الكلام الزي ده ممكن يكون غير مرغوب، بس لازم يتعرف: الحب لوحده مابيبني بيت، الحب لوحده ماكفاية علشان تستمروا في العلاقات، لأن في حاجات تانية أهم من الحب في إستمرار العلاقة وتكوين البيوت الآمنة من ضمنها: • المسؤولية، الزول اللي بتحبيه لازم يكون مسؤول وقادر يشيل مسؤوليتك ويعتني بيك بالقدر الكافي. • أيضا الشخصية، لازم شخصيته تكون تمام، مايكون زول ضعيف بيطلع كل شيء بينكم للناس، ورأيو عند غيرو ماعندو هو. • الإحترام، علاقة مافيها إحترام مافي ليها لازمة، الاحترام ثم الاحترام ثم الاحترام من أهم الحاجات اللي لازم تتوفر في العلاقة. • الأخلاق، يكون ذو خلق مش زول أخلاقو ضيق وبيتلفظ "بيشتم" كتير، ده زول حاتعاني معاه مش حاترتاحي معاه. • القبول، القبول يكون من طرفو وأهل بيتو وده شرط إختياري، بمعنى إذا أهل بيتو ما متقبلنك وهو متقبلك وبتقدري تتعايشي مع الحاجة دي فتمام. • الدين، مابالضروري يكون شيخ، بس يكون زول بيعرف ربنا، وبيعرف حقوقك عليه، وحقوقه عليك، وبيراعي ربنا فيك. فالناس للأسف بتركز على الحب وبتتناسى بقية الحاجات التانية، اللي أهميتها بتتفوق على الحب! الحب صح ممكن يخففف تأثير النقصان في الحاجات السابقة، إلا إن مش دائم لأن شعور والمشاعر متقلبة، فبتأثر بالنقصان الدائم في بقية الحاجات السابقة لغاية مايقل بصورة كاملة وتبدأ تظهر الخلافات للعلن، ومايقدر يسد ليك النقص ده أو يساعدك في تجاوزوا. فماتنظروا للعلاقات بعين الحب بس، خصوصًا لو علاقات دائمة، أنظروا ليها بعين الحب مع إستصحاب بقية الصفات السابق ذكرها مع إضافة الصفات الخاصة اللي بتهمك في شريك حياتك زي الطموح، والتوافق الفكري ..الخ من الصفات اللي ممكن تختلف من زول للتاني. والكلام ده إفهموه كويس، علشان بعدين ماتجوا تندموا على إختياراتكم، وعلشان ماتستمروا في علاقات بتشيل منكم أكتر ممابتديكم، وبتأذيكم أكتر ممابتفيدكم "سامة". محمد عمر