الشاعر علي غسان المياحي

جديد محرم ١٤٤٦
__

شمس الحرب بزغت
ورحته الوغى افترت
والعساكر وكفت ابو الفضل مولاه

دارت رحى الحومه
وامتطه الملزومه
رجع حيدر يومه ابو الفضل مولاه

ركب مهره باب خيمة زينب ورفرف علم
من زعل فوك الكحيله ضهر الكحيله انكسم
فتح جفه ورجع لمه الحومه صارت من عدم


سمع زينب صاحت
نار الغضب لاحت
على السبعه ودارت. ابو الفضل مولاه

رب الحرب نازل
للعيه وي يقاتل
يسمونه ابو فاضل ابو الفضل مولاه

*

ركب مهره وغاير
والمعسكر حاير
للحرب جف داير ابو الفضل مولاه

بالحرب وفنونه
رعدن هو عيونه
كلف ويعرفونه ابو الفضل مولاه

فك لثامه ولزم مهره واكف بحدالنهر
والسبع واكف عليها والكلف محد عبر
الشرد من كدام سيفه تايه يدور مفر

مالت ورداها
بجفوفه شالاها
الماتجي جاباها. ابو الفضل مولاه

للوغى رف شاربه
سبع محد عاجبه
محله كسرة حاجبه. ابو الفضل مولاه

***
ولليل اذا عسس
والصبح اذا اتتفس
عباس ذا اشرس ابو الفضل مولاه

عالنهر دك ثايه
خسف المسنايه
رجع الغزايه ابو الفضل مولاه


بريد السبعين حيله وعالركب سيفه خطف
صاح انا العباس هذا والنهر منه نشف
الما يهاب العيه نشمي نزل يم جدمه رجف

عالركب بتاره
سواها كناره
لله واسراره ابو الفضل مولاه

الباطن الضاهر
الماضي والخاضر
آياته بالعاشر. ابو الفضل مولاه


*

بالحرايب عاده
يستنكي بالقاده
بس اله ولجداده ابو الفضل مولاه

يتبختر بخيله
هلهلته ام شيله
نومسها بالعيله ابو الفضل مولاه

الخله بينت بالمعسكر ونكسر كسرت غصن
وخطف بتاره عليهم جن مثل طبكت جفن
توسط بوسط العيايه للمرجل كف ردن

كف ردنه طبها
والعليه جابها
بس هو سواها ابو الفضل مولاه

زلمة علي بكيفه
لو عارك بسيفه
سبع ياخذ حيفه ابو الفضل مولاه

_

علي غسان المياحي

مولاتي العليله

لملمت هدمي وكلت عود وياهم
ماريد ناكه اتماشه وي ممشاهم

*
فرحانه اروحن وي هلي والفرحه ترس عيوني
ولليل مانمته ابد سهرانه وي ضنوني
لميت هدمي للسفر بس تالي ماحسبوني
كوطر ضعنهم بالحمل وبالبيت شو خلوني

طر الفجر والضعن حمل بيهم
محد ذكرني واني كلبي عليهم

*

جابو هوادج بالفجر وتخيلت الخياله
صعدن خواتي بالركب وانه بخطى ادناله
شيصير لو وحده الي يجبون ناكه جماله
جا هو ليفارك اهل بس الله يدري بحاله

انا وحسرتي ودمعي ضل اليربي
بس على ابوي حسين ينغز كلبي

*

ايدي عالخدي من مشو بالأيد مامش حيله
وركضت ليه بهمتي كتله انا موش عليله
وياك اروح بسفرتك ودري بسفرته طويله
تخيل مهرته ومن رحل جلبت بيه وبخيله


كضيت بالجام الفرس وردانه
كلالي ماترحين انتي ويانه

***
جلجل الليل بوحشته ضلمه وخليه ادياره
وهنانه صلى هنا كعد ابجي وشم بكتاره
مهمومه موتني الحزن والدمع بس يتجاره
امنيتي لو وي الهوى وسمع سمع بخباره


