قناة الشاعر الحسيني مجيد عبد الرضا القريشي

   ذكرك وحي ما ينمحي بلسان زينب ايات ... بكل عصر ظل يستمر تشهدله هذه الرايات
واصل زمنه .. حط بكلبنه .. بحسين أمنه
تشهدلة هذه الرايات
"""""""""""""""""""""""""""""""""""""""""""""""""""""""""""""""""""""""""""""""
لو شاء ربك ان نبي ينبعث هاي الازمــــــــان
لا وحي ما يحتاج اله ولا وصي يفسر قراءان
ثورة حسين واخوته وكلمات زينب عنـــــوان
يكتب عليهن معجزة وينصب مجالس أحـزان
أحزانهم هنه الحكم والمعجزة والتبيان ... لكلمن نكر بيهن عبر سواها رب الأديان
بيهن نصرنه ... ويصلح زمنه .. بحسين أمنه
تشهدله هذه الرايات

""""""""""""""""""""""""""""""""""""""""""""""""""""""""""""""""""""""""""""""
حزنه كايات السما بكلب من يقراهـــــــــا
حتى الطفل من مرضعة هالمسألة يهواها
من امه ياخذ منهلة وحب الحسين وياها
تنزل دموعة لكربلا الناعي من ينعاهــــا
حتى الطفل صوته سئل جتلك شنوا سبابة ... بصوته هدف صاح وهتف حسين اه ومصابة
يرضع محنة .. بيهه املنه.. بحسين أمنه
تشهدله هذه الرايات

""""""""""""""""""""""""""""""""""""""""""'"""'"""""'''""""""""""""""""""""""""""
قربان جان بذبحته قرءان للبرايــــــــــة
بلسان زينب ينقري ويزلزل الغوايـــــــة
عالكلب جن طبعة وحي محفوظ وبعناية
يمسح نواصب كل زمن ويثبت الولاية
ابكل محل حبك نزل تبيان للبرية ... يقراه نحر يمه كمر وجفوف حيدرية
اياته شفنه .. بالجود رونه .. بحسين أمنه
تشهدله هذه الرايات

"""""""""""""""""""""""""""""""""""""""""""""""""""""""""""""""""""""""""""""
ولو ردت اية ومعجزة ابهالزمن تشوفـــــة
روح انظر لسوح الوغى تلكة اثر طفوفـــة
فرسان من در مجلسه تخرجت من صفوفة
ردت دواعيش العصر وتنده فلا نعوفــــــة
من الطفوف لهالالوف ثورة واثرها باقي ... بلبنان وايران ويمن وبحرين والعراقي
تحقق هدفنة ...بهمة حشدنة .. بحسين أمنه
تشهدله هذه الرايات

""""""""""""""""""""""""""""""""""""""""""""""""""""""""""""""""""""""""""""""
ومن نقره حزن مصيبته واياته العجيبـــة
ودموع نجري وننتحب من شدة المصيبـة
ننطيك اية من دعى لربه بحبيبـــــــــــــــة
بالمجلس يلاكي الشفة وعباس هو طبيبة
البيه مرض لو اي عرض ينده يا باب الحاجة ... يا ابا الفضل دمعه يهل البحر عالي مواجه
من هل دمعنه ... يشفة مرضنه ... بحسين أمنه
تشهدله هذه الرايات

"""""""""""""""""""""""""""""""""""""""""""""""""""""""""""""""""""""""""""""
احسين اية كل زمن محفوظة من الباري
بيها اصل والمعتقد دمعة واجرها جاري
الماحفظها بمهجته يصلى جحيم النار
يحييها من عنده وفا وتشهدله هاي اشعاري
اهل الوفة والمعرفة تحييلك المجالس ... نحبة بجنون لابد نكون بهالمعتقد كعابس
وبهذا حبنا ... بيه التزمنا ... بحسين أمنا
تشهدله هذه الرايات
مجيد عبد الرضا القريشي (ابو منتظر)  نسألكم الدعاء

ربي اجعل محياي محيا محمد
اگضي عمري ودنياي خادم ال احمد
والخدمهم مرة ... ترضه عنه الزهرة
________
ادعي يا ربي برحمتك يا مجيب ويا معين
بجاه كلمن جاه عنده بجاه أمير المؤمنين
ابقى احيي هالمجالس لاخر انفاس السنين
اخدم الزهرة وابوها والائمة الطاهرين
ربي دعوة مهموم ما ظن تردها
نذر عمره بهاليوم لفاطمة اولدها
بصدرة تنعه العبرة... ترضة عنة الزهره
__________
ربي ادري الرحمة تنزل بالمجالس والدعاء
بيهة نتعلم عقيدة وعلم اسرار البقاء
بغير مجلس ال احمد ما تظل غيرة اوفاء
الدينا تصبح غابة حمرة وتمتلي بالاشقياء
الترك هاي العترة ضاعت حياتة
وسط دنيا غبرة يعلن مماته
بگلبة تبقة حسرة... ترضة عنه الزهرة
_______

المشه بدرب الخدامة للمجد حدد مصير
يعني حر وعبد ربه وما بقه للذل اسير
خلني خادم ربي الهم خل يصير اشما يصير
افخر لدمعات زينب من يسموني سفير
والله امل اولادي وما مل دمعهم
هم اجري وزادي عنواني منهم
والفخر من نقره... ترضة عنه الزهرة
________
يخسارة الضاع عمره وبالمجالس ما خدم
فرط بنعمه عظيمة وما حوه غير الندم
ربي لا تحرمنا منها هي اسباب النعم
الما حضرهه تاه امره وعن درب الله انهزم
شما عبد لوصلى ما يلاكي اجره
كل امام نگله وجوب نحيي امره
دين الله بذكره ... ترضة عنه الزهرة
_________
ربي بالخدمة شفتهه شكثر الطافك علي
لو نعيت الزهرة وانخي ما ترد جفي خلي
يا مجيب نريد نظرة بهالليالي تصد الي
تبارك بهالخدمة النه وتحضر الزهرة وعلي
ربي گلت الزهرة ترضى الرضاها
والنعاها بعبرة يحشر معاها
ومن يصير بقبره... ترضة عنه الزهرة
__________
صعبة هالدنيا يربي والشقي اتصا حبه
تحارب المؤمن طبعهه بكل مكان تعاقبه
واحنه لو قمنا المجالس نريد حسن العاقبة
عترتك نحيي امرها ونسحك اعله الناصبه
يا ملاذ الحاير عبدك يطلبك
بهالزمان الداير دليني دربك
درب اطهر عترة... ترضة عنه الزهرة
___________
يهنيالة الصبح خادم وبحزنهم ليلة بات
بهالليالي الفاطمية يطلب من الله الثبات
والي صوته لحزن فاطم يرتفع بالعاليات
ترضه عنة البضعة والله اي وحق الذاريات
لو هتفتم وياي اه يا غريبة
الزهرة تشفي كل داي هي طبيبة
شما تصيبك عسرة... ترضة عنه الزهرة
__________
الحيا محيا الغوالي لا بد لنصره يشوف
من مجالس هالزجية ترف رايات الطفوف
ونصرة السبعين صارت بالملايين والوف
نطوف لولادج مراقد وانت گبرج ما نطوف
الگبرها شوگي ملتهبة نارة
يمتة يظهر گبرج وامشي زيارة
هالامر ننتظرة... ترضة عنه الزهرة
_'_________
الشاعر الحسيني المهندس مجيد عبد الرضا القريشي

