربعين
كربلاء تتكلم عن لسانها



كربلاء اتنادي يوم الاربعين
أدخلوها بسلامُ آمنين

١

كربله تنادي وين زواري
ارد احيهم هله بخطاري

هله بكل زاير يدوس اترابي
ذوله احباب الحسين احبابي

واليزورون
واليواسون

ياهله وميت هله بالزائرين
أدخلوها بسلامُ آمنين

٢

الشاب والشايب وابو العوجيه
من اناديهم هله بهل جيه

افرش اجناح العشك للملكه
وكلبي وياهم يدك فد دكه

لليحضرون
بدمع العيون

افتح اذراعي ونادي الكاصدين
أدخلوها بسلامُ آمنين

٣

من يجي بلهفه الزاير ويوصل
مني يسمعها الله يتقبل

ياهله بزوار نحر الضامي
تزهي بيكم تحله كل ايامي

من تكصدون
زينب أم عون

الكعبة العشاك انتم واصلين
أدخلوها بسلامُ آمنين

٤

الزاير بدمعه كل سنه اليحضر
ايحصل امراده من ابو الاكبر

أربعين حسين يالوفايه
للمواكب تبقه والمشايه

عابس وجون
يالتسمعون

نادو ابدمع المحاجر حاضرين
أدخلوها بسلامُ آمنين

٥

ليكم اتنطر حتى اخط عهدي
بالدمه وياكم يشهد المهدي

بدفتري الزوار كلها امسجله
حسين شرفني وجعلني كربله

واليسجلون
بيه يحجون

بسم زينب كربله واسم الحسين
أدخلوها بسلامُ آمنين

٦

ياهله ومرحب باليكصدوني
بيكم اتبارك من تشرفوني

دم ابو السجاد شرف كاعي
والسفينه احسين وانتو اشراعي

من تدخلون
بكاعي تبقون

بيكم اتبارك يزوار الحنين
أدخلوها بسلامُ آمنين





لاتنسون والدي ووالدتي وابني عباس من الرحمه والمغفره
خادمكم رياض الرسل الجابري

نزله أربعينيه الامام المهدي وعمته زينب (ع)





المهدي ناده عمتي وين
والدمع تارس العين
من حضر بالاربعين
ياحسين
١

المهدي ناده زينب المسبيه
بسيفي جيتج
بالاربعينيه

جيت مشاي بدموعي وقادم
فوك ضعنج يرف سيف القائم
بداعتج اقسم وداعت فاطم
بسيفي هذا مايضل كل ظالم
ياحسين
٢

جيتج قادم وبهاي الزياره
سيفي عمه معروفه اخباره

الدنيه تترقب جميع اخباري
وانتي ياعمه يزينب ثاري
الروس اگطعها امن اسل بتاري
واخذ المشايه كلها انصاري
ياحسين
٣

اوصل يمج ياعمه واشكيلي
ثارج وانتي لا مانمت ليلي

لحظه ما انسه الجره اعليچ وحصل
شلون شفتي حسين والراس انفصل
لو سمعتي المهدي قائمته وصل
اصلب الشيخين وي أم الجمل
ياحسين
٤

محد يقرب ياعمتي ليه
جيتچ اخذ ثارج يعلويه

ثار جدي المصطفى والانزع
والحسن وحسين لمن اطلع
ارد اصيح بصوت كلها وتسمع
اخذ الثارات كلها مربع
ياحسين
٥

ثارچ عندي وترفرف الرايه
بدمعي احضر انظر الوفايه

اخذت المشايه ويرف العلم
الها تبصم الج يازينب نعم
والنعم من الخدم اهل الشيم
امسجلين بدفتر الزهره خدم
ياحسين





لاتنسون والدي ووالدتي وابني عباس من الرحمه والمغفره
خادمكم رياض الرسل الجابري

قصيده للمشايه




جنود هبوا رايه تتبع رايه
راح تبدي ثورة المشايه
ثورة الحق المبين
وين اهل الاربعين
راح تبدي ثورة المشايه

١

وين اهل الحق جنود المنتظر
راح تبدي رحلة العز والفخر
بكل سنه المشايه تنقل هالخبر
لأن دم حسين عالسيف انتصر