بعيوني ضلت صورته مرسومه
طلعت هدمه وكمت اشم بهدومه

***


علي غسان المياحي

خروج الضعن


لسان حال مولاتي العليله


بالسلامه.. ياهلي رايح ضعنكم.. بالسلامه
بالسلامه.. الليل وحشه وذكرتكم .. بالسلامه

والضعن منيمي شايل
وعيني صدت للمحامل
بسلامه

****
تصد عيني بضعنكم راح___وكولن بي نقص ناكه
شبدر مني وجفاني حسين___ كلبي يوجعه فراكه

اصعب لحضه اموادع.. خواتي من اودعهن
مامتعوده ع الفركه.. تريض خل اشوفنهن
انا ادري ومايصح ملكه.. عالصدري وخل اضمنهن


وي خواتي.. شيصير لو عالناكه اروحن. وي خواتي
وي خواتي.. وبالدرب لحسين اصدن.. وي خواتي

نعمه من ضلالي فاضل
عيني صدت للمحامل

بسلامه

***
جفيتوني ونحيل الحال.. وصفيت بروحي بس انعه
مفضوح الجفه يحسين .. اذا ابنادم لزم ضلعه

اكضي لليل اجر ونه.. ونه تخلف الحسره
اكولن مارفع جفه.. يجوز بهاي اله عبره
اثاري باجر منيروح.. تضل بس تسعه موعشره


تصب عيوني .. انا وليل وحسرتي .. تصب عيوني
تصب عيوني.. والهجر طفه شمعتي.. تصب عيوني

والدمع من عندي نازل
عيني صدت للمحامل

بسلامه
*
ادزلكم رسايل شوك __ وارد مناطره ابابي
ويجرحني الهوه ليفوت __ شايل ريحة احبابي

يبويه الفركه مو هينه.. حرمه بلا ولي صعبه
انا ادري ماترد وتعود.. حياتي صارت بغربه
ادور ذكره لك بالبيت.. عالراسي وهلت التربه


من جفاكم .. عاشرت روحي مصابي .. من جفاكم
من جفاكم .. ابد مافاركته بابي .. من جفاكم

حرمه وبلايه كافل
عيني صدت للمحامل

****
تعبت من الهجر يحسين .. اتاني وماخبر جاني
عاشرت الحزن والضيم .. الجرح يسكت يفز ثاني

هلي و عفتوني بالغربه .. يماتدروني وزغيره
يصح مثلك حظن دافي.. وانا ادردي ماالي غيره
بعيني والضعن كوطر .. يبويه بهتت الديره


ليه عودو.. الناس ماترحمني بويه ليه عودو
ليه عودو.. عالهجر ماني قويه.. ليه عودو

بويه محد عني سائل
عيني صدت للمحامل

بسلامه

***

علي غسان المياحي

محرم الحرام

لسان مولاتي فاطمه الزهراء

ضلعي مكسور .. وانت منحور يمه محنيه
بهمي اجيتك .. بس لكيتك .. شيبه مدميه
موليك الرمح. مشيول برمح
شيبه مدميه

**

اجيت لمصرعك يحسين بس يحسين شيلمك
اميل بالجروح اتراب شنهي لبيك ميلجمك
يوليدي دبطل النوم
من عندك خذو لهدوم
خواتك ضاعن بغربه واجت تنعاك بس امك

وجهي مشبوح وانت مذبوح .. ونايم برمله
خنصرك وين احجيلي يحسين.. اكعد سم الله

يا اول جرح مشيول برمح
شيبه مدميه

****
طحت بس عيني يمه تشوف يكلها من الخيم طلعي
نقص والخنصر المفكود وتاشر للخيم رجعي
للخيمه زحف تحبي
والزينب جفن يربي
وبكيت محيره بهل الساع وجفني الماكطع دمعي

بحيره زينب .. ناري تلهب.. يمه حاجيني
جروحك هواي.. تشوف عيناي يمه دليني

دليني الرمح .. ياوجه الصبح

شيبه مدميه


****
يراس عالرمح محطوط بحجر ومصوب الكصه
ينايم عالرمل مطروح جسم وتقسمو حصه
عالشذره كطع خنصر
عالدرهم كعد ينحر
ماضلت ولا خيمه وكلب زينب الف غصه

بكلبي ناره .. على الحياره .. وانت نايم
ماهو راسك .. لا ثيابك .. عكلي هايم

مو ليك الذبح .. مشيول برمح

شيبه مدميه.