شكراً يرب يومية ... خلاني كل ليلية
اقرالچ وانعالچ يا زينب المسبية
يا دمعة ايامي ... حققتي احلامي
________
سورة حمد صار الخدر منه تعلمنا نكبر مضايفنا والخدمة مبدئنا
واخلاص من عيني الدمع عالمنبر من انحب چن راكب بمركب واقره حزن زينب
خسران كلمن ما ركب معانه
ضيع الجنة وما حصد امانه
والماعرف نحر النزف ماله امان ولاشرف
واشكرهم الربوني ... بحب زينب الغذوني
يحچولي بمصيبتها ... ولمجلسچ ودوني
ياحجة امامي ... حققتي احلامي
________
من زغري لازم مجلسچ وامليهن عيوني والكل يسمعوني بيكم يواسوني
يوم وبعد يوم انعرف بكل مجلس القايم اسمي على الوادم
انه الچ خادم
اسمچ على لساني نزف حروفة
مثل دمه حسين برمل طفوفة
صوتي علا بين الملا وصارت حياتي كربلا
بيكم تميز امري ... منذور الكم عمري
ابكل مجلس من انخاكم .. اخذ مرادي واجري
ومن اذكر الضامي ... حققتي احلامي
________
نعيي وكلامي لحضرتچ من يوصل الشفة كوثر جرى بضفة بيه كل مرض يشفة
وبصدري لطمات الحزن ينبوع مي صافي فاضت على اچتافي حصن ودوه شافي
صورة محنة وطيب بين عيوني
‏اشما اطيح بضيج ما تعوفوني
‏كلمة وفة موعاطفة بيكم عبرت العاصفة
‏اكتب غلاچ بدمعي ... واعلة الجرالچ انعي
‏توجعتي واتالمتي ... وبيكم اطيب وجعي
‏بالكوفة لو شامي ... حققتي احلامي
________
يا مدرسة سيد الرسل خدرچ صبح مله لأصل الشرف عله
فوگ البشر كله
بيه نؤمن برغم الفتن چن علي واسراره ايحارب اشراره والخدر فقاره
الدارس قضيتچ اول بدفعاته
شيخ بصفاته معدل بجلماته
انتي العلم وانتي الاسم لخدامچ انده والنعم
هاي الرواية ارويها ... من اولها التاليها
ما كوكرامة بدونچ ... والدنيا شلي بيها
ياديني واسلامي ... حققتي احلامي
________
صوت الخدم يمچ سجد والقاري اليقره والي كتب كلمة صار بألف نعمة
يا درة من سيد الرسل يا حجته وسره بت فاطمة الزهرة القادت الثورة
شفنه صلابة حيدر بمحياها
وشفنا سماحة فاطمة بملگاها
ثورة أمل ضد الجهل اتحارب العاف الخجل
المادرسوا مناهجچ ... صاروا مخازي اخلافچ
ابكل جامعة مفسدهم ... چي ما قرو اخلاقچ
صورة گلب دامي ... حققتي احلامي
________
مجيد عبد الرضا القريشي

خل تسمع الوالت أمية .. دولتنا دولة زينبية
بفضل الشعائر دوم تنقام ..ما تنتهي ودمعة رقية
_______
اقسم وانه گد القسم شيعي وربيت اعله الكتب
بين المجالس واللطم أعلى السواتر والحرب
لاطاغية ولاناصبة ما گدر يثنيني غصب
ربتنا زينب عالشرف ماذلها أسر ولا ضرب

صوت الشعائر والمئاتم ... ابأسم زينب يبقى قائم
واقعنا صارت مو بالأحلام ..ما تنتهي ودمعة رقية
_______
دولتنا دوله رافضة فارسها حيدر والعلم
اسم الحسن بيها الختم بدلة مضيفه والكرم
من ثورة حسين العزم يشرحها دمعي النسجم
دولة مواطنها الخدم مابيها انسان انظلم
من زينب اخذت هالكرامة.. تبني المواكب والخدامة
بفي الفدك هذا الشعب نام ..ما تنتهي ودمعة رقية
_______
لوردت شعب الله صدگ الختاره من هذا الملا
اسأل مجالس عترتي واتجه يم طف كربله
يم كافل الدولة عهد خطه بچفوف البسمله
عد زينب بخيمة ستر شيعتنا هي الفاضلة

گال النبي من زار الحسين.. ويمه گمر مكطوع الايدين
ابالف حجة والف من صام ..ما تنتهي ودمعة رقية
_______
خل اليسمع المايقتنع عدنا مع زينب عهد
لاما يهمنا منهجك وي ناصبي لو من لحد
مترهي تحچي بهالزمن واعلينه مملي بالحسد
من داعش لداري اجت منهو الطلع منهو اللبد

ترفعلي صوتك بالبذاءة .. وتريد من عندي البراءة
تاج الحشد لاتظل بالاوهام ..ما تنتهي ودمعة رقية
_______
ما نساوم بل نقاوم هذا من زينب امر
ندحر عروش الطواغي وندحر جيوش الشمر
باقية هذه العقيدة نحيا بيها ونستمر
انته للسفياني منهج واني قائم انتظر

