لالا يا امي انتي دايرة الناس يقولو علينا شنو! يقولو بتهم مجنونة وعندها نفسيات وبتمشي لدكتور بتاع مجانين!؟..
_
الأصوات بدأت تعلى ودقيقة ورا دقيقة الموضوع بتعقد والمشاكل بتزيد وانا م مستحملة ...كانت جوطة عقلي م قادر يستحملها ودقيقة بعد دقيقة بقيت افقد السيطره ع نفسي.
_
وفجأة....!
قاعدة اصرخ وابكي بهستريا وبقول انا م دايرة اعيش ودوني ليه بس وارتاحو مني! بقيت تقريبا ع الحالة دي لمدة ساعتين وهم بحاولو يهدو فيني.
_
طيب انا منو اصلا ولي بحصل معاي كدا وعندي شنو اساسا!!؟.
انا ياسمين محمد ، القصة م بدت زي اي قصة عادية بتمر بيكم ف حياتكم.. كان يوم عادي وانا جاية من الجامعة واليوم ظابط ...سبحان الله نهايته م متوقعة نهائي .
وصلت بيتنا وانا مبسوطة وبتونس مع امي واخواني زي كل يوم فجأة جانا خبر انه اخوي اتوفى!.... كنت متعلقة بيه شديد .
دقيقة انتو منو وليه بتبكو!؟... بكيت زي نص ساعة وسكت ، بقيت من مستشفى لمستشفى كان ممكن افقد حياتي عادي لدرجة انه م لقو وريد للدرب الدكاترة قالو دي آخر محاولة ولو م نفع نركبه ف الرأس دا كله وانا سامعة الكلام بس م قادرة افتح عيوني وع حظي ركب آخر واحد.
_
بدأ الموضوع وانا ف البيت نفسي قايم ، ضربات قلبي عالية ، فترانة طبيعي وانا من السرير م بقوم ، صداع شديد ، الالام ف البطن ، تورم ف اماكن مختلفة من الجسم ورأسي لافي بتذكر انه قالو البت دي عندها ضغط وحتى بلعت اسبرين كم مرة وقدر م اقيس ضغطي عالي .
_
بعدها مشينا عملنا كل الفحوصات الممكن تتعمل وظائف كلى واي شئ وكلها نضيفه ف الآخر .. امي قالت لي اخواني تودوها اخصائي واهتدينا ومشينا للآخصائي .....الغريبة انه لمن قاس ضغطي لقاه طبيعي وهو ع فترة ٥ ايام كان م مظبوط .
وقتها قال لي انتي م عندك حاجة دقيقة! انت بتقول ف شنو! طيب انا مالي دا شنو! كان رد الدكتور كالاتي:
انتي م عندك حاجة انتي عندك اضطراب ف هرمون الادرنالين وهو بسبب كل القلتيه لي دا ولمن سألته من السبب قال لي دي الفترة الانتي بتمري بيها وعشان عايشة ف ضغط الفترة دي. على كدا اخدت العلاج الكتبه لي ممكن تقولو انا كنت متيقنة انه بدون العلاج دا م حأقدر اعيش وبعد خلص حاولت اجيبه كذا مرة بس م قدرت .
المهم بديت اقرأ عن الموضوع بتاعي ف كذا موقع ولقيت انه الكلام القاله لي الدكتور دا اسمه اضطراب ما بعد الصدمة.. ودا مرض نفسي شائع وبكون عند الجنود البجو من الحروب وكدا.. انا م جيت من حرب بس الفكرة انه الصدمات دي بتختلف من فرد للتاني ودرجة تحمل الفرد ليها برضو بتختلف.
_
طيب المرض دا فهمه شنو!؟ انا اسي وريتكم هو شنو المرض مرتبط ارتباط اساسي زي م واضح بالحالة النفسية وبيؤدي لـ مشاكل ف هرمون الادرنالين ودا الحصل لي. طيب الهرمون دا المخليه مضطرب شنو! حاجات كتيره زي التفكير ف التجربة المر بيها الشخص وانه يتذكر التجربة والصدمة المر بيها ودا ممكن تقولو عليه فرط التيقظ يعني بالدراجي كدا تكون مهموم شديد وعقلك طوالي شغال وبفكر. طيب هو بيؤدي لشنو الاضطراب دا؟
بيؤدي لنفس الحاجات الحصلت لي والقلتها ليكم بالاضافه لحاجات نسيت اذكرها ليكم زي الشعور بالهلع والقلق وأرق وبتكون جاهز لي أي شئ خطر يعني متوقع الاسوء بس وبتكون منفعل طوالي وهايج كدا وم قاعد ف الواطة.
_
طيب اها الجوطة الفوق دي كانت لي شنو دا كله عشان امي اقترحت انه يودوني لطبيب نفسي واختي بتتناقش معاها.
عينة اختي دي عندنا كتير ف المجتمع وهم اساس المجتمع المجتمع الدايما بكون مترصد للزول ومنتظره يعمل حاجة مخالفة ليه كل الفكرة انه انا مختلف منك وم زيك مشاكلي النفسيه ف زاوية وف بعد انت عقلك م بستوعبه لانك م مريت بي حالتي .
المرض النفسي م عيب ولازم تفهم انه الامراض العضوية اساسها بشكل كبير امراض نفسية وعامل من عوامل النجاح فيها حالة المريض النفسية.
انا مختلف عنك بعض الشئ لأني ارى العالم بمنظوري.
__
#سلسلة_القصة_من_جانب_آخر '2'
#إضطراب_ما_بعد_الصدمة#آية_حسن