****
شغت من شفتك موذر عالصدرك دايس الحافر
واكولن هوى مو هوى شصاير يمه بالعاشر
عالصدرك يمه خياله
وحيد اهوايه جتاله
طحت يمه وغدت زينب ينضر ليها كل عابر

ركضت اختك . ما جزتك .. وكفت عليك
من المخيم ... ريحه تشتم.. تعرفت ليك

ياوجه الصبح. مشيول برمح

شيبه مدميه

*****

علي غسان المياحي

عيت الحومه بريح صرصره
هرجت الفرسان هذا حيدره

****
خسف بيها الكاع صارت من نزل بيها الفحل
ركض انمار المعاره ابو ريشه من نزل
كلشي بالدنيا ونضير وبو فاضل ماله حل
بسيفه ملج الموت كشر عاده جن يوم الجمل

جيمه سوه الطف يحوس بجمره
عيت الحومه بريح صرصره


*****
يسابك الريح بشكرته من يجر الجامها
سيفه وجه وكفه يذبح لو يطر ازلامها
مالت الدنيا بطلعته وغير جفه مالها
الحرب نثيه وابو فاضل للحرب خيالها

شرد الجماغه ليث قسوره
عيت الحومه بريح صرصره

*****

ترجل بوسط الحرايب يمه تمشي مهرته
متنه وي النخل لايح فوكه رفت رايته
الزعل بعيونه تباين يكتل هو بخزرته
للنهر ماثنه رجله برمحه نزل جربته

دخن العباس غيره مبخره
عيت الحومه بريح صرصره

****
زمجر بوسط المعارة ابن ليث حروبها
عصب الخيل ودخلها وحده داس دروبها
بريد الجيش ابمجانه بعينه صاد كلوبها
الكابل العباس ميت القادة ذبت ثوبها

الحرب ثخنت والجيوش مشوشره
عيت الحومه بريح صرصره

***

علي غسان المياحي

مسلم بالحرب ليكابله منين
وأمضى من سيفه هو خزره العين
لذي واجه عيونه رجع مصيوب
ابن عم ابو فاضل هو وحسين

كام هوس بيها .. وعليها.. فر خيله
رادو يلاكونه .. وبعيونه.. رد جيله
بالحرب خلاسها... وهوواسها وذب حيله

*****

العسكر بالحرب رادو يشردون
مامش كل درب واحتارو شلون
عكد جفيه خظره ونزل خيال
شال الحومه بيده ورجف الكون

تريس على الكوفه ... وبجفوفه... شالاها
الكاع مالت بيهم ... وعليهم ... ذباها
تخيلاها بيومه ... وعلومه ... محلاها

* ****

مغضب بالحرايب زلمه خيال
اذا تسطر جفوفه تكول زلزال
اذا عمه علي جا يطلع شلون
الي مصاحب كفيل يصير كفال

كام طر حطيانها .. وميدانها.. وشلامها
سوه بيهم جوله.. وجم صوله.. بزلامها
بيها سوه الغاره .. كنارها.. بعلامها

**
كبيدي وعالطريده يفتر يحوم
الحرب مابيها زلمه يكابله اليوم
ماتو والشرد ينحسب رجال
اليسطره بجفه ميت ماضن يكوم

صفك بيها جناحه بالساحه. دك ثايه
حيل الله بزوده. بزنوده رف رايه
دخيل رب الغيره شك ديره بحجايه