گالتها زينب واحنه گلنا. ... والله ما تمحي ذكرنا
‏اسعوا سعيكم طول الأيام ..ما تنتهي ودمعة رقية
_______
ما ريد شارع لا وطن بس ذكر زينب يعتلي
خليني عايش بالفقر بس اشهد أن علي
خلك غني انته بگصر بس خالي وما منتلي
شنهو الحياة شنهو الوطن بغير الحبيب الأولي
هاي الحياة شنسوي بيها .. ابغير زينب ما نبيها
جسمي بعراق وروحي بالشام ..ما تنتهي ودمعة رقية
_______
خادم زينب مجيد عبد الرضا القريشي

اقسم بدم الوتين ... ابقه خادم للحسين
______
گالها الصادق رغم كل ما جرى من الفتن
خدمة حسين الرسالة باقية لآخر زمن
اليفوز بهالخدامة فايز بجنة عدن
هي للمحتاج ثروة وبيت للماله وطن
دولتي طول السنين ... ابقه خادم للحسين
______
اليشارك بالخدامة هيبة يصبح عد هله
الله فوگ يعلي شانه ويرفعه بين الملا
بيهم أصفى من ذنوبي ويرتفع عني البلا
صار عاشور بطباعي وكل كياني كربلا
وصرت من المؤمنين ... ابقه خادم للحسين
______
حسين هنياله اليواسي وبالگلب حايز غلاك
يختلف طبعة وسلوكه خادم اليشتم هواك
خلي ما يحصل علينه المهم نبقى بمحتواك
مجلسك ربانه كلنه ومنو احسن من رباك
مثلك اني الگه وين ... ابقه خادم للحسين
______
دورة الكون ونظامة بدمعة طفوفك جرة
لولا هذه الدمعة هذه چا عذاب الله سره
لولا ذكر حسين عدنا الدنيا تصبح مرمرة
ولولا زينب ما تشوف حجاب ويغطي مرة
وچاصفينه ملحدين ... ابقه خادم للحسين
______
اقسم وربي اليشاهد خدمتك مثل العيون
مثل ما حافظ عليهن احفظ اخلاقي اكون
ومثل شيخ أنصار اوفي وابن عوسج ويه جون
ومثل عابس بيه حبك يوصل لحد الجنون
عليك سابيني الونين ... ابقه خادم للحسين
______
مجلس حسين الهداني هو صاحب كل فضل
والله افيمة بكل حياتي وأبد ما اكل وامل
هو عرفني الامامة والنبوة والعدل
اوحدت الله وعبدته من ايدين ابو الفضل
يوم طاحن هالادين ... ابقه خادم للحسين
______
خادم خدام الحسين ع
مجيد عبد الرضا القريشي

اجينه بهالمسية نواسي الهاشمية
______
اجينه بفيض مدمعنا نواسي
لذكركم ماتنسينا نواسي
والينوي غصب حگكم نوه سي
انحرم من جنة الباري الهنية
______
نواسي زينب الحرة وهمها
الگضت من فرگة الزهرة وهي امها
الزمان هناك برض الطف وهمها
ومشت بزلامها علوم المنية
_______
دمعها اعله الزچية دموم چا در
لكسر ضلع امها هذا الكون چادار
تلگة بكل گلب منصوب چادر
مجلس فاطمة يقره وعزية
_______
على ذكر الزچية دوم مندم
واجري دمعتي بالعين من دم
واگل للي ظلمها بهاي من دام
باچر بالحشر نارك سرية
_________

النكر حزنچ ضرب عقلة بلاهة
انبهر ابفتنة الدنيا وبلاها
الشعائر ما ثبت دين ابلاها
ويهنياله الحيا أمر الزچية
______
البشر هذا انخلق والكون فلها
ذكر فاطم ابد مانساه فلهه
ذكرها يا بشر شكواي فلها
وخذت امراد منها ثنين ادية
_____
فخر من يخدم الزهرة وباها
حيدر گال حجتنا وباها
بأسمها كل مرض يبره اوباها
اذا تنخه بنت سيد البرية
_______
مجيد عبد الرضا القريشي

من اول عمرها ليوم دفنتها
اهات المصايب طور ونتها
_____
اول اه صادر من گلب زينب
من شافت ضلع مكسور ومخضب
على افراگ الزچية بنار تتگلب
وبدت وحشة عمرها بيوم فرگتها
_______
ثاني اه ممزوجة بلهيب النار
وبليلة قدر فجعو گلبها اشرار
بالمحراب طبروا هامة الكرار
وبچت ارض وسما من گد ظليمتها
_______
وثالث اه جرح أعله الصدر راسم
من شافت چبد يجذف ابو القاسم
من نار السموم أعله ألطشت نايم
وگامت تنسمع عالراس لطمتها
_______
ورابع اه سمعتها الانس والجان
على المذبوح طايح بالصحر ضميان
مصاب حسين خله بگل گلب نيشان
وعالعباس ما تنوصف لوعتها
_________
وخامس اه لوعة بگلب مسبية
هدت كل كياني وأوجرت بيه
شبگت راس ابوها وماتت رقية
ومثلي بالغرب مبنية حضرتها
_______
سادس آه نطقت بيها شيعتكم
من گلب الموالي ومن مجالسكم
ينده اه يزينب اه يا غربتكم
غريبة الطاهرة حته بجنازتها
________
بلچن من دمعنا نضمد الها جروح
من نقره المصيبة والنعي والنوح
حزنچ والقهر ظل طابع ويالروح
وليوم القيامة تسيل عبرتها
__________
خادم زينب ع مجيد عبد الرضا القريشي

يا نعمة الله يا زينب ... يا رحمة الله يا زينب
_______
صوت الموالي ومنهجه انتي اله قائد
بيچ انفهم كل معتقد للخالق الواحد
ماننسه وگفاتچ ياحرة والزمن شاهد
بسمچ تاسس منبري وأقره عليه صاعد

وبطور حزنچ صوتي يلهب.. يا رحمة الله يا زينب
_______
ترجمتي ثورة للحسين بكل معانيها
عالقاصي والداني بصبر كلمة علنتيها
والملة ابستار العبي انتي حميتيها
من كل جبان ومعتدي زينب سترتيها

