تمرير أجندة دي مقدمه لي موضوع بتكلم عن تمرير أجندة وتحويلها لي أسلوب حياة، ولا كمان بقينا ننروملايز الموضوع على أساس انو نوع أساليب الحياة، أنا م ح ازكر نوع من الأجندات واي زول يشوف ياتو أسلوب وقع فيو . الموضوع ليو فترة عامل لي كورة شراب، كيف! كيف منصه مثلا زي نيتفليكس تحول نوع معين خلينا نقول من الأساليب المخله شديد لي أسلوب حياة وتخلي الواحد يقارن حياتو ويحس بي الفرق ويقعد يأنب في نفسو ويجلد في زاتو كل يوم عشان هو م عايش بي نفس الأسلوب، وحاسس انو مقيد ولا كمان السبب في انو م قادر يعمل اي شي هو إنو بعيد كل البعد عن الاعتراف بي هويه معينه او لبس معين او ممارسه مخططات معينه . بتزكر زمان لمن يكون في debate عن توبيك معين بلاقي نفسي واقف في الجانب المعارض دائما بغض النظر عن نوع الموضوع شنو بكون طوالي في حاله معارضه م عشان خالف تزكر لا، أكيد عشان في سوء فهم وفي نفس الوقت بكون عندي حُجه ودليل قاطع أني على حق لحدي ما أفهم الحاصل وأكيد لو كنت غلطان ح أرجع وكدا، بس دا كلو عشان أنا كنت بأخد اي توبيك بي وضع الحياد عشان م تتنفذ مقاصد الأطراف ويحصل انحياز، ووقتها بجرد نفسي من اي فِكر واساسا أنا عايم في منطقه اللا انتماء فالحاجه دي ساعدتني كتير. * نرجع لي موضوع تمرير الأجندة: إستقطاب الفرد من عاطفتو، وجرو من الطرف اللين البخليو يفرد وينصاع بمجرد م شعر بي إنو في منطقتو، الحاجه دي م خطرت في بالي خالص، أتخيل إنك فجاءة من دون مقدمات بتلقى روحك في وسط زي الرمال المتحركه كل ما حاولت تتحرك الموضوع بزيد وح تغرق أكتر. #مرتضى_صالح