تنقل اسرار الدمع والعايله
ويبقه مفتاح التواصل كربله

ناده صوت العاشقين
وين اهل الاربعين
راح تبدي ثورة المشايه

٢

وين ياشعب الحسين اليعربي
گوموا يلا استقبلوا بنت النبي
زينب الراحت بنيران العبي
رايه رجعت ترف من ارض السبي

وين اهل ياليتنا كنا معك
يلا امشي والملائك تتبعك

صوت يعلوا الخافقين
وين اهل الاربعين
راح تبدي ثورة المشايه

٣

ثورة المشايه من نحر الدمه
عاشت وكبرت وصعدت للسمه
خضرت خدام بجروح الضمه
ولا تزال الثوره عدنا قائمه

ثورة الحق مرت بكل السنين
خرجت ثوار من دم الحسين

ثوره وتنادي بيقين
وين اهل الاربعين
راح تبدي ثورة المشايه

٤

من اجل مشاية الحق والقيم
بكل شبر بالگاع من تنظر خدم
والنعم تربات شيال العلم
بيهم اتشم انته دخان الخيم

لجل زينب جددوا عهد الوفاء
بيها عرفوا رجعت الطف كربلاء

تنادي رجعت بالآنين
وين اهل الاربعين
راح تبدي ثورة المشايه

٥

رجعت الطف كربله بنت الكرام
رايه مرفوعه وعليها ايرف حمام
بت أمام وعالمه وأخت الأمام
بسيف اخوها ايقاتل وهيه بكلام

بين اخوها وكربله حلقة وصل
وثورة حسين اعله أديها تكتمل

زينب الحبل المتين
وين اهل الاربعين
راح تبدي ثورة المشايه





لاتنسون والدي ووالدتي وأبني عباس من الرحمه والغفران
خادمكم رياض الرسل الجابري

نعي فائزي حول نعش الامام الحسن والزهره الحسين يحضرون لدفنه






لجل الحسن حضرت تون أمه الزچيه
رادت تدفنه بالحزن هاي المسيه
١

ام الحسن حضرت تون والكلب مفجوع
وياها لحسين بحزن ناداها ويلوع
شفتي النعش نارج تشب مابين الضلوع
يايمه عوفيه للنعش خلي عليه
٢

نادت يويلي اعله حسن محد سمعها
وحسين اجاها الفاطمه ونشف دمعها
مدت اديها اعله نعش لزمت ضلعها
حنت ونت فاطمه ونه شجيه
٣

رادت تشيله للنعش والكلب محتام
بنعشك ييمه يالحسن
شعملو الظلام
اتشيل النعش من ياكتر وامزرف اسهام
راح اشتكي بيوم الحشر الله ونبينه
٤

كامت تحتاجيه للنعش بس ابدمعها
عرفت ابنها بالنعش حست سمعها
شافت اسهام البنعش غير وضعها
فوك الحزن فوك الدمع شافته اذيه
٥

حسبت اسهام البنعش وبدمعت العين
صاحت يويلي اعله حسن وتنادي يحسين
دليني يحسين الدرب وين الگبر وين
ارد ادفن وليدي الحسن
ناري سريه
٦

اهوايه السهام البنعش حسبتها كثره
رادت تدفنه للولد حارت بأمره
ماتكدر اتشيل النعش فاطمه الزهره
وي الحسين بيا دمع نصبت عزيه







لاتنسون والدي ووالدتي وأبني عباس من الرحمه والمغفره خادمكم رياض الرسل الجابري

كعديه للأمام الحسن بن علي (ع)




مسموم مسموم عدنه الحسن مسموم
زينب يمه وتنظره
نادت يمه يالزهره
هذا الحسن مسموم
١

بعد رحلة كل حياته وتضحياته وعظم صبره
هذا يمها الحسن نايم زينب بلوعه تنظره
اتعاين بدمع الرزيه صوب اخوها بألم عبره

تنظر اخوها بيا وضع
ماتحچي وتهل الدمع
زينب گلبها منفجع
اتعاينه بلوعه وبحسره

مطروح مطروح نايم يمها مطروح

بچبده تسعر الجمره
نادت يمه يالزهره
هذا الحسن مسموم
٢

چبده مسموم وتنظره زينب بدمع الرزيه
وتنظر العباس يمها ايعاين ويمه اخيه
عرفت اللحظات صعبه هاي لحظات المنيه