والدين بحجابچ تحجب ...يا رحمة الله يا زينب
_______
زينب كرامات الخلگ بحجابج انحفظت
وكل راية رفت للفخر اباسمچ انفرضت
الامة الشريفة الثايرة بحروفچ توضت
لوما وگفتچ بالطفوف هالامة انقرضت

والدين چاراح وتغرب ... يا رحمة الله يا زينب
_______
العمر لوما خدمتچ يالحره ما اريده
واجب علينه كل زمن هالموقف انعيده
نهتف يزينب بت علي والمدمع انزيدة
واسمچ على مر الزمن ايكون ترديده

يالبلسبي گلبچ تعذب ... يا رحمة الله يا زينب
_______
والراد ذلتكم افل وانذاعت اخباره
لاگبر عنده ولا ذكر وانمسحت اثاره
وانتو اسمكم هالعله بكل وطن تذكارة
كل المجالس تذكره وتلعن الغدارة

يالحبكم بحد ذاته مذهب ... يا رحمة الله يا زينب
_______
كلمات شعري القاصرة أكتبها ونعيلچ
بلچن يزينب هالعبد ابونه يوفيلچ
شما عدنه من جاه أولد يالحره نفديلچ
والحمد لله بهالزمن خلاني اقريلچ

خادم اصير بگلبي مطلب ... يا رحمة الله يا زينب
_______
مجيد عبد الرضا القريشي

هذه وصيتي لو حضر طف المنية
كلكم فده ترحون لاولاد الزچية
لو كطعوا الماي وعليهم شحت الناس
تنطي چفوفك عالنهر يوليدي عباس
هذه وصيتي
________
ما اريد أسهب وسولف عالربا وضيم الظنا
عاينوا لذبلة عيوني وحبل ظهري النحنا
هاي شيباتي أعلى راسي من رباكم چم سنة
لاجل عاشور اذخرتكم بدمعي أودعكم أنا
ولدي أمانة عليكم لزينب تصيرون
مثل الخيم اعليها يولادي تحامون

يم فاطمة باچر اريدن ارفع الراس
تنطي چفوفك عالنهر يوليدي عباس
هذه وصيتي
________
الام التودع ولدها للحرب تبقى بضمه
ابد مايبرد گلبه بنار همها مألمة
فارشة السجادة تدعي والعيون مسلهمه
ربي يحفظكم تنادي بحق علي أو فاطمة

تموت الاصيلة لو رحل عنها ضناها
مثل الشجر من يبتعد ميها ورواها

وام البنين باربعة واليها الاحساس
تنطي چفوفك عالنهر يوليدي عباس
هذه وصيتي
______
بالك حسين وعياله لو عطش يا ابالفضل
بهاي ايديك النهر جيبه حتى لو ما ينحمل
المستحيل لاجله اصنع وانته ابن ذاك الاصل
الشمس ردت ويه ايده من برز يوم الفصل

يبن العوالي عالنهر انته اهلها
عيال الحسين ونسوته چفك املها

جيب العذب يوليدي واجعل ايدك الطاس
تنطي چفوفك عالنهر يوليدي عباس
هذه وصيتي
__________
ربي وي عترة محمد خصكم بهالمسألة
بجالكم زينب اميرة محصنة ومدللة
شما وفيتو وياهه انتم الكم اعظم منزلة
ولو وصل واحد خدرها صيرو سورة زلزلة

لو حرك عباها الهوى اگطعله الانفاس
هذه وديعة فاطمة اسمع يعباس

صعبة تعيش وهالخدر اتشوفه الانجاس
تنطي چفوفك عالنهر يوليدي عباس
هذه وصيتي
__________
بعد هاي الكم وصية بيها فضل من العلي
اي وحگ فاطمة نعمة اي وحگ حيدر علي
من يمر هذا الزمان وال أمية تنجلي
ذكري يمه وي ذكركم بالمجالس ينملي
والي تذكره شيعته يا ولدي مامات
حگه علينه شما طلب نگضيله حاجات

من يقره ليه الفاتحة ويدنگ الراس
تنطي چفوفك عالنهر يوليدي عباس
هذه وصيتي
__________
يمه لو مر الزمان الناس تقره ايتك
وماتظل بهاي حيره هناك تصفه حيرتك
وتظهر الأمة الشريفة هذه ماهي امتك
وياهم المهدي نشوفه بيده هذه رايتك

يرفع شعارك عالنهر وتشوفة الأخبار
يروي الحسين وشيعته من يأخذ الثأر

يطلع طفل صالة السهم اوداجة كالماس
تنطي چفوفك عالنهر يوليدي عباس
هذه وصيتي
__________
مجيد عبد الرضا القريشي
يا أم البنين دخيلج نظرة