*****


علي غسان المياحي

مولاي مسلم ابن عقيل



حيهم يغيرة هاشم نزل والصارم بيمينه عله
مسلم عزم بجفوفه تصيح الكوفه هلا بمرجله

***

هلا بزودك يالشوفتهم _علي رد بيومه
بعينك انت من خزرتهم _ الزلمه ذب هدومه

هلا بشمرة حيدر يتوكر على الصيده
الكوفه مالت بيهم وسيفه جنه رعيده
سرفن الها اردانه والحرايب عيده

بالحد وكف كل حيله _ بداها العيله _ عليهم هجم
مسلم يحوم عليها _كلب عاليها _ طواها الزلم

****

الجيش مصطف على الحد الكوفه _ وانت وحدك نازل
شاهر الباشط وكلها تشوفه_ اله محد واصل

السبع بيهم واكف ماوصل يم الصارم
الشرد طرف الكوفه هم شارد وماسالم
النام منهم ليله من الرعب فز حالم

للطك يكف ردانه _يكلهم انه_ على حدها وكف
سيطر عليها بكيفه_ بيمينه سيفه _ عليهم خطف

***
مالت ومسلم يلولح سيفه_ من دماهم ناكع
حيل اذاهم بسطرة ايده _ والشرد ضل نازع

عيت ودخان صارت بالحرب دك ثايه
والهواشم بالكلايف دوم الهم رايه
جيشهم رد خايب رجع الغزايه

رب المراجل بيها _ بده بتالها _ ورجع على الصدر
بحيله طوها الحومه_ على الملزومه _ عليهم يكر

**
خلصت ومامش زلم لتشوفه __ والسلم كض راسه
وصل لجيش على طرف الكوفه__ بطرف خيله وداسه

الكاع خسفت بيهم والركض منهم صايح
تعب الملزومه ومن الكد هل الواضح
مسلم وهل سيفه مارحم بالصايح

رجع عليهم غاره شهد بتاره كطفها الركب
كالو علي رد بينه وقسم يكضينه نفاها العرب

***

علي غسان المياحي

رحلة عذاب ..
لوعة ومصاب .. سكينه تحجيهن


وي راسه بنفس الدرب مشينه
والحادي مومنه وحده الضعينه

****
وكت العصر كلشي وكضه.. راح الخدر والعز مضه
ياوكت زينب تصير الخارجيه

فوك الرمح راس الولي .. صاح الشمر طك بت علي
الماطلع صوت الها سموها سبيه

وركضنه صوب المشرعه ... لعباس عود نفزعه
ركضن خواتي وعالجمر داست رقيه


نسوان تركض لا ولي شبدينه
الحادي مو منه وحده الضعينه

****


شحجيلج وكومه القصص .. والخيم صارت جن حصص
صاحو عالخيمه دخلو وفرهدوها

عمتي تصيح عالهيم .. نركض لجن مامش خيم
الغيره معدومه وخيمنه حركوها

الماركضه حتى بحلم .. تركض يركضوها الزلم
عشرين عام ومادورها الجاورها

ناس غربه وبس تصد علينه
الحادي مو منه وحده الضعينه

***

ينزف عذابات الجرح.. فجر اهدعش طر الصبح
  الخيم محروكه وعساكر تفتر

بت الرساله عالهزل .. من طاح عمي ابو الفضل
  الجان بعيونه يحطها وهسه تعثر

خدر الله طالع بالفله .. نسوه الخدر وبسلسله
  جتفوها زينب بالسلاسل تنجر

ماكو نغاره وتجي تحامينه 
وي راسه بنفس الدرب مشينه

*****

احجيلج شطوله الدرب .. كل خطوه نغزه ع الكلب
النوك عرجه وبالحجر نترامه

لمدللة غريبه صفت .. جتال اخوها ويا مشت
هي حرمه وفزعها زلامه

شحجلج وكومه الحجي .. والجلمه تنزل بالبجي
مو دفن ميتنه الخيول اكرامه

ماكو والي واليصد علينه
وي راسه بنفس الدرب مشينه


**

علي غسان المياحي

بويه حاجيني .. كربله شنهي وخذتهم  وانا عفتوني


امشيه عليك الزجيه بويه حاجيني
لاتخليني وحيده ودمعتي بعيني
مو عليله وادعتك والفركه تاذيني
مااريد ابلايه شوفك تخلص اسنيي