معقوله راح اتودعه
زينب تون بالفاجعه
ناده لحسين بمدمعه
رايدك بالغاضريه

لتروح لتروح ابقه ويانه لتروح

زينب تنحب بعبره
نادت يمه يالزهره
هذا الحسن مسموم
٣

اتمنت الزهره تشاهد تحضر بدمع المصيبه
شلون چبد الحسن ذايب والگلب شاجر لهيبه
الحسن ريحانة محمد صاير بحاله عجيبه

زينب تنادي يالحسن
لتعوفني بهاي المحن
باچر اعوف انه الوطن
وامشي للطف وغريبه

وهناك وهناك ابقه الوحدي اهناك

حسين ايطيح عالغبره
نادت يمه يالزهره
هذا الحسن مسموم
٤

آخر انفاس المنيه والحسن نايم ويسمع
طشت جابوله ويشاهد بالطشت چبده تگطع
والحسن لحسين گله خلي زينب خويه تطلع

بالطشت فرغ چبدته
والحسن ودع عيلته
زينب ينادي سمعته
شوف منكم رايد اشبع

بدموع بدموع زينب تبچي بدموع

ماتدري وعلى الفطره
نادت يمه يالزهره
هذا الحسن مسموم

٥

زينب اتشاهد اخوها يلفض انفاسه الاخيره
غمض عيونه وتركهم بين دمعه وبين حيره
هاي لحظات الموادع والحسن هذا مصيره

زينب بلحظات الصبر
تبچي ومدامعها جمر
يالحسن تدري وي الشمر
بكربله امشي اسيره

ميهون ميهون هذا اعليك ميهون

ابنچ محد اينصره
نادت يمه يالزهره
هذا الحسن مسموم


المصيبه


انودع بدمع النواضر يالحسن شخصك الليله
صعبه لحظات المدامع عالحرم كلش ثگيله
وزينب اتعاين لخوها والمحب گلبه دليله

راح ومشه بنار الضمه
واتشاهده املاك السمه
لو هسه تحضر فاطمه

اتشاهد المسموم ابنها ويمه محتاره العقيله





لاتنسون والدي ووالدتي وابني عباس من الرحمه والمغفره
خادمكم رياض الرسل الجابري

ميمر للحسن ابن الامام علي (ع)




ليل المحن
جور الزمن
شفناه بچبدك يالحسن
نعشك يضربوه بسهام حفنت زلم رمايه
١

لعبة لعب ياوسفه ذيج الأيام
عادو العتره من ظهور الاسلام
نعش الحسن بالحقد صابوه بسهام

بس بالأسم
لا مو زلم
الإسلام رادوه ينهدم
واتصدت وانطت روح ناس الصدك وفايه
٢

بعد الرسول ولوعته والمحراب
بالطبره راس المرتضى من انصاب
عالزهره هجموا واندفع ذاك الباب

ماضل أمل
بحقد وجهل
طبرو علي خير العمل
بسم الخلافه اينادون والكرسي جان الغايه
٣

والحسن يتصورون اصعب شده
والهذا من خذلوه صارو ضده
وادم تخطط والتنفذ جعده

بسم غدرته
من سمته
اينازع يلوب وعافته
جعده بحقدها المعروف بي جانت اموصايه
٤

جابو طشت والجبده نار وتسعر
وحسين رايد اخته بس تتكتر
زينب تشاهد خاف هذا المنظر

شيله صحت
هذا الطشت
وزينب لخوها تلتفت
وحسين كلف عباس وبهل مهمه هايه
٥

اتشيله الملائك للنعش وترفعه
واهل العرش تبجي الحسن بالدمعه
زينب تشاهد نعش اخوها وتنعه

حسين اندهش
نار وعطش
من شاهد اسهام النعش
مجبور يصبر لحسين من اجل تعله الرايه





لاتنسون والدي ووالدتي وابني عباس من الرحمه والمغفره
خادمكم رياض الرسل الجابري

موشح الامام الحسن (ع)




جمرة امصاب الحسن احزانها
بگلب زينب من تشب نيرانها

١

من زغرها وشبعت آهات ومحن
زينب اختك حيل عذبها الزمن
شاهدت بالطشت چبدك يالحسن
وگام تتغير جميع الوانها
٢