منهو العلى ذاك الغدر لو صاحب السفارة
منهو العلى گبته الذهب لو گبة الإمارة
بالكوفة عدنا اية ... وهاك انظر النهاية
منهو العلى
‏________
‏نجمة سما واية نبي طلعت من المدينة
‏بيها الهدى وبيها الظفر والي انظلم تعينة
‏كالمعجزة بيهم ظهر ماضي بأمر حسينه
‏مسلم يكوفة ما چذب يحامي اجه اعله دينة
‏چلماته أية مسطرة .. وگفاته وگفة حيدرة
‏هذا عليه الي جره ... بذاك الوكت علينه
‏مسلم اجه نسمة وفا بنخوة علي سئلكم
‏مسلم اجه بماي الوجه مو بالفلس يذلكم
‏بدين الله والهداية ... وهاك انظر النهاية
منهو العلى
‏________
‏بلسانه ايات الولي منقوله عن نبيه
‏واعظم حديث بعهدته بقرءانه والروية
‏يقره سبط من النبي بن فاطمة وعليه
‏يقره ستر گد السما وخيام زينبية
‏عالي وعله مثل الگمر.. كل الملا بنوره انسطر
‏حيرهم بهذا الخبر ... ثاير ابو رقية
‏تعاين اله بيده الحشر والآخرة كلامه
‏تعاين إله والماسمع ظل يحصد الملامه
‏دگ بفكرنا ثاية ... وهاك انظر النهاية
منهو العلى
‏________
‏مسلم علم بنهايته وحط روحه أعله ايده
‏لن للغدر ايد اعتلت ولا بد يسل حديده
‏ظل ينظر بعين الحزن للقافلة البعيدة
‏زار الحسين من السطح وسلم على حميده
‏ما طاح منه بس دمع .. لجل الحسين المنفجع
‏خايف حميده تنصدع ... بعده تظل وحيده
‏هل الدمع اعله السبط لمن ولو حياته
‏هل الدمع لن طفلته تتألم المماته
‏ما تعرف المنايه ... وهاك انظر النهاية
منهو العلى
‏________
‏وهاك انظر الفكره انتصر والي رجح كلامه
‏الي تبع فاسق نذل لو تابع إلامامه
‏قصره وعروشه تهدمت وانمسحت الظلامه
‏منهم ولاباقي أثر تنزل عليه حمامة
‏انطمست اثار الوله .. ومسلم ذهب گبه إله
‏ابطيحته هو العلى... الساعة القيامة
‏هذا الزمن كله شهد وهدم علو قصرهم
‏هذا الزمن حاكم ظلم بالمزبلة شمرهم
‏وهاي اول الرواية ... وهاك انظر النهاية
منهو العلى
‏________
‏خلي نفهم الماعرف بارض الله وبسمائة
‏دين الله بحسين وهله وبطفوف كربلائة
‏خسران كلمن ما علن المسلم انتمائة
‏والي يحارب مجلسه للناصبي وفائة
‏هذا طريق المعرفة .. الله بنبيه معرفة
‏الي بذكرهم ما وفه ... نار السقر ردائة
‏الماخدم مجلس عزا ضاع وخسر حياته
‏الماخدم ال النبي دنياه مثل مماته
‏اسمع كلمتي هاية ... وهاك انظر النهاية
منهو العلى
‏_________
‏والچان مايعرف خبر هسه سمع خبرهم
‏والماعرف ال النبي من كربلا عرفهم
‏وعدهم بارض كوفة بطل يم هاني مستقرهم
‏والوا حسين وثورته وما ذلوا لشمرهم
‏وانطيك بعد الهم مثل .. لون الي سائل سئل
‏طوعة مثل جيش ارتجل ... ما خانت بشرفهم
‏طوعة اصبحت تسوة الزلم مانكرت الولاية
‏طوعة أصبحت راية نصر لليوم اله راية
‏اقراها ابعناية ... وهاك انظر النهاية
منهو العلى
‏_________
‏خادم مسلم ابن عقيل
‏مجيد عبد الرضا القريشي
‏نسألكم الدعاء
‏
‏
‏

منهو يفسر هالحلم ويعرف ... بلاراس ابوي وعمي شفته بلا جف
اوهام هذه لو علم ... منهو يفسرلي الحلم
""""""""""""""""""""""""""
سير عليه بالحلم هالمحبــــــــــوب
بلا راس اجاني عمه جبده مصيوب
ليش الهجر من زغري ليه مكتوب
من النظر خليتو راسي معصوب
هالحلم مكلف ما تحمله الكلـــوب
ومنين اجيبن للحلم بن يعكــــوب
لاسبعة بالطيف وكلتها سبعة ... سبعين الف دارت عليه وي ربعه
بالنار محروكه الخيم... منهو يفسرلي الحلم
""""""""""""""""""""""""""
جا ليش عمه عني درتي هالعيــــــن
وانت العليمه بكل تاويل الديــــــــــن
خبريني عن الوالي هاجر لاوين
گلبي يعمه عليه صاير نصين
بحلمي ياعمه ليش مصيوب حسين
جاليش عمي منه مكطوعه ايديــن
موكلتوا سافر والدي وعني بعيد ... جاليش بحلامي اجه يمدلي الايد
يا ريت عمه افتهم... منهو يفسرلي الحلم
""""""""""""""""""""""""""
لمن شبكني شكد عليه مهمــــــوم
حسيت صدرة بلا ظلوعه ومهشوم
بحزانه چن ينظر عليه المظلوم
ويگلي ليش مدميات الهدوم
يا والدي كتله سبونه معلـــــــــوم
والثوب من جرالتراجي مدموم
ليش الدموم من النحر هالتجري ... ليش اتراوالي بحرب ما ادري
وبخيول صدرك منهشم... منهو يفسرلي الحلم
""""""""""""""""""""""""""
وناديت ها ياخوية واعظم سجاد
من عادة المحروم يگصد اسياد
وانته اخوي وانته خير العباد
انطاك الله من علم لوحة وزاد
بالحلم ليش مدمى ابن الاجواد
والدي مذبوح النحر ليه عاد
جاوبني نشف هالدمع من عيني .. گلبي انفطر من لوعتي وونيني
بعينك علامات اليتم .. منهو يفسرلي الحلم
""""""""""""""""""""""""""
حلمي عجيب وبيه نبرات عتاب
ويا محله دمع العتب بين الاحباب
من مر عليه دمعه عالوجنة انساب
بيه حركة الفاكد ولد والاصحاب
لمن اجيته ما فهمت الاسباب
عبد الله بيده برگبته دمه صاب
جاوبني ياخيمة هلي وجداني .. حال الطفل لوعني واذاني
من الماي چنة منحرم .. منهو يفسرلي الحلم
""""""""""""""""""""""""""
تفسير هذا الحلم يارقية
نوح وبواچي وانصبي العزية
مذبوح ابوچ وعالنهر اخيه
صرتي يتيمه يا احن بنية
بالطشت راسه سيد البرية
ولمن تشبكينه تجي المنية
موتچ رقية اخر المصيبة ... هز العرش من لوعته ونحيبة
والدين اصبح منهدم.. منهو يفسرلي الحلم
""""""""""""""""""""""""""
مجيد عبد الرضا القريشي

يمحرم هلالك هل ... للاحزان ماكو حل
شفت بضواك منحور مرضوض مدمي
شفت سگاي عالماي بالعين مرمي
هلالك هل
________
يالمضيع ظلام الليل جيت اعتب على هلالك
بالمسير قوافل ضيم صحرة بالي تحلالك
اريد أسأل ضواك اليوم گلي شنهو البالك
احمر ضواك گبالي وبهلته يخنگني
ارد اسئلك شنهو الضام يهلال لا تسئلني

بس ما شوف بيك الماي ... وماكو چفوف للحماي
واشوف اطفال اتصيح چاوين عمي
شفت سگاي عالماي بالعين مرمي
هلالك هل
________
يالتارس سماك بدم سهم تنزل على عيوني
ابد ما بشرتني يوم دمع خليت بجفوني
بقيت اسئل عليمن جيت هلي بهالصحرة جابوني
خاف انفجع اه يهلال واگضي العمر مكسورة
من هلتك طول الليل اعرفها هاي الصورة

