- ليا فتره متباعد عن الناس والأصحاب. صاحبت روحي ولقيت اني صاحب كويس وقدع واني نقدر نعتمد على روحي بروحي نطلع انا وروحي نحكوا ، نهدرزوا نتعاركوا ، ونردوا أصحاب من جديد ، بإختصار ، الراحه في اعتزال الناس .🖤
- في مواقف يصيرنلك في حياتك ، من صدمتك ومن شده تأثيرها عليك ح تضحك ، اها ح تضحك لانه مرات الموقف يكون من صاحب مقرب لكي او شخص يعنيلك واجد ومتقدرش تعطي اي رده فعل او اي كلام غير انك تضحك ، متقدرش تحدد انت ضحكت ولا لانك متوقعتش الي صار وانه شخص هذا طلع زيه زي غيره ، ولا لانه مشاعرك تلخبطن ومعش فهمت شي ، كل الي تعرفه انك مصدوم ، ومن قوة صدمتك ضحكت .
- حاتعلمك الدنيا ان ترد بالك قبل ماياخدك الحماس و تخسر حد على خاطر حد .. لان ربك اعلم بقلوب الناس و من فيهم انضف اتجاهك و من فيهم نيته اصفى ليك .. رد بالك تبيع شخص على خاطر شخص لان حايدور الزمان و يبيعك .. و حايدور الزمان و يتصالحوا و تطلع فيها انت البراني .. رد بالك قال تعالى :" وَلا تَزِرُ وازِرَةٌ وِزْرَ أُخْرى " ف رد بالك تخلط الامور .
ربي عالم إن الصبر بكل أنواعه عِبادة شاقة ومش ساهلة على قلب أي إنسان فينا، مش ساهل الصبر بعد الفقد، ولا الصبر بعد الهزيمة، ولا الصبر بعد الخسارة، و عارف إن قلوبنا تنزف ألم لكن مش باين علينا و قاعدين نتحملوا طمعًا في كرمه، علي خاطر هكِ ماقالش إني جزيتهم بِما صلوا، ولا بما صاموا، ولا بما تصدقوا، مش يطمن قلوبنا ويبشرنا بعوضه قال بِما صبروا..