شاهدت حالك وانته بيا وضع
اگبالك انته الطشت وتصب الدمع
يالحسن صوتك بعد ماينسمع
اتصيح زينب والحزن عنوانها

٣

هذا حالك يالحسن من ودعت
اتنازع وچبدك يطيح بيا طشت
آخر وداع بحياتك من شفت
زينب وتنظر لعد خوانها

٤

بقت آخر لحظه وتغمض العين
بين زينب والگلب ذاك الحزين
عينك اندارت وصدت للحسين
وعين صدت يم گمر عدنانها

٥

انشال نعشك يالحسن والگلب هام
ينضرب معقوله نعشك بالسهام
يبو محمد محد ايحب السلام
عشرتك للأسف محد صانها

٦

انودعك يالحسن وبهذا المصاب
كل موالي الليله گلبه بحزن ذاب
شرف يكفينه يبن داحي الباب
للخدم تبقه انته عزها وشانها






لاتنسون والدي ووالدتي وابني عباس من الرحمه والمغفره
خادمكم رياض الرسل الجابري

كعديه بحق السيدة رقيه (ع)




اول شهيده من الايتام
ماتت اسيره هناك بالشام
بالغربه رقيه
وافتها المنيه
ماتت اسيره هناك بالشام
١

من ثمار الجنه طفله احساسها ايفوق الترافه
اترف من الماي جانت
وسيدة عرش الخلافه
الخاطر حسين الله شايل بينها وبينه الكلافه

عد الله يعني امدلله
ونور الوجه ما اجمله
تنضرب ليش بكربله
الف ياوسفه وحسافه

بنت الحسين الكلها احساس
تنضرب ليش وعمها عباس

من بعد الرزيه
وافتها المنيه
ماتت اسيره هناك بالشام
٢

طفله عطر الجنه بيها والحسين ايصير ابوها
اهواي اعله من الثريه ويكفي عبد الله اخوها
حافيه وتركض بهيمه
ليش برض الطف لكوها

من بعد شيال العلم
شافوها مابين الخيم
تركض تفر وي الحرم
والحرم وليه ولوها

تركض رقيه وتدك ياباب
والناس كلها اليمها أجناب

ماتحمل اذيه
وافتها المنيه
ماتت اسيره هناك بالشام
٣

ابنيته جان ايحسها دنيه ومملكة عرشه وحياته
جانت اتعيش بخياله وشاغله كل ذكرياته
الزهره جان ايشمها بيها
بالرغم ازغر بناته

متعود اعليها اشكثر
لو صله يوكف ينتظر
تفرش ابدمتعها العصر
اله سجادة صلاته

ياوسفه عزها الجان مادام
خلوها تركض بين الخيام

اخذوها سبيه
وافتها المنيه
ماتت اسيره هناك بالشام
٤

وصلت الشام النواصب والأفكار اتدور بيها
وين جانت وين اجتي حايره بلوعت سبيها
ازغيره بس جانت أميره
لجن من فكدت وليها

بعد الخدر بعد العبي
بت اشرف واعظم نبي
ماحسبت من تنسبي
الوادم اتعاين عليها

شصار برقيه بطبت الشام
سمعت خوارج ذوله الايتام

سمعت خارجيه
وافتها المنيه
ماتت اسيره هناك بالشام
٥

طفله گعدوها بخرابه حلمت ورادت ابوها
راس ابوها بطشت جابو بعد ماوليه ولوها
خافو اعليها تموت احچايه وحده ماحچوها

جابولها الراس بحذر
لو شافته شيترك اثر
شمت ابوها من النحر
وبالطشت ميته لگوها

شبكت ابوها المات عطشان
وماتت رقيه بدمع الاحزان

وبلايه وصيه
وافتها المنيه
ماتت اسيره هناك بالشام


المصيبه

على زينب ليله صعبه من ترد للغاضريه
شلون ضعن حسين يرجع
وبالضعن ماكو رقيه
لو سألها حسين عنها اتگله وافتها المنيه

عافتها بديار الغرب
هالمنظر اعلها صعب
منظر يفت حتى الكلب

ودع الليله رقيه العايشه بنص الضماير





لاتنسون والدي ووالدتي وأبني عباس من الرحمه والمغفره خادمكم رياض الرسل الجابري