كلما صار نورك دم ... ابقه بحزني أتألم
ضواك هموم للشوف والعين تعمي
شفت سگاي عالماي بالعين مرمي
هلالك هل
________
حرام اعليك خبرني يالتلالي بدموع العين
اخوي حسين واخباره خبرني بخوي حسين
اخاف الگوم ناويله بحرب ما تنگحم صوبين
خبرني وارحم يهلال عن العزيز وحاله
خاف بضمه نحره يجود وتسحگه الخياله

وعن عباس گلي وين ... بس لاتگول ماله ايدين
اسيره يصير لو راح عباس أسمي
شفت سگاي عالماي بالعين مرمي
هلالك هل
________
تعذبني شواده بال وانته بالسبب تدري
لان لون الدما واضح وضواك اعله النحر يجري
ادري ما تظل وليان بس شلون وي خدري
لايح الي خط سواد چنة دخان خيامي
ونسوان بالحومه تدور واتجمعت عالضامي
وعبد الله منو الشاله ... ما شفته بضوة هلاله
نظرت هواي والماي فسر حلمي
شفت سگاي عالماي بالعين مرمي
هلالك هل
________
تهل يم زينب بحسرات وسلام تهل على غيري
چنك دوم وي اعداي تگلي مأسرة سيري
وانه بهذا الأمر ظليت يحير أبالي تفكيري
لو انسبي لأرض الشام وتتفرج علينه الناس
يا حسرتي بذاك اليوم امنين اجيب العباس
گلي منين اردله چفوف... صار ابعيد عني طفوف
مشي وسياط ايام من غير زلمي
شفت سگاي عالماي بالعين مرمي
_________
خادم زينب ع
مجيد عبد الرضا القريشي
نسألكم الدعاء

يادگة الباب گري هالعيون ... بلچن بالاحباب جية ويمرون
طاحت عيوني من النظر ... من المرض گلبي انفطر
يادگة الباب
________
اسولف والسوالف ضيم للعايش بلاية اهله
هجرهم كالجمر يسري بجسمي فوگ هالعله
لا ماي البعدهم بيه اهنه ولا طعم أكلة
بعدهم والهجر يا ناس صواب بمهجتي خله
دمعي ولافاد عالراح دمعي ... مكسورة بالبيت والصوت ينعي
بالهم بعدهم والكدر ... من المرض گلبي انفطر
يادگة الباب
________
بقيت برحمة المرسال بلچن لو خبر عنهم
يطمني اعله حيلي الراح ويحدد مواطنهم
يگلهم هم يجي عباس ياخذني لمحاملهم
نذر اطيها هاي الروح بس أوصل وشوفنهم
أمن يجيبه ادعي وانادي ... بجاه النبي وجاه حيدر الهادي
بجاه الإمام المنتظر ... من المرض گلبي انفطر
يادگة الباب
________
علي يمسهل الصعبات ردلي الصارو بغربة
يحلال المشاكل دوم ادعي ودعوتي صعبة
اوزع بالفضل عالناس بجاه أبو الفضل قربة
وادعي لوالدي المظلوم الله ينصره بحربه
لعبد الله سويت حرز اعله اسمه.. خافن هالزغير بالصحرة يضمه
خافن يجيه سهم بنحر ... من المرض گلبي انفطر
يادگة الباب
________
ونات الزغيرة ظنون من تنحب جمر هية
وانه لوحدي اجر النوح ليل نهار يومية
علي لو هاجت الحمى تمرني بئيدها رقية
وهسه مگابلة الونات ولا واحد يمر بيه
اسأل يهالناس ومگابلة الباب .. ولامن مراسيل ردتلي الجواب
بنار الهجر جسمي استعر ... من المرض گلبي انفطر
يادگة الباب
________
حلم صارت تدگ الباب وهيچي گبالي مفتوحة
واشوفن طلة المحبوب ويداوي گلبي وجروحة
شو طال البعد ياباب وچنها الروحة فد روحة
لا ردة البعد منهم تهيد للمحب روحه
جاوبني ياباب اعتب ترة اعليك ... لو ضلعي ينصاب اگعد وتانيك
لودگتك ضلعي انكسر ... من المرض گلبي انفطر
يادگة الباب
________
أنه اللاسلوة الي ضلت حزن وبصدري مغرس
الم ودموع تبرالي وهموم البصدر تحبس
بس وحدة اريد هنا ربي شيعتك احرس
يسلوني بذكرهم دوم وما ينسوني بالمجلس

ذكرو مصابي وحزني على حسين ... ياربي احفظ ذولة الموالين
من كل وباء وكل خطر ... من المرض گلبي انفطر
يادگة الباب
________
خادم العليلة مجيد عبد الرضا القريشي
نسالكم الدعاء

