قصه اليوم بعنوان " ماما الساحره " يقول صاحب الرساله …. لما كنت صغير كنت بستمتع جدا جدا بأني اتفرج علي المطر و ماما سايقه العربيه . بس كنت بستغرب قوي ان المطر بيقف في حتت معينه. افتكر اني و انا عندي ٥ سنين شاركت اختي - ٤ سنين- باستغرابي ده و احنا في العربيه. ماما سمعتني و اتنحنحت … بصينا لها لقيتها اتنهدت بقوه و قالت" ما كنتش متخيله ان اليوم ده هيجي بالسرعه دي بس انا عندي اعتراف … انا يا اولاد ساحره ! بقدر اوقف المطر!" شهقت اختي بقوه و انا فضلت مبرأ و انا بسألها بجد ؟ بجد يا ماما انت ساحره … بتعملي ايه تاني؟ ماما قالت بشئ من الاحباط ان قدراتها السحريه مرتبطه بوقف المطر بس … و للاسف مش بتقدر تعمل ده لوقت طويل يمكن دقيقه اول اكتر بحاجه بسيطه لان ده بيستنزف قوتها " كنت مذهول جدا انا و اختي لما ماما قالت " اهوه … دلوقتي هخفي المطر" في نفس اللحظه المطر اختفي ! شهقنا انا و اختي بقوه ! و بعد دقيقه للمطر رجع تاني! ماما قالت لنا ده سر و لو حكيناه هتخسر قواها السحريه. و اتعاهدنا يومها ان السر ده مش هيطلع بره ابدا . بعدها بكام سنه و تحديدا لما وصلت سن ١٣ سنه كنت مع ماما في العربيه و انتبهت ان المطر وقف ! اتعدلت في كرسي العربيه و انا ببص ل ماما في المرايه لقيت علي وشها ابتسامه خبيثه ! " احنا في نفق !" صرخت! ضحكت بهستريا و انا فضلت اصرخ انها مش بتوقف المطر هي بتدخل النفق ما بنشوفش المطر ! ! ماما كانت بتضحك لدرجه ان عينيها دمعت ! مش فاهم ليه اخدت الوقت ده كله عشان استوعب ان اللي ماما قالته كانت كذبه عجيبه علي عيالها اللي المفروض انها مصدر الثقه ليهم ! اصدقها ازاي و هي ما طلعتش ساحره! #ريديت منقول من نسمه عاطف