بالضعن ماشي .. ماسئلتو خلافكم شيسكت عيوني

*
مو مريضه بويه شاهد بيه مابيه
لو حمل زايد عليكم تمشي رجليه
الليل اباري بي خواتي بخيمه رقيه
ماني منكم ليش بويه ماني علويه 

ناكه ماريدن .. بالدرب رجليه تمشي هايه شوفوني


عالخيم خليني احرس وتد للخيمه
مااريد افراش بويه خلني بالهيمه
والجمر لبكلبي صاير حركة الجيمه
بس المفارك يعرفه كليبي وبضيمه

لا تخلوني.. الليل مايخلص سوالف تسئل ضنوني


 لاتخلوني وحيده بشيمه الساده
وي عبدالله اريدن اهز بامهاده 
بويه وياكم اخذوني والكلب راده
وسط دلالي اضمه ضمة اكلاده


من تجافوني .. لو اجيتو من السفر ماضن تلاكوني


 كلبي كارصني عليكم واعلم الصاير
والخيم كلها توجر بويه بالعاشر
وصدرك الينكط محنه يدوسه الحافر
عمتي عالهزله تصعد يضحك العابر

وياكم اخذوني .. وي عماتي اريد تزورك متوني

*

علي غسان المياحي

عافوني ابديره غرب .. وماش من اهلي ويايه
سب وشتم درب السبي .. مكيوده وبلا رايه

انا الجنت ام الخدر .. ياوسفه من دار العمر
           امشي سبيه
راحو هلي بليل اهدعش .. وحسين جسمه انفرش
             التمو عليه

وركضتي من الخيم  جدم يسبك جدم
مهضومه والم ااااه اااه اااه ونة رقيه

يم الخدر يازينب


ياضحكت الشامت عليه .. عباس ماهو بممشاي
يكلولي راح ومايرد .. والروح تطلع بهداي

المن اسولف علتي .. يضحكون تنزل دمعتي
رد اشتكيلك
يالطولك يغطي الشمس ... ياخويه شبعوني رفس
وينك واجيلك

عليه خيل اهجمو .. خيم فوكي احركو
تراجي شكد اخذو اااااه عيني شكثر توميلك

يم الخدر يازينب


وتعاين عليه الزلم .. جي راكبه فوك النوك
والاصعب بهذا الدرب .. طبونه ابنص السوك

اسمع الوادم بت علي ... فرحانه واتباوع الي
والدمع همال

ماغزر وياها الملح .. الجانو كبل عدنه فلح
كيدوني بحبال

رموني بالحجر ..خلص عمري القهر
بعد ماضل صبر اااااه تتباجه الاطفال

يم الخدر يازينب

**
طول العمر تبقى نقص.. كل حرمه ماعدها خوان
من عكب ماماتو هلي ..   اطلع وطب بديوان

انا الجنت رمز الستر .. بس هسه يحديني الشمر
بعدك يعباس

سوط وبجي وشتم وضرب... شاهدنه انواع الرعب
عالرمح بس راس

صفيت بلا اهل  .. يطك بيه النذل
يجروني بحبل  اااااه واتعاين الناس

يم الخدر يازينب

*

علي غسان المياحي

ياربي ارزقني الم
للنابت بعينه سهم
بعياله احتركن خيم
في كربلاء

*
ياربي ارزقني الدمع   للصدره خلص بالسحك
وعيوني اعميهن اذا   اسمع بالخيام وحرك
كل حيلي يتناثر فده    لذنيج المتون الزرك
ياهوى ماشمك بعد     محبوبي رازقني العشك