چنك نبي وصبح الله چنة عيونك
والعاينو وجهك فلا ينسونك
يا بدر ما لمك سما ... ينجرح برسومه الدما
________
يمه غده صدري جبل يوم الرحت للمعركة
وعيوني ذابت چن ثلج حر النهار يفككه
ابعيد ما توصل الك ايدي بهواها شابكة
شيصبر الأم عالولد سيف القدر لو شاركة
من بعيد انده الله وياك سالم يوليدي
يا فرحة عمري بدنياي يا هلة عيدي
بس منيا وحده تمنيت شمه من وحيدي
لاچن خالف ظني الموت يبني موبيدي
من عاند وياك القدر يالغالي... هدملي حيلي وما رحم بحوالي
وهسه بمراري مألمة ... ينجرح برسومه الدما
________
بالحومة عافيتي غدت وابعد علي شم الهوه
والفارگ بلحظة گمر يملي عيونه يا ضوه
وشلون لو يشبه نبي لفراگه ينفع يا دوه
يالراحل ابعد السما هم نرجع ونگعد سوة
يا كسرة ظهري ويحسين يانور أيامي
يالرايح لانياب الموت يالگلبك ضامي
من بعدك ياروح الروح ضاعت أحلامي
ياريت اسهامك بحشاي يالعني تحامي
بعدك فلا لون لضوه بعيوني ... اسود غده من فرگتك وظنوني
لا تظن بعدك سالمه ... ينجرح برسومه الدما
________
من وجه ابوك انظر الك شفت بمعانية الحرب
ما رمشت عيونه بشمس ولاميلت عنك غصب
الوان وجهه لشوفتك كل ساعة لون وينشطب
ولمن برز غانم الك ولادم بقه بوجهه يصب
معذور بصفناته حسين وخطفة الوانه
لن بن غانم ايعدوه الف بعنوانه
لو گرب منك ياحيد چن موت وجانه
ظليت ادعي وياي حسين لله سبحانه
ومن كبر حسين بعظم إحساسه... ياليله ابنچ هذا رافع راسه
جندل بكر رغم الضمه ... ينجرح برسومه الدما
________
يلمارويت من العذب گلب الشمس گلبك غده
يالصارت اشفافك جمر ولاماي عدنا نساعده
لسانك على السان الولي طابگ ولامن فايده
بس گال كلمة وغربت صايل على جيش العده
جدك ينطر بيده الماي يالاكبر والكاس
من عطشة گلبك يرويك من لوعة هالناس
واعله اثارك هالماضين بوية اني وعباس
بين المنحور ومطبور ما راوي من الطاس
يوليدي مكتوب وتشوفه عيونك.. بالحومة ضامي والعده يطبرونك
عن چتلي لاتسئل لما ... ينجرح برسومه الدما
________
غابت شمس عمري وصرت دنية عذاب بلاشمس
من طبرك سيف العده يطبر حشه گلبي احس
ما رحم دهري بحالتي ولا رحم بوليدي النجس
بجيشه فرد هجمة هجم بين الطبر بين الرفس
اه يادهري وياي شبيك خالفت ظنوني
توليني بهالصحرة اعداي ببني يذبحوني
من طاح الأكبر مصيوب ما تدري شلوني
ميته بلا روح وناديت لبني ودوني
ماتت احلامي يابدر وي موتك ... طايح على الغبرة ورمل تابوتك
وحسين ناصب مأتمه ... ينجرح برسومه الدما
________
خادم الأكبر
مجيد عبد الرضا القريشي
نسألكم الدعاء

أنصار والله ونعم الانصار ... ختمو عمرهم ويه الحسين
ذاعت شيمهم كل الاخبار ... وتصدرو كل العناوين
صارو مثلنا ... لهذا زمنا
________
أسود بكل زمان نشوف طرواهم
حسين اختارهم وبئيده علاهم
على اذان الملا والعين سماهم
صحابة نور والخير ابتده وياهم
مازال يفخر صوته مازال ... نعم الاصحاب ونعم من گال
غيره وشجاعة وگلب ما مال ... خيالهم مايثني لو صال
ترسو گلبنه ... لهذا زمنا
________
هلا بيهم شكثر شالو كرب لحسين
هلا من گال فدوه نروح للطيبين
حبيب الصاح زينب گولي شتردين
لخلي اعداچ نهر من الدما صوبين
لعيناچ فدوة وعدها عيناچ ... للخدر كلنه نطيح اموات
وخل يسمع الكون الگصه وياچ... كلنه فدة للفاطميات
هالكلمة گلنا ... لهذا زمنا
________
خرس من صال ابن القين كل الكون
وابن عوسج رسم طعناته باليعدون
ماگول الرياحي العزة عنده فنون
بس شم العطر والطيب من عد جون
اعله الفخر مشبوحة العيون ... واعله السفر كلها تنافس
بحب الحسين اتبارو أجنون ... وهاك انظر السواه عابس
اجنونه جنة ... لهذا زمنا
________
صحب حسين صارو معجزة وامثال
أية بكل زمن نقراها للأجيال
عبر نخوة وشهامة ودرس للابطال
وبهذا الزمن شفناها واقع حال
من گال داعش اهدم گبور ... ما صابت الخيرين حيرة
طفل وشباب وشيخ مهجور... نزفت گصصهم نهر غيرة
سوو حشدنا ... لهذا زمنا
________
كلام الناس ماينصف كلام الناس
نكر كل مرجلة وصار الغدر فراس
لچن مادام طيب شعري والانفاس
كلامي الكم يظل لحسين والعباس
اكتب شعركم واني ممنون... شمحلاته للطيبين شعري
وخل الملامة واليلومون ... بالآخرة يشوفون أجري
انتم اجرنه ... لهذا زمنا
________
تربينه أعله حبكم بالزغر وكبار
لا طاغوت همنه شما عدم لو جار
حاربنة النواصب والسواتر نار
وعمرنا مجالس الكم بكل دار

حاربنة وبحبكم نمارس ... سيوف ولسن اعلينه يحچون
والماتعجبة هالمجالس ... موت اليطمه وهمداه كون
ما يرضى عنا ... لهذا زمنا

________
مجيد عبد الرضا القريشي
نسالكم الدعاء

يا كسرة ظهري وكل حيلي عندي عتاب هواي
ليش تگل لنفسك هوني وما شارب هالماي
انخطف بعدك ثمر لوني ... عتب واضح على عيوني
___________
اعاتب والعتب مرسوم بعيوني
وطبگن عالجمر من حالك جفوني
رحلتو وعايش بهمي تخلوني
وانه ظني گبلكم من تشيعوني

فوگ اصحابي اولدي ترحل عني يا عباس
مو شيب براسي من همك بجسمي ما ظل راس
فگدت الي يواسوني ... عتب واضح على عيوني
___________
كاتب اعله جودك بالدمع شفتك
العذر يحسين مي ما بللت شفتك
ضامي لوحدك بوسط العده عفتك
وادري لارحم ترجيه من امتك

المارحمت طفلك عبدالله كل شي اعليها يهون
والصابو عيني وچفوفي چم راس ينحرون
بگطع نحرك يذبحوني ... عتب واضح على عيوني
___________
شعاتب والزمن ما يسوه چلماتي
اذا رحت انته حلت كل معاناتي
بقت بس چلمة اكتبها ويه دمعاتي
يعباس انكسر ظهري ورحل ذاتي

يا حسراتي وحسرة زينب يوم العنا تروح
نبقه اجسام بهاي الدنيا بس ما بيها الروح
وسط موتي تخلوني ... عتب واضح على عيوني
___________
ڜگل لختك وگابلها انه بياعين
وشگل لسكينه لو سئلتني عمي وين
شجاوب والجواب يهد سما الصوبين
منو يصدگ بلا عباس ظل حسين

