في التواصل والتعاملات، الحب والكره مش المقياس الوحيد. الحياة مش أبيض أو أسود، خير أو شر، يمين أو شمال، في رمادي، في شخص بيجمع بين الخير والشر وهو "الإنسان"، في وسط بين اليمين والشمال. فمانحاول نصنف الآخرين ونتعامل معاهم، وفقًا لمشاعرنا بس! مرات بنكره أشخاص أكاديميا أحسن مننا، ومرات بنحب أشخاص بيوصلونا للدرك الأسفل من الدنيا! فماتخلي مشاعرك هي اللي بتقرر إختياراتك عنك، وهي اللي بتحدد ليك مين مفترض يكون معاك ومين مش مفروض يكون مامعاك! وده مش بيعني أنك تبقى بارد وتقصي مشاعرك نهائيا، مشاعرك جزء لا يتجزء منك وإستصحابها في قراراتك لابد منو، بس ماتخلي القرار النهائي ليها، لأن في صفات وحاجات تانية أهم من الحب والكره في تحديد علاقاتنا والإختيار بين الناس. في البوست الماضي إتكلمنا عن إن الحب لوحده مابيبني بيت، وماكفاية للإرتباط، لابد من إن الحب يكون ممزوج ببعض الصفات المهمة في شخصية الطرف الثاني علشان العلاقة تكون ناجحة. كذلك في علاقاتتنا، ما اي زول ماعندنا كيمياء أتجاهو معناتو كعب، من حقك تكره اللي عاوز تكرهو، بس ماتخلي كرهكك يحدد ليك إسلوب التعامل، وماتخلي كرهك يعميك عن بقية الصفات التانية في الزول واللي قد تكون جميلة! من حقك تكره البروف (أول الدفعة) المفتري، بس ده مش معناه إنك تخلي كرهك يمنعك من التواصل معاه، لأن حاتستفيد من النجاح الأكاديمي اللي بتميز بيه! من حقك تكره زمايلك في الشغل، بس ماتخلي كرهك يمنعك من التواصل معاهم وتبادل المصالح المشتركة بينكم، لأن ماف شغل بينجح وناسوا مختلفين مع بعض! من حقك تحب الإنسان الجذاب والمشهور، بس ماكل شخص بتحبه بينفع للإرتباط أو بينفع لإن يكون في حياتك، في حاجات تانية مفترض تضعها في عين الإعتبار وإتكلمنا عنها في البوست السابق عن إختيار الشريك. الحب والكره جزء من الوسائل اللي بتساعدنا في إختياراتنا للآخرين، بس هي مش الكل، والمشاعر ماعلى طول صادقة، وبتتغير بتغير القصة زي ماوضحنا في البوستات السابقة، فعلشان كده بنستصحب بقية الصفات المهمة عندنا في إختياراتنا للآخرين، وفي تحديد كيفية تعاملنا معاهم. "ما أي زول بنحبو بينفع لأن يكون في حياتنا، وما أي زول بنكرهو لازم يكون برة حياتنا" محمد عمر