ياربي ارزقني الصبر
عالنايم بعز الضهر
من عنده خنصر منبتر
في كربلاء

**
لمن يمر طاري الخدر   موضوع عندي اتصوره
لمن رجع خالي المهر    زينب بقت متحيره
تبجي اليتامه بكل كتر  وبكل كتر تصرخ مره
ساد الحزن فوك الخيم  وبالخيم نار موجره

من الخيمه ركضن عالجمر
فوك الحرك خد ينسطر
فوكها يمشن باليسر
في كربلاء

**
طاح الكمر عالمشرعه  طاح وخفت حتى الضوى
دخان تارس كل نفس   واختنك حتى الهوى
الحبل يجرح بالورد     وللجرح ماصحله دوى
كل رايه رفت عالخيم   طحت لمن طاح الوى

من عنده طاحت رايه
طاح اليخت وحجايه
كاع وسمه مدمايه
في كربلاء
**
من الخيمه للهيمه ركض   والعقل حاير شدهان
خيل هجمت صوب الحرم  وحسين طايح عريان
شلون الحبل بيدج طبع      بجفوفج انتي قران
مو تل صعدتي؟ عالصبر    وجبريل فارش جنحان


لليل اهدعش صار الحزن
من عنده زورك كل متن
سار بيسر كل الضعن
في كربلاء
**

ياروحي موتي عالضعن    زينب مشت عالهزله
خدر الله ماشي والغرب   هي ودمعها اترتله
المن اعيش بدنيتي    ضعن الله عاش بذله
زينب وقار عالخلك    وسفه لخرابه وعزله


المن اعيش بدنيتي
دونك اعيش بغربتي
اقبل حبيبي دمعتي
في كربلاء

***

علي غسان المياحي

لكد ميمونه ابو الاكبر . العسكر بروحه تعثر
ونزل سبع الكنطره
وبرز جسام المشكل.. بصفه الاكبر والمدلل
عيونهم متوجره
طلعو السباع الهواشم .. وحدو الصارم بصارم
هلهلت حره ومره

غار بيها العيه شك ميدانها
المهره متونسه ويجر بعنانها
الحرب لو خيبر يطك بيبانها
وضحك لحسين وخزر فرسانها

دخيلك يخو ذاك الكمر
دخيلك صرخ حتى النهر

**
سباع حيدر بالحرايب .. طلعو وطشو كتايب
شيخهم ليث وئز
منين ماتشرد يجوها .. هوسو بيها وجفوها
زماطهم طك وعبر
ابو الاكبر لف غدرته .. وابو فاضل شد مهرته
شكو وشكهم كبر

هدو عليها وتميل بخيلها
يذبها لحسين الكمر ليشيلها
ترجل الاكبر يدوس بحيلها
غربت وجاسم ويضوي بليلها

دخيلك يخو ذاك الكمر
دخيلك صرخ حتى النهر

*
طلعو حسين وعظيده .. وبوفاضل باس ايده
كله رخصه عليها
كله مرخوص الك كلشي .. يابعد عيني وهرشي
الله ضمك ليها
سحب سيفه وجر رسنها .. الحرب بردت رجع شنها
بحيله رك عليها

زلام حيدر ماغفت عالعيله
هدو وردو الجيل بجيله
الفارس المامات ميت حيله
والشرد من الحرب بالشيله

دخيلك يخو ذاك الكمر
دخيلك صرخ حتى النهر
***
سوو العركه الجبيره .. الجيش منهم دخل حيره
شتتوها صفوفه
ابو الاكبر شد غترته .. بسنه محلاها ضحكته
وضحك سنه تشوفه
شاف جسام ويالاكبر.. وابو فاضل يمه يفتر
بالعده حط خوفه

الزلمه بيهم مالحك مشراده
تساوو الجندي وجبير القاده
الحرب مثل العيد عدهم عاده
الجيش كله وربعه من الساده