هاي الچلمة اصعب چلمه والله تهد الحيل
من تسمعها مني عيالي يصير نهارك ليل
بعويل الهم يلاگوني ... عتب واضح على عيوني
___________
يعباس وعلي ما ظلي بعدك حال
بكثر دمك دمع بالعين مني سال
أنه ما طالب بهالصحرة دنيا ومال
وعلي عينك تشوف يدور الچتال

مااسلم بعدك من عدهم جسمي يصير اسهام
مثلك منحور وهم ضامي ويحرگون خيام
وتحير لزينب ظنوني ... عتب واضح على عيوني
___________
خادم ابا الفضل العباس ع
مجيد عبد الرضا القريشي

صوت النوح عالعربس ياجسام ياجسام
والمجروح همه يصير ضرب اسهام ضرب اسهام
رباك الراح شيرجعة ... شموعه تحولت دمعة
__________
طبع أم الولد ترتاح لو سوت اله زفة
تگر اعيونها بشوفة وتترس أيدها الحنة
وانه يا خلگ زفيت ابني لحومة الونة
غاب بظلمة العدوان وهو چالكمر چنة

ولمن راح ظل الصوت اه يبني اه يبني
ياجسام بعدك شوگ عذبني عذبني
الم بياسه والشمعة ... شموعه تحولت دمعة
__________
يشايل من ابوك اطباع كريم لحد مناية الروح
الشباب بعرسه مال ورود مومالة حرب وجروح
أنه ابدال الشمع خليت اصابع عشرة بيهن نوح
تلطم صدري والدلال على الدمه بحرب مسفوح

بعدك اه ظل عمري بالايام بالايام
حل رباك انه ادري چم حزام چم حزام
العمر بفراگه ما أجرعه ... شموعه تحولت دمعة
__________
يتربات الحسن وحسين بيهم رافع اعلامك
يعطر من الكريم يفوح اشمك واغفة بنسامك
يدرة وامنتها بروح احسب عمري بيامك
لچن ما حسبت دهري يخون ويذبح احلامك

بعدك مات كل حيلي شحچيلك شحچيلك
بعد شتفيد كلمة فدوة اغديلك اغديلك
زرعت بمهجتي الوجعة ... شموعه تحولت دمعة
__________
كلام الفارگ احبابه يزرع بالصدر غصة
يمكن تمضي الايام وتنطيه دنيته فرصة
لچن ام لو ولدها راح هذه غير هالقصة
يأخذ كل عمرها وياه ربعه ولانصه

الولد لو مات گلب أمه يموت وياه يوت وياه
وطور النوح من بعده اه واه اه واه
أبد ما تحمل الفجعة ... شموعه تحولت دمعة
__________
عرس جسام ظل أية لشباب الغيرة والثورة
يعلمهم ثقافة دين وحگ الضايع ايدورة
اليريد يطالب بحگه بستر مو بارز العورة
مو جمعة وهرج چذاب وعدو حسين ايصورة

صنع جسام الك دستور هاك اقراه هاك اقراه
واعلى الدين هذا اليوم عاهدناه عاهدناه
اليخالف لازم نردعة ... شموعه تحولت دمعة
__________
مجيد عبد الرضا القريشي
خادم ابن الحسن ع

الليلة مهيوبة وأميرة مخدرة .. وتبدي معركة الستر باچر ترة
من يميل من الهزل حامل .. بعد ما يفزع ابو فاضل
الليلة الليلة
__________
چنها ليلة قدر هم بيها علامة
بيها حتى الفجر اخواني بسلامة
لو طلع منها الضوة تشوف الامامة
جوة حافر خيل مسحوگة عظامه
وتترس في عيوني جمرة الدمعة
‏تنحب عليي راح وما اله رجعة
‏وينهد كل كياني وتبتدي الوجعة
‏
‏اه ياليل العشر فجرك غدر ... مسارع بحزني وابد ماتنتظر
‏مايهزك دمعي الهامل .. بعد ما يفزع ابو فاضل
الليلة الليلة
__________
‏التنتظر صدمة فجر بإبال الها
‏الليلة يمها وباچر تسافر اهلها
‏من تريد الماي ويروح الكفلها
‏يعني طاح حسين وتبدد املها
‏بروحت اخوتي تتهدم اقلاعي
‏بتراب ودمع يتغطه اقناعي
‏مهزولة السفينة ومايل شراعي
اه يا حرگ الخيم بيد الشمر.. اشگف اسهامة ويچويني الجمر
بلاية غيرة عالنسا صايل .. بعد ما يفزع ابو فاضل
الليلة الليلة
__________
ادري موسهلة التظل هيچي غريبة
الدوه ماينفع جرحها ولا طبيبة
لا نبي المثلي شهد هيچي مصيبة
منهو شاف اعله الرمل مصرع حبيبة
وتشوف الشمر صاعد على صدرة
لازم حربته وصاب ثنعش طبره
ويلي من الگفا ظل يذبح بنحره

حتى عالجبلة ابد ماجبلوه .. راد شربة ماي خيي و ماسگوه
عفيه گلبي شگد صبر شايل .. بعد ما يفزع ابو فاضل
الليلة الليلة
__________
لو رحل عباس للماي وحتوفة
هي اخر شوفة اله وشلون شوفة
ماخذعيونه السهم وبلا چفوفة
الچان ظلي يابشر شلون اعوفة

كاتب عالجرب ياخوية عذريني
صعبة اعله النهر طايح تشوفيني
ماكو چفوف ادية وانطفت عيني
صعبة بعدي ياذيچ الشمر .. وصعبة اشوف حسين ظهرة منكسر
صاح زينب والدمع سايل .. بعد ما يفزع ابو فاضل
الليلة الليلة
__________
خل نلم ارواحنه ونصير الجنود
والستر هو الدرع لو حلن السود
لاتظنن من نهر عباسنا يعود
حرم بالصحرة نظل والعادي اليحود

ومعركت الستر تبدي وملاحمنا
بالعاشر تطول وتعلى ونتنا
مچتولة الزلم محروگة خيمتنا

اه يا درب الأسر ذله تطول .. ما اريد احچي عليه ولا اگول
لشام لو ضعني صبح شايل .. بعد ما يفزع ابو فاضل
الليلة الليلة
__________
مجيد عبد الرضا القريشي

‏