دخيلك يخو ذاك الكمر
دخيلك صرخ حتى النهر


****

علي غسان المياحي

يابالفضل لمن طحت ..راس برمح عالي شفت
حركو عليه خيمتي .. يطكوني لو بسمك صحت

                                    **..**

يابا الفضل جابو حبل  ...  ورقيتك كيدوها
صيوان وجر بالحرك ... وعلى جمر مشوها
لمن بجت صاح العرش .. ترجيه شو جروها
يجرحني شامت بالحجي .. عباس مات اخذوها

ياخويه تعبني الدهر .. وعيوني ذبلت بالسهر
اشكي الك وماترد ... من عندي باكاك النهر

                 يابالفضل .. يابالفضل

                                  **..**

هيبه علي واخت الكمر ... وسفه وطلعت بهميه
طاح البخت كلشي انتها ...فوكي احركوها الخيمه
تيهت درب المشرعه ... ذايب دليلي بضيمه
عباس وهواي الحجي ... عكبك يراعي الشيمه

مشتاكه اشوفن شاربك  ... تعجبني ميلت حاجبك
تتخيل المهره بزعل  ... وبيدك تشهره صارمك

                 يابالفضل .. يابالفضل

                                  **..**

 عباس موطبعك هجر ... ارجعلي اريد الرايه
ارجعلي ماريده النهر ... يفداك هو ومايه
ضيعت خدري بالسبي ... زينب صفيت حجايه
مجتوفه من الدرب لدرب ... لخدر الله جنت مرايه

تعبني ياخويه الشند .. عمه يرد لو مايرد
راسك عالرمح ومشه .. اشكيله اذاني البعد

                  يابالفضل .. يابالفضل

                                 **..**

تعبني عباس الدرب ... طبوني ديره بديره
اخت الكمر تمشي بهزل ... ياخويه حيل جبيره
محتاره اشاكف بالحجر ... لوسوط  اضل بحيره
وسط الزلم جرني النذل .. معدومه بيها الغيره

تعبنه عباس السبي .. بعدك مشينه ويجنبي
جتفونه نمشي والغرب .. وركضنه لذنه بالعبي

                    يابالفضل .. يابالفضل

                               **..**

علي غسان المياحي

ياسيد الماء
في كربلاء

بعد التحيه والسلام
حتركت علينه الخيام

*'****
مشتاكه اشوف اعيونك .. الماغفت كبل عيوني
مشتاكه اشوفن هيبتك .. عباس بعد اضنوني

مامقصر حتى اوديلك عتاب
ارتاح خويه ابخير ماطاح الحجاب
يابعد عيني على عيونك تراب
الهوه شامت ليه منك ريحه جاب

الهوه المنك جاي كون بصدري اضمه
حتى لو بعدوني عنك خويه اشمه
حيل عدوانك ابد مابيها رحمه

*****

تذكر لمن جنت بصبه .. وفوكي تحط جفوفك
منها وعرفت انا الك .. تكفلني يوم طفوفك


عباس وعيونك الك مشتاكه
خويه مغصوبه وصعدت الناكه
وين كلي وشوكت نتلاكه
عازت النشمي يذل افراكه

النوك هزله وخويه ماضل عدي حيل
ليل المناطر صعب مامثله ليل
جرح اشده وجرح نده وجرح ويل


***
يامحله جلمه خوه الك محلاها الك مكيوله
من اندهك تركض تجي وتكلي يامدلوله

تذكرتها خويه من صعدوني
والشماته على النهر مروني
الهضمه من كدامك وعبروني
غمضت عيني لجن شافوني

كلولي زينب هذا عباسج طريح
جلمه الخويه بعد مابيه اصيح
من على الناكه يركبوني واطيح

***
اتباها وانت عالرمح.. راسك غطه فوكانه
كلمن عشيرتها اجت.. يسئلون وين فلانه

عباس بس اختك بقت مكيوده
شامخه ومن القهر ممروده
عليه جفين الغرب ممدوده
على كل هذا واضل محسوده


فترت الدنيا ودخلنه بشامهم
وانا وي راسك وكفنه كبالهم
بخير خويه رتاح ماني بحالهم

**

علي غسان المياحي